Freeda ta ka nyanyudha moCoke Studio

0
37

Komutoolinkundana

Namibia okwa gwedhwa kiilongo mbyoka omusiki yayo tayi ka dhanwa moCoke Studio Africa 2017, ndjika oya mangela kumwe Coke Studio South Africa naCoke Studio Africa. Ehengumukilo mumwe ndika olya indjipaleke iilongo mbyoka hayi kutha ombinga moshinyangadhalwa shomainyanyudho shika sigo opiilongo 16 okuza piilongo 11 moshiluku sha zi ko.

Olweetho nduka otalu ka tumwa mombepo miilonga yi vule 30 muAfrika alihe. Okunduluka po omusika ndjika okwa kwatela mo oonkulungu dha za kiilongo ngaashi Namibia, Zimbabwe, Rwanda, Angola, Togo, Madagascar, Mauritius, Kenya, Uganda, Tanzania, Nigeria, Ghana, Mozambique, DRC, Ethiopia, na Cameroon.

Oonkulungu ndhoka dha tseyika nawa moongalo odha kwatela mo ngaashi omwiimbi omuNambia Freeda osho wo, Khaligraph Jones & Band Becca yoko Kenya, Rayvanny, Izzo Bizness, Nandy omuTanzania, Sami Dan omuEthiopia, Thebe Cool, Eddy Kenzo na Sheebah, Ykee Benda ya kalelapo Uganda, Nasty C, Busiswa, Mashayabhuqe aaSouth Africa, Youssoupha gokoDemocratic Republik ya Kongo, Runtown , Jah Prayzah omuZimbabwe na Yemi omuNigeria.

Oongalo dha dhanenwe mopolohalama ndjika omumvo gwayi odha li ashike dha zi koonkulungu dhiilongo ngaashi Kenya, Uganda, Tanzania, Nigeria, Ghana, Mozambique, DRC, Ethiopia, Cameroon, Cote d’ Ivoire, Togo na Zimbabwe omanga South Africa okwa li a longekidha omainyanyudho ngaka ge mwene kohi yoCoke Studio South Africa.

“Coke Studio Africa oha ulike omusika yAfrika ndjoka ombwaanawa kwaanawe ya za koonkulungu dha yooloka osho wo momifango dha yooloka okukumika aapulakeni yomusika yoshiAfrika aape. Menenepeko lyomauliko ngaka otatu mwenyeke enenevi ndika tashi pitile metulomumwe lyomusika nomithigululwa kalo, okutyapula omayooloko getu gopahedhi,” osho Monali Shah, Omuwiliki Omukuluntu gwoshikalimo gwa Coca-Cola Muumbugantu osho wo mUuzilo wAfrika na oye wo omudirekta gwo Coke Studio Africa Project a ti.

Komusholondondo okwa gwedhwa wo Dji Tafinha omuAngola, Laura Beg omuMauritius, na Slapdee a za koCentral Africa Republic, Bisa Kdei na Worlasi a za koGhana, Betty G gokoEthiopia, Bruce Melodie, Shellsy Baronet & Mr. Bow aaMozambique, Denise omuMadagascar na Ozane gokoTogo.

Aanduluki aanamadhina nuumvo oyo mboka ya tseyika nawa ngaashi Yuvir Pillay Nivedan a.k.a Sketchy Bongo gokoSouth Africa, Kiff No beat omuIvory Coast, Nahreel omuTanzania mokati koyendji ya tegelelwa. Coke Studio Africa elongelokumwe lyopamusika lyaa shi lyopathigathano, ndika ota li kongo oku eta pamwe nokutyapula omaludhi ga yooloka gomusika yaAfrika osho wo iitalendi ye. Oha gandja wo ompito koonkulungu momusiki oompe moAfrika opo dhi longe pamwe noonkulungu oonamadhina menenevi osho wo dhilwe dhokiilongo yopondje. Oshiithanene shika ohashi eta pamwe oomusiki dhomifango nomangengulo ga yoolokathana osho wo ndjoka ya za pomathimbo ga yoolokathana, kiitopolwa ya yoolokathana oku etapo omusiki yoshili yoshiAfrika osho wo ndjoka yopashinanena okupitila metulomumwe lyopamusika.

Coke Studio Africa 2017 okwa tegelelwa oku ulikwa mombepo okuza muAuguste mUumbugantu nomokati kAfrika, omanga Afrika lyokuuzilo naandyoka lyokuuninginino opolohalama ndjika otayi ulikwa okuza momwedhi tu uka. Mo Namibia opolohalama yuule wowili yimwe otayi ulikwa koTV yaOne Africa TV Olyomakaya kehe potundi 18h00 uule wiiwike 11.

“Omusika oyo etuno lyomutima nombepo yiigwana ya yooloka muAfrika. Okuza ku Bongo, sigo Kwaito,okuya ko Lingala nomifango dhilwe muAfrika, Coke Studio Africa ota kwathele okufala omusika ndjika ya yoolokathana kiigwana yilwe hoka ndjika inaa yi uvika ko nale omanga ta tsikile okulongitha omusika okutunga oshilimbo shika,” Shah osho a ti.

Ngaashi ashike sha ningwa miiluku ya zi ko, Coke Studio okwa hala okufala omusika yoshiAfrica osho wo iitalendi yomusiki menenevi kaapulakeni oyendji tashi pitile mokulongelakumwe mokati kaahiki yomusika nopethimbo olyo tuu ndika ota tungu oshilimbo she noku shi koleka opo shi hokiwe kaagundjuka aaAfrika mboka oyo oshigwana oshilandi shokomongula.

Africa okuna iitalendi iinene moshigwana, miilando nomiilongo, onkene, Coke Studio Africa ota vulu okugandja ompito kwaambaka opo oomusiki dhawo dhi uvike kokule nokokule menenevi.

“Omusiki oya kala aluhe edhengo netuno lyomutima gwa Afrika, ndele nee oInternet, omakwatathano gopankalathano otaga taandeleke omusiki yoonkulungu ndhika okuya komakule nomakule naashika osho etompelo sho Coke Studio Africa ta yambidhidha aahikingalo noonkulungu dhilwe,” Tamar Mbalo , Market Activations Manager, BLNS a ti.

LEAVE A REPLY

Please enter your comment!
Please enter your name here