Swartbooi a kuthwa moParliamende

0
264

Opolitburo yongundu tayi pangele Swapo oya tokola oku tula pevi oshilyo shongundu ndjoka Clinton Swartbooi opo kaa uvike ti ipyakidhile niinyangadhalwa yayo mwa kwatelwa noku yi kalela po mOshigongi shOpashigwana.

“Ongundu yoSwapo mo 21 Julli nuumvo oya tokola okukutha mo Omusimanekwa Clinton Swartbooi muukalelipo mOshigongi shOpashigwana moompadhi oontalala” Amushanga Ndjayi goSwapo Nangolo Mbumba osho a ti.

Swartbooi ota pingenwapo ku Paula Kooper, ngoka oye omuntu a landulako momusholondondo gwoSwapo gwaakalelipo moparliamende.
Etompelo kutya okwa kuthilwamo shike, oli iwetikile momaihumbato, omipopyo dhe osho wo onkalo ye noku ihumbata kwe mokupopya kombinga yongundu yoSWAPO naanambelewa yongundu osho wo epangelo lyayo. Omapopyo ngoka okwe ga ningi moompito dha yooloka nokiinima ya yooloka.” Mbumba a ti.

Mbumba okwa endulula Swartbooi a ti nguka anuwa okwa popile a ti “Ngame ooperesedna 99.9 kandi shi omuSwapo. Shampa ashike ya kutha ndje mOshigongi shOpashigwana/parliamende, meni lyoosekonde 30 ngame otandi ka thigapo Swapo.”

Pahapu dhoSWAPO ndika olyo limwe lyomatompelo Swartbooi ta kuthwa mo moparliamende. Mbumba okwa ti Swartbooi okwa tseyithilwa ekuthomo lye moparliamende “ ongo esimaneko”.

Swartbooi okwa tidhilwe muDesemba omumvo gwa ziko ongomupevi minista gwelundululo lyevi konima yoku popya kombinga yomukalo evi tali gandjwa kwaamboka ye li pumbwa.

LEAVE A REPLY

Please enter your comment!
Please enter your name here