Uuyogoki owo owala uuwanawa

0
35

Omukunda Ondingwanyama nagu pandulwe, mokuninga gwotango muNamibia moka omuntu ngele a hala okuya kiihwa heshi ningi inaa pumbwa okukala ta lengalenga ngele opena ngoka uuka mpoka eli. Omuntu momukunda nguka ngashingeyi ohayi kondje eli mokandjugo.
Omukunda nguka ogwa ulike kutya okukala nokandjugo ina shi pumbwa okulongitha oshindji nenge oshinima shina ondilo. Osha pumbwa ashike eitulemo osho wo okulongitha ondunge mokulongitha iinima mbyoka tayi adhika momudhingoloko.

Momukunda nguka aantu oya fulu uundjugo wiilambo, taya longitha iinima ya yoolokathana okuninga omitumba dhuundjugo wawo, ngaashi oodoloma nenge omatiyela omakulu giihauto. Oya tula iikwatelwa yomeya popepi nuundjugo okuyoga omake gawo. Aanona aashona nayo ohaya longwa omukalo nguka omwaanawa guuyogoki.

Eeno, otu uvite ko kutya aantu oyendji moNamibia ohaa longitha iihwa onga oyo uundjugo. Ooperesenda ashike 34 dhoshigwana shaantu oomilliona 2.3 odho dhina uundjugo nuuyogoki moshinima shika wuli nawa.

Komahala gokomikunda onkalo ndjika oya dhigupala oshoka ooperesenda ashike pokati 17 sigo 22 dhaaNamibia oyo haya longitha uundjugo oku ekelahi iiyekelwahi, omanga ooperesenda 46.5 dhaanamikunda natango ohadhi yi kondje miihwa.

Shino kashi shi oshinima oshiwanawa nando. Oshoka onyata ndjoka ya thigwa miihwa, inaayi fumvikwa nenge inaa yi filwa, ohayi vulu okweetela oongombe omikithi. Omwiidhi sho tagu ka mena otagu ka kala guna oombakiteli dha thigwa po konyata yaantu. Iimuna sho tayi ka lithwa otayi ka lya omwiidhi guna oombakiteli ndhoka. Shino ohashi eta nee omukithi ngoka hagu kala monyama yiimuna, ngaashi oongombe.

Ndele ngele ongombe oya dhipagelwa oshituthi nenge ngaa aantu ya elele mo, onyama ndjono ota yi vulu okweetela aantu omukithi,
nethimbo limwe eso nokuli.

Uuyogoki owo owala oshinima oshiwana. Aanamikunda yamwe nayi ilongeleko, e taa tameke nale okutunga uundjugo. Na tu ka leni nuuyogoki yakwetu.

LEAVE A REPLY

Please enter your comment!
Please enter your name here