Young Chiefs okwiidheulila ekopi lyoDeb Marine

0
36

Shipi Elago

OSHAKATI-Young Chiefs ‘Amathekie’ okwa li a manitha omaidheulo ge nawa omanga ina idhenga ondjila okuya koshilongo shoongombe hoka edhingoloko lyoosipana hetatu ndhoka dha hupa mo mekopi ndika inaa li ka tameka Olyomakaya pokapale ka Legare Stadium Gobabis.
Pethimbo Kundana a li a talelepo okapale ka B, ke li konima yokapale koIndependence mOshakati, osipana ndjika oya li yi ipyakidhila nomadhewo kaakuna we kohi yomudheuli gwayo Fillemon Cascas Angula ngoka a li eetwa mo okuza petameko lyomvula opo a kwathele osipana mekopi ndika.

Young Chiefs okwa li wo a yi momadhewo nosipana yOngwediva City iikando iyali moka ya li ya dhengwa lumwe noku dhana shithike pamwe.
Sho twa li moonkundathana na Hafeni Shikulo, a tseyika nawa Maniki, okwa li a holola kutya osipana oya etamo iipala iipe mosipana naashika osha yelutha po ombepo yomaudhano moYoung Chiefs. Maniki okwa ti kehe gumwe okwa nyanyukwa ombepo oyi li pombanda na otwa hala esindano.

Ngele Young Chiefs okuna ompito yoku vena ekopi enene moshilongo nena okuna oku shi ninga nuumvo unene tu sho omasipa omanene itaa ga kutha ombinga muudhano mbuka, onkene okuna okuninga ashihe shoka ta vulu opo a etele oshigwana sho koNooli shoka a kalelapo naashoka sha kala ethimbo ele inaa shi mona nando ekopi enene moshilongo.

Kepulo kutya olye naanaa omudheuli gwoYoung Chiefs, Maniki okwa li a yolo nokutya: “Ngaashi tuu twa li twa lombwele iikundaneki kutya Cascas otwe mu eta opo a fale Young Chiefs kekopi lyoDeb Marine cup ekopi ndika inali pwa onkene Cascas oye ta dheula Young Chiefs na oye omudheuli ngashiingeyi.”

Maniki ta tsikileko ta ti Cascas okuna oku mana shoka a tameka ye ote shi enditha nawa nee mekopi ndika onkene ina mu kumwa ngele okwa pewa natango okondalaka yokudheula Young Chiefs konima yekopi.

Kepulo kutya omudheuli gwoYoung Chiefs Alex Iitumba oku li peni Maniki okwa li a yamukula kutya ngele oliha oya tameke elelo lyoYoung Chiefs olina oshindji okutokola onkene payife oyi ipyakidhila nekopi lyo DebMarine Cup ndyoka olyo oshilalakanenwa shayo.
Okapale ka Legare Stadium ngula otaka patululwa ku Mighty Gunners na Try Again, omanga uudhano uutiyali ta wu ka kala pokati ka Tura Magic na Civics wo uudhano uutitatu wesiku ta wu ka kala pokati kosipana yo Young African ndjoka yili megumbo noRundu Chiefs.
Omanga uudhano wahugunina molyomakaya ota wu ka kala pokati kosipana yoEastern Chiefs no Young Chiefs.

Omusindani pokati ko Try Again na Mighty Gunners otaa ki ikwata nomusindani pokati ka Civics na Tura Magic mosemifinal yotango, omanga omusindani pokati ka Rundu Chiefs na Young African ta ka kwata omusindani pokati kuudhano wo Young Chiefs no Eastern Chiefs.
Kehe osipana tayi kutha ombinga otayi ka pewa okapandi koodola 20 000 yolweendo nosho wo ikutu yetanga.

Oosipana ndhoka tadhi kaya ke dhingoloko lyalandulako otadhi ka pewa okapandi ko 30 000 yolweendo.
Oondjila adhihe nadhi thinde koGobabis ehuliloshiwike ndika.

LEAVE A REPLY

Please enter your comment!
Please enter your name here