Ogongo oyo enyakwa muudhano waalongisikola

0
107

Shipi Elago

OSHAKATI-Oshikandjolongo shaGongo osho sha sindana po uudhano waalongisikola wokomumvo mboka hawu dhanenwa moshitopolwa shaShana.
Oshikandjolongo shaGongo shoka sha li she ya nosipana ogundjuka lela osha li sha kwatelwa komeho kuErastus Kashuna ngoka e li omudhani gwosipana yoYoung Chiefs mOshakati na oya li taya komandwa komudheuli Timo Ithete.

Ogongo oya li ya yi mokapale noshikandjolongo shaKalongo medhingoloko lyahugunina ongulohi yosoodaha pokapale koIndependence okunyanyudha okamwaalu okashona kaatali mboka ya li ya thigala po oshoka sho edhingoloko lya hugunina lya li lya yi mokapale konyala oosipana odhindji naayambidhidhi oya li nale ya pewa iimbale.Ogongo oya li ya pitile nokoola yimwe meendelelo nokuninga eyalulo likale yimwe monola mominute lela dhopetameko, ashike Okalongo hoka ka li ka tilika koosipana odhindji okali takatsu noku thiminika ta ka pulwa pokoola yOgongo ashike okali ka dhimbwa oku edhila konima na oka li ishewe ka tulwa okoola ontiyali kOgongo noku eta eyalulo likale 2-0 okuya pokafudhepo.

Edhingoloko etiyali olya li lya thigi aayambidhidhi yoosipana ndhika taya gu kiipundi sho Shipanga a li ta nyenge Nangolo oshoka Okalongo oka li ta ka pukululwa mokoola yOgongo ashike omukwati okwa li a lungundja shokambishi na ina ethelamo nando osha mokoola ye.Pokahiya kahugunina eyalulo olya li 2-0 na Ogongo oya li ya ningi enyakwa epe mokatanga kokoompadhi 2017.

Esindano ndika olya li lye etitha Ogongo opo yi fadhukepo nokapandi koodola 3 000, ekopi, oombandi dhoshingoli nosho wo iikutu yetanga. Okalongo okali ka hekelekwa nokapandi koodola 2000 oombandi dhoshisiliveli nosho wo iikutu yetanga.
Oshikandjolongo sha Etayi osha li sheya puutitatu muudhano wokatanga kokoompadhi koomestela na oya li ya pewa okapandi koodola 1000 noombandi dhoshikushu.

Muudhano wokatanga komokambamba oshikandjolongo sha Etayi osho enyakwa muudhano waalongi na osha li sha fadhukapo noombandi dhoshingoli, ekopi, nosho wo okapandi koodola 2000.

Ohangwena Circuit oya li ye ya puutiyali na oya li ya mbendekwa okapandi ko 1 500, noombandi dhoshisiliveli.
Ompundja Circuit oya li ya etelele okano muudhano woNetball pehala etitatu na oya li ya pewa wo olupandu lwo 1000 noombandi dhoshikushu.

Muudhano woVolleyball Onesi Circuit oyo yeshi enditha nawa na oya li ya sindana po ekopi ndika konima sho ya li ya ulukile oosipana oonkwawo komutse gwondjamba na oya li ya pewa okapanndi ko 1 500.

Eheke Circuit olya li lyeya puutiyali moka lya li lya mbendekwa okapandi koodola 1000, nosho wo oombandi dhoshikushu.
Onyaanya Circuit oya li ya kuthapo ehala etitatu muudhano woVolley na oya li ya pewa olupandu lwo 500 noombandi dhoshikushu.
Uudhano mbuka owa li wa kwashilipalekwa koFirst National Bank nokapandi koodola 10 000 na owa li wu li kohi yewiliko lyehangano lyaalongisikola NANTU.

LEAVE A REPLY

Please enter your comment!
Please enter your name here