Omolwashike ondjuhwa yi na ondilo

0
112

Komutoolinkundana

Windhoek-Epangelo olya zimine kutya omautho gali ga tulwa po okugamena oshikondo shokumuna oondjuhwa inaga etela oshigwana uuwanawa molupe lwoondando oohwepo dhonyama yondjuhwa.

“Okwaa na elago oohuka kutya egameno ndyoka inali fala megwo pevi lyoondando momaladnithilo,” osho Omundohotola Michael Humavindu, omupevi amushanga moMinisteli yOofabilika, Iipindi nEhumithokomeho lyoongeshefa Ooshona a zimine.
Epangelo olya etele po eutho lyuule womimvo hetatu okugamena oofabilika opo tadhi itungupo.

Ndika olya yile miilonga muMai 2013 konima yedhikopo lyehangano lyokumuna nokulanditha oondjuhwa moNamibia hali ithanwa Namib Poultry Industry. Egameno lyoofabilika opo tadhi itungupo olya nuninwa okugamena aamuni yikwandjuhwa aaNamibia, methigthano naalandithi yonyama yondjuhwa yokondje yiilongo. Oshikwawo egameno ndika olina wo elalakano okukokeka ofabilika ndjika noku indjipaleka oompito dhiilonga moshilongo.

Ihe pethimbo ndika ope na omapulo ngele eutho ndika lyokugamena oofabilika ooshona olya adha tuu elalakano lyalyo. Aalandi yonyama yondjuhwa otaya pula ngele eutho ndyoka olye ya etele tuu uuwanawa wa sha.
Shika otaye shi pula unene ye shi talela moondando dhonyama yondjuhwa ndhoka dha kala noku uka pombanda omimvo ne dha piti, okuza tuu nkene eutho lyegameno lya tulilwe miilonga.

Ondando yokadoseina komayi ano okapakete komayi 18 sigo oompaka oya tindila konyala pooN$44. Omanga ndjoka yonyama yondjuhwa hayi kuthwa mokila konyala oya mbalipala okuyeleka noondando ndhoka dha liko omanga omautho gegameno inaa ga tulwa miilonga.
Ondando yondjuhwa yi na omwenyo nayo oya mbalipalekwa, ndi tye nookuli ya ndatupalekwa poompito dhimwe.

Shoka tashi kumitha nenge tashi manitha mo omeho ooshika kutya, nando omautho gegameno oga tulwa miilonga okuza mo 2013, ofabilika ndjoka ina yi longa po sha oku etapo oompito odhindji dhiilonga, ndhoka kwali kwa tiwa otadhi ka holokapo.
Utya Humavindu okwa koneke kutya omahangano omanene moshinima shika oga kaleke omwaalu gwaaniilonga inaagu lunduluka guli ashike paaniilonga konyala 600.

Natango okuna omimvo ne omanga epangelo inaali ka talulula eutho lyegameno ndika , okugamena oshimpungu shokumuna oondjuhwa.
Eutho lyomimvo hetatu lyokugamena iikwandjuhwa olya tegelelwa li ka thike pehulilo lyalyo muMai 2021.
Ethikamepo lyofabilika yoondjuhwa ndika olya eta wo uuwanawa sho pwa holoka aanangeshefa aape moshimpungu shiikwamawawa, pahapu dha Humavindu.

Okwa ulike kutya aanafaalama yoondjuhwa aashona oya holokele moshimpungu shika, naashika okwi itaala osha etwa po molwegameno ndyoka lya tulwa po kepangelo okugamena aamuni yoondjuhwa opo kaaya ehamekwe kaalandithi yonyama yondjuhwa ya zi kiilongo yopondje.Ope na konyala aanafaalama yoondjuhwa yeli lwo 10 aashona noyopokati mboka haya landitha kwaamboka ya pumbwa ondjuhwa. Mbaka otaya longo moshimpungu shimwe naNamib Poultry ehangano lili oshitopolwa shongundu yomahangano goNamib Mills.

Humavindu okwa ti ondando yondjuhwa moositola oyi na okutalelwa minima mbyoka hayi longithwa okumuna oondjuhwa . “Ondando yonyama yondjuhwa yomoNamibia oyi li pombanda okuyeleka nondando yo koSouth Afrika. Shika osha nwethwamo kiinima ya yooloka ngaashi omeya, olusheno, aaniilonga osho wo okweenditha” osho a ti.

“Iilongithwa mbika oyi na ondilo okuyeleka naSouth Afrika, naashika ohashi gumu ondando yomulandi.
“Oshimpungu shokufaalama noondjuhwa osha ya komeho unene molwashoka aapunguli musho oya longitha iimaliwa oyindji uule womimvo dha piti moku shi yambulapo.

“Shoka twa pumbwa okuninga ongoshilongo , osho okuninga omakonakono natango kombinga ye yooloko moondando dhomalanditho noku tala kutya ndika oli thike peni .Elalakano okushonopeka omayooloko ngoka mpoka tashi vulika .” Humavindu a ti.

LEAVE A REPLY

Please enter your comment!
Please enter your name here