Otounamende ya Katoshe Soccer no Netball ye enda nawa

0
30

Komutoolinkundana

OMUPANDA-Uupale wu udha evundungwa nenge wevi ekukutu inawu shololitha aadhani yetanga lyokoompadhi, okudhana yi itulamo mokukondjela ekopi hali yugathanwa lyedhina Katoshe Charity Cup ehuliloshiwike lyayi.

Oospana dha za komanongelo moshikandjolongo Onamutai odha li dha waimine osikola yaMatheus Mudjanima momukunda Omupanda okukondjela ekopi ndyoka lya pewa osikola ndjika komulongwa nale penongelo ndyoka.

Omanongelo ngoka ga tumine oospana kethigathano ndika ogo Omusheshe Combined, Oupumako Combined, Onamutai Secondary, Olulongo Combined osho wo nee Mateus Mudjanima Combined ye mwene.

Omanga oosikola ndatu ashike odho dha li dha tumu oospana dhoNetball kethigathano ndika lya tamekele Etitano oshiwike shayi noku ya pehulilo mOsoondaha ya zi ko.

Omukwashilipaleki guudhano mbuka Matilda Katoshe Kadhikwa okwa ti elalakano lye enene oku shi ninga, olyo okukonga mo iitalendi mokati kaanasikola osho wo okukuna ohokwe yuudhano muyo.

“Onda hala okuhwameka ombepo nohokwe yuudhano mokati kaanasikola penongelo ndika nosho wo momanongelo galwe ngoka haga hiywa okukuthombinga methigathano ndika,” osho Katoshe a ti pethimbo a popitha aadhani komeho getameko lyuudhano mboka.
Okwa tsikile ko a ti uudhano ohawu kaleke wo aagundjuka yi ipyakidhila pehala lyokuya komahala ngaashi ngoka gomanwino noku nwa iikolitha ethimbo inaali adha.

Uudhano mboka owa enda mombepo ombwaana, naadhani ayehe oya li yi itulamo mokudhana opo ya mone esindano.
Yamwe yomuyo oya dhana yaana oongaku dhetanga. Ihe nando ongaaka mbaka inaya shuna monima sho inaa ya zala oongaku ngaashi yakwawo.
Ishewe okapale hoka ya dhanene ina ka fa uupale mboka aadhani ooyakwawo yomiilando yi igilila, naashika wo inashi ya tulitha omutse kepepe.

Uudhano mbuka sho wa thiki pehulilo Osoondaha ya yi, ospana yaMateus Mudjanima yosoka oyo enyakwa lyuudhano mbuka, ya sindana ekopi, ooN$ 1 200 noombandi dhoshingoli, omanga ndjoka ontiyali Onamutai Secondary ya pewa oombandi dhoshisilveli nooN$ 700 yo ospana ontitatu oya Mateus Mudjanima ndjoka ya pewa oodola 300.

Muudhano wonetball ospana ya Mateus Mudjanima nayo oyo ye ya pehala lyotango noku pewa ooN$ 700 yo Onamutai tayi ya pehala etiyali nokupewa ooN$ 300.

Aadhani mboka haya tula mo ookoola oya li wo ya pandulwa osho wo omudhani ngoka a dhana nawa muudhano auhe okwa li a pandulwa nekopi, ooN$250 noongaku oompe dhokuthanga etanga.

Aadhani ayehe yoospana adhihe oya li ya nyanyukilwa uudhano mbuka. Onkene omukwashilipaleki guudhano mbuka okwa uvaneke ta ka gwedha ko komapapa ngoka taga ka sindanwa kaadhani methigathano lyomumvo 2018.

LEAVE A REPLY

Please enter your comment!
Please enter your name here