Ethigathano lyuudhano waShingwadja olyali ewanawa

0
33

Maria Namupala

OSHIGAMBO-Oosikola dhaza miikandjolongo ya yoolooka mOshikoto nOhangwena nonuumvo odha kuthile ombinga methigathano lyuudhano hawu ithanwa Shingwadja School Sports Tournament.

Uudhano mbuka owa tamekele mehuliloshiwike lyomasiku 22-23 Juli nuumvo, ashike molwaasho oosikola odhali odhindji inaya vula okuwu manitha, nowapu ehulilo shiwike ndika lya ziko wa dhanenwa pOshigambo.

Gumwe gomaalongekidhi yuudhano mbuka nokuli omukuluntuskola posikola pOnamutemo Sem Pola okwa ti uudhano mbuka owa dhanenwe lwotango mo 1999, nowa lukilwa Temus Shingwadja ngoka a tseyika nawa omuholi guudhano koombinga hoka.

“Uudhano wonuumvo owa li uuwanawa okuyelekanitha no woomvula dha piti. Ohatu dhana ngaashi etanga lyokoompadhi osho wo etanga lyaakadhona lyomokambamba, oosikola odhindji odhu ulike eitulemo nohokwe ydho, naashino oshe tu kumike tu tsikile natango,” Pola ta ti.

Nuumvo uudhano mbuka owa hili oosipana noosikola dhili 20 dha za miikandjolongo ngaashi Onathinge, Onamutai, Eenhana, Oshigambo, Ongha, Olukonda nOndobe.

Pola ta gwedhapo kutya oosikola odhindji odha gandja etsomukumo muudhano, nodha ulike kutya odha hala okukala tadhi kutha ombinga aluhe.

“Opo tu lukile Shingwadja uudhano mbuka otwa mono kutya oye iitulamo mokugandja omakwatho nomayambidhidho muudhano nomomukokomoko goomvula adhihe ndhoka dha piti pamwe woo negumbo lye alihe, okwali a landa omakopi nokugandja oshimaliwa koosipana ndhoka dha sindana.”

Etanga lyokoompadhi osho wo ndyoka lyomokambamba ogali ga topolwa moongundu mbali, mono oosikola dhopevi dhi idhane, naandhoka dhooCombined noSecondary nadho dhi idhanene, mo mu tothwe ndjoka oyo enyakwa.

Koosikola dhopevi metanga lyokoompadhi Oniipa oyali ye ya yotango noya sindana ekopi noshimaliwa shooN$1 100. Oshigambo osheya puutiyali noya pewa N$900 omanga Shatiwa ya sindana N$700.

Omanga moosikola dhooCombined Otunganga ye ya yotango noya sindana ekopi nooN$1 350, Oshigambo High osheya puutiyali nosha mono N$1 150 omanga Omukwiyu gwemanya gwa etelele okano noya mono N$850.

Ketanga lyomokambamba poosikola dhopevi Oshigambo osheya ponkatu yotango noya sindana ekopi noshimaliwa shooN$950, Amupapala okweya puutiyali nokwa mono N$700 omanga Okalunga ka pewa N$600. Koosikola dhooCombined muudhano mbuka Otunganga oya dhengemo adhihe noya sindana ekopi nooN$1 150 nomumvo gwaziko oyo yali ya sindanapo ekopi olyo tuu ndyoka. Onamutemo oyeya puutiyali noya pewa N$850, omanga Okatale ka mono 650.

Shingwadja ngono oye mwene guudhano okwa holola kutya uudhano wawo owe enda nawa noyena omathaneko omanene opo ya tale kutya uudhano otaye wu yambulapo ngiini.

Okwa indile oosikola dhi kuthe ombinga momaudhano goludhi nduka, yo ya kale taya unganeke uudhano nga mbuka moosikola dhawo yo taya hiya oosikola dhopuushinda dhi thigathanepo. Ta ti shino otashi tungu omalutu guunona go ga kale gena oonkondo noga kola.

LEAVE A REPLY

Please enter your comment!
Please enter your name here