Moshitila Mwa Z’Ondjupa : Iilonga yandje muHaiveleka muMuni gwaMbaye

0
79

Osheendo shaayunguli shoka sha li tashi yi kOliindili sho sha ngenunwa ko, oshu ukithwa kOmbaye. Kombaye okonyala ndi tinde ko, ihe aasamane yamwe mboka mokati kawo tandi dhimbulukwa mo, Ampindo yaPamwe oya kumagidha ndje ndi ye ngaa kOmbaye ku Muni. Oya ti kutya aniwa kuMuni okuuwanawa, oshoka aniwa itandi ka longa komandini gonyata, ngoka ga li haga humbatwa komapepe, ihe aniwa otandi ka pewa iilonga yomookombitha, shaashi ngame omushona natango.

Nandi shi tumbule meukililo kutya, onda li nda tila oku ka humbata omandoloma goonyata. Ethimbo ndiyaka ngame onda li omugundjuka. Omuntu gwomumati kwa li to hala ngele to ya pomukunda otaku ti kutya okwa li ha longo momatudhi mooMuni.
Hewa ndi ye kuMuni gwaMbaye, ombulu ndji hayi topolele aantu iilonga nkene ya mono ndje yo otayi ti: “Hey pikinini kom.” Ngame otandi pewa iilonga ndi ka longe kuHaiveleka.

Piilonga yaHaiveleka, onda kala owala handi tula omahooli momashina golusheno lwondoolopa nokuyalula oowili. Iilonga yetu oya kala nduno hayi ningi omalufo gokulonga uusiku nenge omutenya, ano oya li ya topolwa moosipana mbali, ngeyi ospana yetu sho tayi longo omutenya oshiwike shimwe, yo onkwawo otayi longo uusiku, sho tayi ka za mo muusiku, tse otatu yi kulile mo, opo yi longe wo oshiwike shimwe omutenya. Shika osha hala okutya, kehe osipana momwedhi oya li yi na mo iiwike iyali tayi longo uusiku, niiyali tayi longo omutenya.

MoHaiveleka oshilonga shandje osha li shokutula omahooli momashina nokuyalula oowili, oshoka omashina ngeyaka oga li haga longo noowili, Shampa wa adha owili tayi lili , nena otashi ti omahooli gomomashina ogeli metata. Omashina ogo tuu ngoka, oga longwa nekende lya za moindjina yalyo, lya shangwa oonomola. Nena ohamu lombwelwa nduno kutya opoonomola dhini, ngele omahooli ga adha po, mpoka omuntu wu na okugwedha mo omahooli, nenge uuna li li nawa, inashi pumbiwa. Ngame onda li owala omutulimo gwomahooli momashina nomuyaluli gwoowili.

Miilonga yandje yokulonga muHaiveleka,onda ka kala omudhiginini gwethimbo nogwiilonga. Sho tatu tameke poyimwe manga ku na ominute omulongo, ngame opo ndi li nale nda kuutumba nda tegelela yakwetu. Kanda li handi laata nando okashona. Shilumbu ngoka twa li hatu longo naye omutenya, opo ha adha ndje nda thika nale.

Konima aahona yiilonga oya ka tokola kaandi longe we nomashina, ihe ndi kale handi ya ningile otee. Ngame nda pewa nduno oshinima oshiwanawa shokuninga okatee, oshoka mOlyomakaya nomOsoondaha ihandi yi kiilonga ohandi yi ko ashike mOmaandaha sigo Etitano. Iilonga yetu oya li hayi kutuka pontano yokomatango, nokuza mpono ngame otandi ka vululukwa. Sho nda tameke iilonga mbyoka yokuningila iilumbu otee, aahona kondjambi yandje yooR3,60 [ano ooN$3,60] oya gwedhele ndje ko iithilinga ine, e tandi kala handi kwata ooR4,00 [ano ooN$4,00] komwedhi.

LEAVE A REPLY

Please enter your comment!
Please enter your name here