Ehenye lyasindanapo uudhano wErundu wokomumvo

0
28

Shipi Elago

OSHAKATI-Uudhano wokomumvo wuunona uushona mboka hawu unganekwa kosikola Erundu mOshakati ongoshitopolwa shomapendulepo gomaudhano mokati kaanona aashona owa li wa nana konyala oosikola 8 okuza mOshakati nOngwediva.
Oprima yEhenye mOshakati oya li ya ulikile oosikola oonkwawo kutya yo iha yi dhana ngele otashi ya pomaudhano konima sho ya sindana po omakopi agehe lyoNetball nolyokatanga kokoompadhi.

Erundu ndyoka lya li megumbo olya li lyi iyadha tali yalula oonyothi pehala etiyali muudhano awuhe konima sho lya li lya hakele mendangalati Ehenye.

Oosikola ndhika mbali odhina ondjokonona ngele otashi ya kotonamende ndjika ya li ya totwa konima yomimvo ne ngashingeyi na oya kala hayi dhanwa kehe omumvo oku za kesiku ndyoka.

Ehenye olya li lya toolapo omakopi agehe nosho wo oombandi dhoshingoli omanga Erundu lya li lya hekelekwa noombandi dhoshisiliveli.
Omukwateli komeho guudhano mbuka Anna-Marry Amadhila okwa holola kutya kaya li yena oondjambi dhoshimaliwa oshoka pamilandu uunona uushona ina wu pitikwa okudhanena oshimaliwa oshoka osha talikako hashi teyapo ombepo yuudhano muunona, oshoka ohawu kala ashike wa tala miimaliwa pehala lyokuhumitha komeho uunongo wawo.

Okwa ti oshikondo sho Junior Primary posikola Erundu oshina oshinakugwanithwa okuzula uunona manga wuli pethimbo lyomimvo dhopetameko lela oshoka oyi itaala kutya okanona oha ka zulwa manga okashona.

Uudhano mbuka owa li weya pethimbo ewaanawa sho omudheuli gwosipana yOshana ndjoka hayi kalelepo oshitopolwa eli metifa lyokuhogolola uumatyona mboka a hala okumuna opo moomvula ne dhi li komeho owo wu ka kuthe ombinga mekopi ndika nosho wo mwaandyoka lyoSkopion Zinc hali dhanwa kuumatyona wu li kohi yomimvo 17.

Omudhewuli okwa ti okwa tala omeho moosikola dhomoshitopolwa opo dhi mu pe uunona mboka wuna iitalenti mokatanga kokoompadhi wo wu tale ngele otawu mono omahala mosipana ndjika.

LEAVE A REPLY

Please enter your comment!
Please enter your name here