Tseya omudhani gwoye “ano Cascas olye “

0
69

Shipi Elago

OSHAKATI-Oshiwike shika Shipi okwa li a yi moonkundathana nomudhani omukulu gwOshakati City naangoka a li a tseyika nawa mosipana yoBrave Warriors ano osipana yopashigwana yokatanga kokoompadhi yaNamibia Fillemon “Cascas” Angula. Cascas okwa li a wayimine Ekondombolo lyaNangombe mokati komvula 1994 nokonima okwa li a yi koBlue Waters ta galukile kOshakati City konima tayi koCivics omanga inaa galukila kOshakati City hoka a li a tsilike oongaku lwahugunina.

Cascas okwa li gumwe gwomaadhni mboka ya li ya yi koBurkina Faso mo 1998 noBrave Warriors, na okwa dhanena osipana yopashigwana iikando oyindji.

Pethimbo ndika Cascas oha dheula osipana yoYoung Chiefs mOshakati oshilonga shoka a tameke petameko lyomvula ndjika na ote shi enditha nawa sho osipana ya mona omasindano ogendji.
Cascas omunamimvo 42 ngashingeyi, oye omvalele ya Swakopmund na okwa hita osikola ye yo pevi poPrima ya Festus Gonteb mOmbundu ya Kiiyala.

Kepulo kutya okwa tameke okudhana okatanga e na omimvo ngapi Angula okwa yamukula ti imemeha nokutya: “Eish, okatanga kokoompadhi onda li nde ka tameke ndina omimvo omishona lela nda dhini okutumbula manga inaandi tameka osikola ngame ote dhana nale okatanga moostalata nooyakwetu mboka konyala ya li ye vule ndje moomvula.”

“Cascas nani oyo ya li ya thigi po shilongo ya ka undule oka kulumbwati”
Molwonkalo yiita ndjoka ya li moshilongo Cascas kOmbundu ya Kiiyala okwa li ashike a kalako oomvula dhontumba na oya li ya lundulukile kevi lyiimpungu hoka a li a pewa oshinakugwanithwa shoku kala ha tonatele ositola ya hekulu gumwe ndjoka yi li kOmafo.
Omumati gwAangula okwa kala ngaa ha yi kOmafo a ka kwathele pongeshefa ya hekulu noku ga lukila kegumbo.

“Odolopa yaMafo oyi li konyala ookilometa ooshona lela okuya poongamba dhaNamibia naAngola na opo pwa li puna ondjila ndjoka ya li ha yi longithwa kaaNamibia omayovi mboka haya taukile moAngola okuka njoina oPLAN, naashika osha li sha fuula ndje nando onda li ndina omimvo omishona lela,” Cascas ta tsikileko.

Omumvo 1987 ye Cascas okwa li ashike opo a gwanitha omimvo 12 sho a wayimine osheendo shoka sha li sha thigi po Namibia sha thinda muAngola okuka kondjitha omukolonyeki. Osheendo shawo osha li sha kwata konyala omasiku gontumba opo ya thike pehala mpoka puna oontauki dhaza koNamibia.

Oya li ya piti mookamba odhindji nokonima oya li ya thiki mOlubango moka ye a li a tulwa mongundu yaanasikola. Molubango omo nda li nda mono ompito yoku dhana okatanga oshoka osikola moka ya li omwa li muna okapale na oya li haya dhana okatanga nooyakwawo.
Omanga tu li mOlubango SWAPO okwa li a unganeke oshituthi shontumba shoka Cascas itaa dhimbulukwa lela kutya osha li sha shike ashike okwa ti esiku olya li lela enene na oya li ya dhana noosipana dha za kookamba oonkwawo.

“Ka nda li nda pewa ompito yokudhana oshoka onda li omushona, osipana yetu oya li ya tulwa ookoola mbali dhosheendelela naa mboka ye shi ndje oya indile omudheuli gwetu opo ndi ye mokapale nando ye okwa li a dhina ndje molwa oomvula dhandje, sho nda yi mokapale onda li nda thikile tandi tula mo okoola nokonima yethimbo onda li nda tula mo ishewe yimwe etandi kwathele ngoka a li a tula mo okoola ontitatu no sha etitha opo tu sindane po uudhano mboka esiku ndyo.

“Konima yomvula otwa li twa tumwa kosikola koZambia hoka kwa li kuna omaudhano ga kwata miiti nondondo yokatanga oya li pombanda okuyelekanitha naAngola.”

“Mo Zambia onda li nda hokwa nkene osipana yopashigwana yawo ya li ha yi dhana okatanga na omo nda uva tango kutya koyima okuna oosipana dhopashigwana na osha li shili sha fuula ndje na onda li ndi itungile uugumbo kutya ngele olyamanguluka nangame onandi ka dhanena osipana yopashigwana yaNamibia,”Cascas ta ti.

Konima yoshilongo sho sha manguluka Cascas okwa galukile koNooli na okwa li hakala mOndangwa na okwa li a wayimine osipana moka omumwayinamati a li ha kutha ombinga Oniipa United.

“Onda li nde ya pula opo tuye moliha ashike oya li ye na okaumbanda okashona ta ya ti osipana oya pumbwa edhina epe na oya li ye yi luku Volcano FC ndjoka ya koko noku tseyika nawa mOndangwa.

Ashike omupya omunene Cascas omvula ndjoka osipana yoVolcano ya yi moliha oyo wo omvula a lundulukile kosikola yaMweshipandeka na okwa li a wayimine osipana yoYoung Chiefs mo 1992 sigo 1994.

LEAVE A REPLY

Please enter your comment!
Please enter your name here