Eefikola odo nadi tulwe tete olusheno

0
103

Komutoolinghundana

EENHANA-Eekansela adishe moikandjohoololo 12 moshitukulwa shaHangwena, oda twa kumwe opo eefikola di na ongudu onhi-10 di pewe tete olusheno ngee tali yandjwa ponhele yonhumba. Etwokumwe eli ola shiivifwa kuNgolonea woshitukulwa shaHangwena Usko Nghaamwa pefimbo a popifa oshiwana kombinga yonkalo yoshitukulwa shaye pEenhana.

Ovakwateli komesho voikandjohoololo moshitukulwa eshi ova udafana kutya osha fimana opo una taku yandjwa olusheno pomukunda wonhumba kutalike tete ngeenge opena ofikola inaayi tulwa olusheno oyo itulwe tete olusheno.

Ngolonea Nghaamwa okwa fatulula kutya etokolo laaveshe ola kufwa kwa talika komumbwe yolusheno, opo ovakulunhu veefikola va dule kuninga eekopi deembapila peefikola davo shama da pewa olusheno. Omutse woshitukulwa okwa popya kutya omuvalu wovanafikola moshitukulwa osho owa kula nopaife owa fikama povanafikola 100 042, omanga omuvalu wefikola djapo po 253, noku ya peefikola. Dimwe domeefikola dipe da tungwa ongaashi Veikko Nekundi moshikandjolongo shaPembe, Saint Michael Vision Private School modoolopa yaEenhana, Brains On i li modoolopa Ohangwena oshoyo Ervester Education Centre pOmafo modoolopa yaHelao Nafidi.

Omukalelipo wepangelo moshitukulwa shaHangwena okwa ti, etokolo leekansela ola kumikwa koidjemo yongudu-10 moshitukulwa yomudo 2015/16 ya li peepelesenta 53.68 neepelesenda 58.85 noshitukulwa osha li ponomola onhine mepito mograde 10 moshilongo ashishe.

Ngolonea Nghaamwa ota ti, elelo ola hala Ohangwena yuuye ponomola yotete mepito meendondo adishe 10 noshoyo 12. Eefikola da pita nawa moshitukulwa odo: Eengedjo Secondary School, Onangolo Combined School, Oshamukweni Combined School nElundu Combined School da fikifa oshitukulwa ponomola onine mepito. Ngolonea Nghaamwa okwa tumbula kutya, momudo woimaliwa 2017/18 epangelo ola faneka okulongifa eemiliyona N$ 28, 3 okuweda po omatungo peefikola moikandjohoololo ya yooloka moshitukulwa. Okwa weda po kutya, epangelo ola tala kutya oshikondo shehongo oshimwe shomoikondo i na kufilwa oshisho tete ngeenge taku tukulwa omutengenekwafaneko koikondo ya yooloka.

Oshitukulwa eshi oshiyadi omashongo kombinga yelongo, oluhepo, omhumbwe yomayakulo omakwatafano, oimbuluma, novanyasha vahapu moikandjohoololo Oshikunde, Omundaungilo, Epembe nOkongo kave na oilonga.

LEAVE A REPLY

Please enter your comment!
Please enter your name here