Endjala a taamba iilyo yopaliamende mOmusati

0
858

Loide Jason

OUTAPI-Ongundu yiilyo yopaliamende oya talele po oshitopolwa shaMusati okukundathana elongitho lyuutekinilohi.
Osheendo shoka shali sha kwatelwa komeho komunashipundi gwongundu ndjoka yi na sha nuutekinolohi nuunongononi oyali ya tamekele mombelewa yaNgoloneya goshitopolwa shoka Erginus Endjala.

Sho eya tambaako oshiwike shika Endjala okwa ti osha simana opo aanasikola ya longwe uutekinolohi manga yeli poondondo dhopevi lela.
Okwa ti ngele aanona mbaka oya putudhilwa elongo lyuunongononi nena oshilongo otashi kala oshiyamba muunongononi na kapuna we ngoka taka thigala po.

“Oshiholelwa otuna omugundjuka ngoka ali a nduluka ondhila mOutapi muka ihe ngashingeyi ondhila ndjoka otayi gongele ontsi oshoka kapuna kutya otayi humithwa komesho ngiini,” Endjala osho ati ngaaka omanga a eta olukeno.

Omutse gwoshitopolwa shoka ogwa tsikileko gwa ti aanona mbaka ngele oya longwa uunongononi okuza kondondo yotango nena sho taya kaya kiiputudhilo yopombanda oya pyokoka.

Okwa ti uunongononi otawu tula oshilongo pondondo yili nawa ngele tashiya kehumo komeho.
Omunashipundi gwaatotimpango Faustina Caley okwa ti elalakano lyawo lyokutalela po oshitopolwa shika okutala nkene ooprojeka ndhoka dhali dha talelwa po omumvo 2015 odhina ngaa elunduluko ngele tashi ya puutekinolohi.

Okwa ti ongundu ndjika ya totwa momumvo 2010 oyi na iilyo yopaliamende 14, yaza koongundu dhopolitika dhayooloka.
“Iilyo oyindji mbika iipe na oyi na natango oku ilonga oshindji opo yi vule okugwanitha po iilonga mbyoka yi inekelelwa moparliamente,” Caley a ti ngaaka.

Osheendo shika osha ti ehuku lyetalelo po lyawo opo iilyo iipe yopaliamende yi vule oku kala ya tseya shoka tashi inyenge moshitopolwa shi na sha nuunongononi. “Iilyo mbika oya pumbwa woo ishewe okukala ya tseya oombelewa nosho wo omandiki ngoka taga longitha uutekinolohi mwa kwatelwa ombelewa yomauyelele nosho wo omakwatathano gopautekinolohi,” osho Caley ati ngaaka. Okwa ti yo otaya tala woo nkene omusindalandu guutekinolohi gwa tulwa miilonga moosikola nomomahangano ngoka ga pumbwa okulongitha uunongononi. Otaya tala woo nkene aantu taya longitha uunongononi na aantu yethike peni yena ontseyo moku longitha uunongononi.

Ashike Caley okwa ti mboka haya longitha uunongononi oye li pondondo ombwaanawa tayi hokitha. Aanapolitika mbaka oyali woo ya talele po osikola yopaumwene yedhina Vision Private School moka muna ashike omulongi gumwe oye awike e na uunongo wokulongitha uutekinolohi.

Ongundu ndjika otayi ka talela po wo oshiputudhilo shaUNAM mOgongo noshowo Namibia University of Science and Technology (NUST) ehuliloshiwike ndika.

LEAVE A REPLY

Please enter your comment!
Please enter your name here