Aakiintu aaIndia ihaya ithana aalume yawo komadhina

0
546

Mo India aakiintu inaya pitikwa okutumbula aasamane yawo komadhina. Aakiintu oomilliona moIndia kaye na esiku ya longithile omadhina gaasamane yawo –nguka ogwo omukalo gwoku ya simaneka. Omukalo nguka ohagu landulwa lela lela miitopolwa yokomikunda nonando miilando ihagu landulwa unene. Ngashingeyi aasikumudhi yamwe otaya indile aakiintu momikunda opo wo ye ethepo omukalo nguka.

Omukalo nguka oguli ngaaka molwashoka aantu moIndia ohaya hokana manga yo aashona, okupitila moondjokana ndhoka dha longekidhwa. Aakiintu ohaya hokanithwa omanga aashuushuka ye na omimvo 11 omanga aasamane yawo otaya kala yeli pomimvo 14 no 15.

Uuna omukulukadhi ta popi koyana aluhe oha ithana omusamane gwe ongo oye “babuji” – oshitya shoshiHindu tashi ti “tate” shoka aanona haya longitha ngele taya ithana he. Uuna omukulukadhi ta popi nomusamane shu ukilila oha ti aluhe “Hey ho”, shoka konyala tashi ti “Hey ngwee”.

Shika oshi li ngaaka molwashoka omusamane ota yelekwa naKalunga nomukulukadhi okwa longwa okuza petameko kutya okuna okumu simaneka.

Aakulukadhi ohaya lombwelwa kutya ngele oya ithana aasamane komadhina gawo otashi vulika shi ye etele omipya nenge shi tetule nonkalamwenyo yawo nookuli. Omathimbo gamwe onkalo ndjika ohayi kwatelemo wo iilyo yezimo, niilanduli mbyoka tayi holoka ngele omulandu nguka ogwa taagulukwa. Omukulukadhi gumwe moshitopolwa shokuuzilo wa Orissa okwa taalele egeelo ndyoka lya gandjwa mbala meendelelo nosho wo edhigu. “Esiku limwe suwala yandje yomukiintu okwa pula ngoka a li a kuutumba pondje. Onda tumbula aalumentu ayehe mboka ya li ya kuutumba pondje mwa kwatelwa na yinakulu gomusamne gwandje,” Malati Mahato okwa holola ndhika mofilima ya ndulukwa kehangano lyoku ninga uuvideo hali ithanwa Video Volunteers, ongundu ndjoka tayi kondjo ya hala oku etapo elunduluko moohedhi ndhika.

“Suwala yandje yomukiintu okwa nyenyeta kombinga yoshinima shika e shi tseyithile ewiliko lyomukunda,” ndyoka lya tokola kutya Mahato ina longa shoka shi igililwa na okwa tokolwa opo a tidhwe mo mokati koshigwana.
Okwa tiwa nakale koonkunkulo dhomukunda hoka pamwe noyana uule wethimbo. Oomwedhi 18 dha piti po okwa kala iikalekelwa kaanamuknda ayehe.

“Elandulathano lyopashilumentu ohali longithwa kenganga pomithika dha yoolokathana,” pahapu dhomunanwino miinima yonkalathano. “Omusamane okwa talika ko a fa oye kalunga onkene okuna okusimanekwa.

Pamikalo dhomaudhano omakulu ye okwa za mongundu yaantu yeli pombanda na oha kwathele omukulukadhi gwe pamahupilo, kokutya ye oye mwene gwomukiintu gwe. Na aluhe oye omukuluntu koomvula onkene okuna okusimanekwa.

Ehangano lyedhina Video Volunteers ngashingeyi olya tameka iikonga momikunda momahala gokomikunda oku kumika mboka opo ye ethepo oohedhi ndhoka dhaalumentu oyo aluhe taya pangele.

Kotoba gwa yi, Rohini Pawar, omwiiyambi momukunda guli popepi noshilando Pune okwa popile kombinga yoshinima shokwaatumbula omadhina gaasamane poonkundathana dhaakiintu momukunda gwawo.

Ndele omanga inee shi ninga, okwa li a tokola kutya ote ke shi kambadhala ye mwene. Pawar okwa lombwele BBC kutya okwa li a hokanwa pomimvo 15 mondjokana yomimvo konyala 16 ndele kena esiku iithanene omusamane gwe Prakash.
“Aluhe onda kala noku mu ithana molwashoka omumwayina gona okwa kala he mu ithana ngaaka.Nenge ndi tye ‘baba’. Nenge ohandi ti ashike ‘aaho’ (‘ngweye)’ Melaka lyoshi Marathi opo a pulakene ndje.”
Moonkundathana ndhika aakiintu oya li ya nyanyukilwa edhiladhilo ndika.

“Otwali tu uvite nawa. Twa kala tatu yolo olundji esiku ndyoka. Lwotango monkalamwenyo dhetu otwa li tatu igidha omadhina gaalumentu yetu,” osho Pawar, a popi ye ti iyolitha.

“Otwa tokola okuninga okavideo na otwa pula aakiintu opo ya popye oshinima shika momikalo ndatu, ya nyanyukwa, ya geya osho wo taye shi ningi nohole.”

“Omukiintu gumwe okwa li a nyanyukwa unene onkene sho a thiki megumbo noku mona mwene okwe mu igidha kedhina, ihe nguka okwe mu pe enkawa enene. Okwe mu lombwele wo kutya ngele okwe shi yeleke ishewe oku mu tumbula kedhina ote ke mu dhenga lela,” Pawar a ti.
Miilando yomoIndia, ethimbo sho tali piti aakulukadhi oya tameka oku ithana aalumentu yawo komadhina. Sho aakiintu oyendji taya tseya okulesha noku shanga, yo yendji ohaya longo ohole noondjokana otadhi pingenepo oondjokana dha longekidhwa, nomikalo omikulu ndhika odha ninga omikulu noonkondo.

Sho twa hokana nomusamane gwandje, ye okwa li omuniilonga omukwetu. Onda li handi mu ithana kedhina lye.Onkene kasha li tashi ti sha okukala inaandi mu ithana kedhina lye.
Ihe shika ohashi ningwa ashike momagumbo omashona gaa India.

“Aakiintu ashike mboka ya longwa oyo haya ithana aalumentu yawo komadhina,” osho a ti.
“Itashi vulu okudhiladhilwa natango kaakulukadhi omamilliona ogendji komikunda moIndia nosho wo momagumbo gaamboka yonkulu yonale kutya omufuko omupe ota ithana omusamane gwe kedhina, oshoka ota gandwa mbala kuyinamweno nenge kaakiintu yamwe aakuluntu kuye.”
Rohini Pawar okwa ti, okutalika ko nongeyo nonuutondwe sho ye itaa landula we omikalo omikulu okwe mu kumike opo a tsikile oonkambadhala dhoku lundulula onkalo ndjika.

“Owu wete elunduluko kali shi oshinima oshipu. Aantu ohaya pula kutya omolwashike sha simana okulongitha omadhina gawo, oshike ando sha simana mwaashoka?” Osho ati.

“Otandi dhiladhila sigo uuna ndoka twa palamene iinima mbyoka iishona, nena otatu vulu wo okupalamena mbyoka iinene noya simana, Osho a ti. Osha fa onkatu oshona ndeIe ndjika onkatu yotango, yo onkatu yotango oyo aluhe onkatu onene. – Shino osha nyolwa kuGeeta Pandey, omutoolinkundana gwoBBC mo Delhi, India.

LEAVE A REPLY

Please enter your comment!
Please enter your name here