Oliha yoGalz & Goals ota yi ende nawa

0
21

Shipi Elago

Oshakati-Oliha yuudhano waakadhona ndjoka ya li ya totwa ku NFA mOshana otayi humu komeho nawa niitopolwa yilwe oyi li nale poku manitha edhingoloko lyotango.

Kundana okwa li a talele po omandiki gatatu mOshana ngoka haga dheula uunona wuukadhona wuli kohi yomimvo 20, opo iimoneneko yemwene nkene opoloyeka ndjika tayi humu komeho.

Endiki lyaNgwediva otwa li twa talele po osipana ya Golden Maggy ndjoka yi na osipana yuukadhona yo U13 no U15 na otwa li twa adha oosipana ndhika mbali dhi li metifa lyokwiidheula taya idheulile olweetho lwa hugunina lwedhingoloko lyotango lyoliha yoosipana dhomOngwediva.

Omudheuli gwosipana ndjika Frans Ananias Ndangi okwa ti oya li ashike ya tameke nosipana yuukadhona petameko lyomvula ndjika ashike oya tothamo nale iitalenti mbyoka konakuyiwa tayi vulu oku ninga iiyimati yosipana yopashigwana.

“Oyendji yomaakadhona mboka twa tameke nayo kaya li yena nando ontseyo yasha yokatanga kokoompadhi onkene otwa li tuna oku tameka lela petameko, okuya pa nkene etanga lina okusitopwa na nkene ye na okudhana pomahala gayooloka mokapale,” Frans ta ti.
Okwa ti oya tokola opo ya mane edhingoloko lyotango ya manamo opo ya humithe komeho iitsa yawo.

Uukadhona mboka twa li twa adha pokapale owa li konyala mboka wosipana yo U13 na owa li shili tawu longo nuudhiginini okukaleka omalutu gawo ga ndjanga pa madhewo noku tula miilonga shoka ya li taya lombwelwa komudheuli gwa wo.
Osipana yoGolden Maggy ohayi ithanwa Honey Bees na oyi na aanona ye li 16.
Oliha ya Ngwediva ohayi dhanenwa mokapale ka Hifikepunye Pohamba.

Oliha yo Galz & Goals mOshakati nayo otayi humu komeho na nOsekundosikola yaShakati oyo tayi tyakaleke oosikola odhindji hadhi kutha ombinga muudhano mbuka.

Pauyelele mboka twa mono po okuzilila kOndangwa, oosipana dhokOndangwa ina dhi tameka natango noliha oshoka opuna omayimbo omashona na otashi vulika ya ka tameke ashike moshikako shoosikola ta shi ya oshoka uunona otawu ka tameka omakonaakono moshiwike ta shiya.
Opoloyeka yo Galz & Goals oyo opolohalama ya UNICEF ta longele kumwe nehangano lyokatanga kokoompadhi moNamibia (NFA) oku longa uukadhona uushona nkene wuna okwiigamena komashongo ga taalela uunona uuAfrika ngaashi omategelelo,elongitho lyiingangamithi, omalovu na nkene yena okuyanda etaandelo lyo mbuto yo HIV/Aids nomashongo ogendji ga taalela uunona wuukadhona.
Opolohalama ndjika otayi wilikwa ku Jackie Gertse ngoka eli omutse gwetanga lyoomeme moshilongo na Jacqui Shipanga ngoka eli omudheuli gwosipana yopashigwana yaakadhona Brave Gladiator.

Uukadhona wu thike po 19 000 owa mona nale omadhewo okupitila mopoloyeka ndjika okuza sho ya totelwe po mo 2009 nonuumvo omwaalu guukadhona wu thike po 4000 otawu kutha ombinga moshilongo ashihe.

LEAVE A REPLY

Please enter your comment!
Please enter your name here