Aanaskola yi indilwa ya talele po

0
33

Maria Namupala

ONGULA ya NETANGA-Omupevi minister mUuministeli womidhingoloko nomatalelopo Tommy Nambahu, okwi indile aanaskola ya landule omaithano gawo, yo taya kala nokwi ilonga iilongwa yomatalelpo nomalweendo.

Nambahu ndhika okwedhi popi Olyomakaya ya yi pethimbo ta egulula pambelewa endiki lyOngula Community Multi-purpose, tali adhika momukunda Ongula Ya Netanga moshikandjo-hogololo Omulonga moshitopolwa Ohangwena.

Endiki ndika olili oshitopolwa shOngula village homestead lodge, ndjono ya totwa po konima yoomvula ntano dha piti kOmukalelipo gwaNamibia koSouth Afrika Veicoh Nghiwete nomukulukadhi gwe HilyaNghiwete.

Mepopitho lye Nambahu okwa longitha ompito ndjoka noku indila aalongwa ya longithe ehala ndyoka, yo taya kala haye li talelepo omathimbo nomathimbo okwi imonena uuyelele miilongwa yawo osho wo okukwashilipaleka kutya ontseyo yawo miipambele yomatalelo po oya huma komeho.

“Onda koneke kutya ndika olyo ehala limwe lyopandjokonona tali adhika momikunda dhetu, nonkene ngano ogo gamwe gomomahumokomeho twa pumbwa okumona, tse tu tseye shoka hashi longwa mo, otandi pandula ooyene yehala sho inaaya ndalapatela shoka yena noyeshi gandja moshigwana shi vule okukonga nokwi imonena omauyelele, sho shi igwedheleko komaunongo ngoka yena,” Nambahu ta gwedhapo ngaaka.

Pethimbo ndika endiki olya gandja oompito dhiilonga kaagundjuka yomomudhingoloko, na yamwe oya pewa omadheulo ngoka yali inaaya mona petameko. Omulti-purpose ndjoka otayi kala tayi longithwa kaanaskola naalongi okukonga omauyelele ngoka ya pumbwa.

Otamu adhika ookompiuta dhopeke hetatu ndhono tadhi kala tadhi longithwa pwaana ofuto. Ehala ohali mono aatalelipo yaza kiilongo yopondje, nuuna yeya pehala mpoka ohaya falwa momikunda nokutala onkalo, nonkene iihongomwa yOshiwambo hayi ndulukwapo.

Omupevi minister okwa ti moshilongo omuna omahala ogendji, ngono aakwashigwana taya vulu okutalelapo nokwiilongamo oshindji. Ta gwedhapo kutya Ongula Community Multipurpose oyili oshiholelwa oshiwanawa, notayi kwathele aakalimo yokomikunda ndhoka osho wo aalongwa naalongi, okuhumitha komeho oonkalamwenyo nelongo lyawo.

Nghiwete okwa yelitha kutya omolwohole yawo yoshigwana aakalimo ayehe oya manguluka ethimbo alihe okutalelapo nokulongitha endiki ndyoka, no inaya pumbwa okufuta nenge osha. “Aakokele yopomidhingoloko otwe ya ningilapo onzimbogo no twe yapa ompito ya vule okuhonga nokulonga iiyuma yawo osho wo omatiti naashoka hashi vulu kulongwa momaloya, yo ngele ya mana taya landitha ya vule okwi imonena mo sha yiikwathe momagumbo naapambele yawo,” Nghiwete ta ti ngaaka.

LEAVE A REPLY

Please enter your comment!
Please enter your name here