AaNehale lya Mpingana ya tungilwa oomboola mbali

0
62

Maria Namupala

OMATALE-Oshikandjohogololo sha Nehale lya Mpinga moshitopolwa shaShikoto osho shimwe sha konekwa shi na aakwashigwana taya dhengwa unene, kompumbwe yomeya gaantu nogiinamwenyo.

Omumvo gwa ziko aakalimo yomoshikandjohololo shoka oyali ya gandja enyenyeto kuKansela Leevi Reinhold, ngoka ali a tseyithile Ngoloneya Henock Kankoshi oshinima shika.

Moku uva enyenyeto ndika Ngoloneya Kankoshi okwa longekidha osheendo sha kwatelamo naanambelewa yUuministeli wUunamapya Omeya nOmithitu, opo ya talele po koshikandjohogololo shoka noku italela ko yoyene.

Oshiwike sha ziko omakemo gaakalimo yomomikunda ndhoka dhali nenota enene oga uvika, sho ya patululilwa omahala mpoka taya kala haya teke omeya omayelele. Epatululo lyomithima ndhoka olya ningwa kuMinista mUuministeli wokukandulapo onkalo yoluhepo nomayakulo gopashigwana Omubishop Zephania Kameeta. Omboola yimwe oya patululwa po Padelia nonkwawo opOmatale. Pethimbo a gandja oomboola ndhoka kaakwashigwana, Kameeta okwe ya kumagidha ye dhi longithe nawa osho wo ya kwate nawa omeya opo aluhe ya kale ye ga na.

Okwa ti uuministeli we owi ilongekidha okugandja omayakulo nomakwatho mpoka sha pumbiwa. Okwa tseyithile oshigwana shaampoka, kutya eshongo nonkalo yoluhepo moshilongo oya hwepopala. Okwa ti aayakuli yoshigwana naya tseye kutya oshigwana osha pumbwa okupewa omayakulo taga shambula opo nasho shi tyapule oshikwiila shemanguluko lyoshilongo.

“Onda yemata unene okutala nokumona nkene aakwashigwana taya hupu shokadhila unene komikunda ndhoka dhi li kokule niilando. Onkalo yaakwashigwana ndjika otayi etitha ohenda molwashoka oyendji ihaya mono omayakulo,” Kameeta a ulike.
Okwa gwedha po kutya oomboola ndhika odha thikamithwa po koshimaliwa shooN$ 522 000, shono sha gandjwa kuuministeli we konima sho ombelewa ya ngoloneya moshitopolwa yi indile yi kwathelwe. Uuministeli owa longele kumwe nombelewa ya ngoloneya osho wo ndjoka yUunamapya. Kansela goshikandjohogolo shoka okwa pandula uuministeli sho inaawu ndalapatela shoka wu na. Ihe owa gandja koshigwana opo shi hwepopeke oonkalamwenyo dhasho.

Reinhold okwa ti natango okuna omikunda dhimwe tadhi mono iihuna kenota, noku uvaneke kutya ndhoka nadho otadhi ka pewa omeya mbala.
Aakalimo yomomikunda ndhoka oyali ya nyanyukwa molwaashoka omakemo gawo ogu uvika na ngashingeyi ota ya ende oshinano oshifupi okukateka omeya.

Helvi Hamutenya gumwe gwomaanamukunda mboka ya holola enyanyu lyawo, okwa yelitha kutya oya kala haya ende oshinano shookilometa 15 sigo 20, oku ka konga omeya, nolundji sho taya ka thika komahala hoka kuna omeya oga pwamo nale noyena okutegelela esiku tali landula.

“Otuuvite ombili nenyanyu ngashingeyi iinano iile oya tetulwa otatu ga longitha nawa, tse tuga kalekepo, oondjodhi dhetu dhu uvika nompumbwe yomeya kutse ngashingeyi katu yi shiwe nande,” Hamunyela tati.

Hamunyela ta ti elelo lyoshitopolwa olyali lya kambadhala opo li tungile omahala gamwe, oomboola, ashike sho omeya ga konakonwa ogali unene omalulu. Momahala gamwe oomboola odha teka, ihe yo, aanelago oshoka mpoka pwa hupwa oomboola dhawo kapena omeya omalulu.

LEAVE A REPLY

Please enter your comment!
Please enter your name here