Shitana a popi kombinga yongalo ye Exwikilo Yambo

0
1473

Pinehas Nakaziko
Windhoek

Omwiimbi gwoongalo dhoShambo, Frederick Shitana, a tseyika nawa moongalo nedhina Shitana osho a popi kombinga yongalo ye ompe yedhina Exwikilo Yambo, ndjoka opo a pititha omwedhi nguka.

Ndjika oyo ongalo ndjoka yali ya piti sho Shitana a li a mangululwa mondholongo yaMbaye sha landula sho ali a mangwa po ta lundililwa ekengelelo.

Shitana okwali a pititha ihe ongalo ndjika, nelalakano oku yelithila aaholi yoongalo dhe kutya ye kali ta ningi oshinima sha puka, nokwa hala ashike okuya nothelako nkene iinima ayihe yali ye ende. Okwa ti ongalo otayi popi ashike nkene omuntu ta kondjele iinima ye mbyoka a longa nuudhiginini.

“Ongalo otayi popi nkene tandi thindilwa kongudhi nankene tandi tula omwenyo gwandje moongalo, moka muna omboloto yandje,” Shitana ta ti.
Shitana okwali a kwata po pehulilo lyomwedhi gwa zi ko sho ali a kutu kuume ke opo a ninge a fa opolisi, yo ya konge ooyene yoongeshefa mboka ya kala taya ningi oongalo dhe ookopi noku landitha ndhika, eta ya tula iimaliwa mbyoka moondjato dhawo nonando hayo yi imba omaimbilo ngoka.

“Mokukambadhala ngeyi okwali nda kwatwa po, nonda patelwa mo,” Shitana ta ti ngaaka. Okwa gwedha po ishewe ta ti ye okwali a zi mo kobeila petameko lyomwedhi nguka, nokwa li a yi kostudio opo aka imbe ongalo ndjoka.

Ongalo oya ningilwa omikwelengendjo kuVillo, notayi ka pita moalbuma ye onshona yedhina Exwikilo Yambo, pehulilo lyomwedhi nguka, notayi ka kala yina oongalo hamano.

“Moalbuma muka otamu ka adhika oongalo mbali oompe, naandhoka ne oonkulu.”
Shitana okwa ti nando a li a mangwa po ngeyika, ye ita sholola nota tsikile okukonga mo aanangeshefa ayehe mboka taya indjipaleke oongalo dhe shaali paveta nokutula moongeshefa dhawo.
“Kehe ngoka tandi ka adha a ninga oongalo dhandje ookopi otaka futa ooN$10 000,” Shitana ta londodha. Ongalo ye ndjika ompe otayi pulakenwa nale moshilongo.

LEAVE A REPLY

Please enter your comment!
Please enter your name here