Omathaneko omatitano geyokomeho

0
64

Komutoolinkundana

Oshiwike sha yi moshinyolwa kombinga yoNDP5 ndjoka yi li miilonga ngashingeyi, Kundana okwa li eku etele shoka ngaka ga hala oku adha mokuyambulapo aantu pankalathano. Oshiwike shika Kundana ote ku etele shoka NDP 5 a hala sha longwa kombinga yoonzo dhopantu nelongo moshilongo.

Eputudho lyopetameko lyomunona (ECD)

NDP 5 ota ti ngiini kombinga yeputudho lyomunona na oshike shi na okuningwa opo omunona a putudhwe nawa okuninga omukwashigwana ta ti sha monakuyiwa. Eyamukulo ndyoka NDP 5 ta gandja oondika kutya opo aanona ya kale taya ngushupaleke oshilongo monakuyiwa, oonkambadhala odhina okuningwa okulonga aanona mbaka oshindji petameko lyonkalamwenyo yawo. Omathaneko oga ti omimvo dhopetameko dhomunona odha simana mpoka onkalo ye tayi talika nawa opo ngele okuna omaupyakadhi ngaashi uulema nosho tuu , mbuka otawu monika mo na otawu longwa nawo opo omaupyakadhi ngoka ga li taga ka holoka monakuyiwa ga kandulwepo mbala.

Eputuko lyopetameko lyomunona olya kwata oombinga adhihe monkalamwenyo ye ngaashi ontseyo, onkalathano, omaiyuvo ge nomainyengo ge gopalutu. Momumvo 2015, ooperesenda 13 dhaanona mboka yali yeli pomimvo 0-4 oyali mopoloholama yeputudho lyaanona aashona pamiyalu dha gandjwa kOmayalulo gopashigwana gomumvo 2011. Olopota ndjika yomayalulo gopashigwana oya ulike wo kutya ooperesenda odhindji dhaanona mboka taya kala miiputudhilo yoohembundangele otashi vulika aluhe dhi kale odhindji miilando okuyeleka naanona mboka ya kala momikunda. Okwa tengenekwa ooperesemda 19 dhaanona miilando hadhi yi kiikunino omanga komikunda ooperesenda ndhika odha thikama ashike po 9.8.

Elalakano ndyoka NDP 5 a hala oku adha moshinima shika okuya pomumvo 2022 , oondika kutya omunona omuNamibia kehe okuza pomumvo 0-8 a kale a pita meputudholongo lyopetameko.

Nando NDP 5 okwa tokola oku adha oondjodhi ndhika, oku shi shi wo kutya mondjila yokuya kethikilo ndika omuna omaimbo nomashongo, ngaashi elongitho eshona lyoshimaliwa melongo lyomunona lyopetameko. Shika osha fala mekalepo lyomandiki omashona giikunino hoka andola kuna okufalwa aanona ya ka longekidhilwe elongo monakuyiwa.Shika osha etifa wo iizemo ya nkundipala melongo.Eshongo ekwawo tali kateke eputudho lyopetameko lyomunona ongaashi okwaana oonzapo dhomavalo kwaanona molwashoka omukuluntu gumwe gwomunona keewetike uuna omunona ta ka kongelwa onzapo yevalo naashika ohashi kateke okushangwa komunona mbala menongelo lyoshikunino.

Elongo neputudho lyomunona lyopetameko moshilongo olya topaguka no ihali gandjwa koshikondo shimwe ashike. Ngaashi aanona okuza pomimvo 5-8 ohaya longwa kohi yuuMinisteli wElongo , Uunkulungu nOmithigululwakalo omanga mboka yomimvo 0-4 oyeli meyakulo lyoshikondo shUuthike pamwe wuukashike kOokantu nOnkalonawa yomunona, sho oshinakugwanithwa sheputudho lyaakuluntu osha kwatelwa komeho kUuministeli Wuundjolowele Nonkalathano.

NDP 5 okwi itaala kutya opo aakwashigwana ya kondopekwe ya vule okuya momahala giilonga nomayakulo ga yooloka, mbaka oye na manga okupewa uunongo wa pumbiwa tashi pitile melongo. Sigo oompaka Namibia okwa ya komeho moku gandja oompito dhelongo kaanona ye.

Ooperesenda 95 dhaanona yeli momimvo dhokusikola oyo haya longwa moosikola moshilongo sigo oompaka.Ihe nando omwaalu otagu ulike omunene ngaaka, okugandja elongo lyongushu ka ku li pombanda ,unene tuu momanongelo ngoka geli momahala goshigwana shahepa. Momumvo 2015 ooperesenda ashike 45 dhaalongwa mo Grade 5 odho dha li dha adha omuthika omwaanawa mokupopya nokunyola oShiingilisa, dho ooperesenda 63 mograde 5 tadhi kala dhina uunongo uuhwepo moku uvako omwaalu. Aalongwa moGrade 7 inaye shi enditha nawa meyelekanitho ndika sho mbaka ya li yena ontseyo yooperesenda 48 osho wo 41 mOshiingilisa nomoMwaalu. Pondondo yopaseko okwa konekiwa aalongwa yena egamo lyoku endulula oongundu unene. Ngaashi mograde 8 ooperesenda 30 dhaalongwa ohadhi endulula ograde ndjoka. Naalongwa konyala oshitatu shimwe moseko ohaya etha po omanongelo okuya mograde 10.

Eethopo lyosikola olili unene pombanda moosikola dhokomikunda noshinima shika osha etitha omaipulo. Eethopo lyosikola olili pombanda ngaaka kutya ooperesenda 49 dhaanona mboka ya tameke mograde 1 oyo ayeke haya sikola sigo opo grade 5. Ongushu yelongo momahala ngoka oyo uupyakadhi. Konyala ooperesenda dhi vule 20 dhaa longi momahala ngoka kayena onzapo yuulongi. Okulonga nuunkundi kwaanona momakonakono gopehulilo lyomumvo otashi ulike kutya , elongo ndyoka lya gandjwa inali adha iilalakanenwa yalyo okunongopeka aalongwa. Oshikwawo einyengo lyaalongwa okuza kosikola dhopombanda okuya kiiputudhilo yokonima yoseko olili pevi unene. Ndika otali tengekelwa pooperesenda 19 dhaalongwa mboka haya piti ograde 12. Nando onkalo oyili ngaaka NDP 5 ota lalakanene opo okuya momumvo 2022 aalongwa ayehe ya kale taya vulu okumona elongo lya kwatelamo ayehe nolyongushu ndyoka tali vulu okuya fala kelongo lyopaunivesiti nenge lyopaungomba wopombanda.

Omashongo gamwe ngoka taga thikama mondjila yelongo lyaanona , ongaashi oluhepo, omavu, eso lyooyina, nenge omunona ta tuminwa kwaakwao yamwe nenge kooyinakulu oko a ka putudhwe naashika ohashi piyaganeke okulongwa komunona inaaku tetulwa. Ompumbwe yaalongi yapyokoka no ye na omukanka gwonsteyo yomadhiladhilo osho wo uunongo wokulonga nawa shika otashi ti egandjo lyelongo lyongushu moosikola odhindji olya nkundipala. Omudhingoloko gwankundipala pomanongelo otagu dhigupaleke wo eilongo nawa lyomunona na otali ningitha elongo neilongo li kale lyaashi ewanawa. Iikwathitholongo inaayi gwana po pomithika adhihe dhelongo nayo ohayi nayipike omuthika nongushu yelongo. Etopaguko mewiliko lyelongo lyopombanda olya fala momautho itaaga tsu kumwe noshowo ompito yokwaalongela kumwe.

Elongo lyopaungomba nolyiilonga otali longekidhile aalongwa opo ya ye moshitopolwa shomahupilo ongaaniilonga, mokulongitha uunkulungu noontseyo dhawo dhoku etapo sha. Momumvo 2015, aalongwa oohandimwe ye thike 25,137 oya li yi inyolitha momanongelo guungomba. Naalongwa mboka haya manitha elongo lyawo lyuungomba oya thikama pooperesenda 60 dhomwaalu ngoka hagu ishangitha. NDP5 otaka lundulula elongo nomadheulo gopaungomba opo oosikola nomanongelo ngaka ga kale taga hili aailongi oyendji ya za pomithika dha yooloka opo mbaka ya longekidhilwe iilonga momahupilo.

LEAVE A REPLY

Please enter your comment!
Please enter your name here