Ya pewa iiti yoku dhika oomanga kuKansela

0
47

Loide Jason

ELIM-Kansela gwoshikandjohogololo shaElim okwa kumagidha oshigwana shaamoka opo shi kwate nawa omaliko goshigwana unene tuu sho ngaka ga pumba noonkondo.

Gerhard Shiimi okwa ningi ekumagidho ndika omasiku ga piti pethimbo lyegandjo lyomiti nenge oopala 226 dhoku dhikitha iigunda nenge oomanga moka hamu wendelwa oongombe moshikandjohogololo she.

Oopaala ndhika odho ku tungitha iigunda yomayalulo nomatuntilo goongombe pethimbo lyomatuntilo giimuna moshikandjo shaElim.
Okwa ti sigo oompaka moshikandjo she omuna iigunda nenge oomanga 17 na ope na ashike omahala gane ogo gaa na iigunda yoongombe yopashinanena moElim.

“Iigunda yoongombe mbika oyeni. Onkene se ni oshimpwiyu kutya ita yi yonagulwa.Oshoka ngele oya yonagululwa one tamu ka mona iihuna sho kaa mu na mpoka tamu tuntilile iimuna yeni. Ndele kali shi epangelo olyo andola tali mono iihuna moshinima shika,” osho e ya dhimbulutha.

Okwe ya pe ethaneko kutya opo ya yande uufuthi woopaala ndhika, oshiwanawa ngele oye dhi ndhindhilike opo uuna dha yakwa po dhi vule okumonika nuupu.

Okwa dhimbulutha oshigwana opo aluhe shi kale hashi pandula unene tuu uuna epangelo lye shi longela sha, na oshigwana oshina okusila nawa oshimpiwyu omayakulo ngoka ga gandjwa kepangelo.

“Se ni oshimpwiyu kutya otamu kaleke po nawa iikwatha mbika yoshigwana. Ngele omwa mono omuntu ta yaka po iinima mbika nenge teyi yonagula mu lopoteni mbala ngaashi tashi vulika,” kansela a galikana.

Okwa ti mokugandja omiti dhoku dhikitha oomanga ndhika ewiliko lyoshitopolwa olya hala okushonopeka oshinano shoka aaniimuna haya ende okufala iinamwenyo yawo koomanga yi ka tuntilwe. Okwa ti uuna iigunda ayihe ya dhikwa iinano mbyoka iimuna tayi kala hayi ende otayi kala ashike yi thike lwopookilometa ntano.

‘Otwa hala ishewe okushonopeka eudhililo lyiimuna poomanga dhimwe. Ngashingeyi aaniimuna otaya kala ashike haya ende oshinano shookilometa ntano pehala lyoku enda ookilometa omulongo okuya komanga yopopepi ngaashi osho sha kala shi igililwa monakuziwa,” osho a uvaneke.

Oopaala niilongitho yilwe yokutunga po oomanga ndhika oya landwa niimaliwa ya zi moshiketha shanakulya osha nakulonga moshitopolwa.
Sem Amutenya ngoka a taamba omakwatho ngaka pehala lyaaniimuna ooyakwawo okwa pandula ewiliko lyoshitopolwa omolwa etokolo lyalyo okupa aanangombe iitungithi yoomanga, oshoka mbaka oya ningi ethimbo ele ya tegelela shika shi ningwe.
Okwa uvaneke kutya yo otaya ka kambadhala ngaashi taya vulu opo ya kaleke po oomanga ndhika monkalo yili nawa aluhe.

LEAVE A REPLY

Please enter your comment!
Please enter your name here