Moshitila Mwa Z’Ondjupa: Iilonga yandje yokweelufuna puMartin Nambili

0
119

Ngaashi nde shi hokolola metetekelo kutya , miilonga yaHaiveleka manga inaandi lundululilwa kokuninga otee yaahona, otwa li hatu longo nokupingathana, ooskofa mbali. Oskofa yimwe otayi longo omutenya oshiwike shimwe, omanga onkwawo tayi longo uusiku oshiwike shoka. Iilonga mbika yopaskofa oya li ya pe ndje ompito ombwanawa, yokulonga iilonga yokweelufuna. Esiku limwe onda yi ndi ka konge iilonga pomusamane Martin Nambili, ngoka a li e na iilonga yokutholoma oondhopi, nokwa zimine ndje.

Elalakano lyoku ka konga iilonga puNambili olya li okugwedha poshimaliwa shandje shoka nda li handi kwata muHaiveleka, opo uuna tandi ka shuna kegumbo, otandi shuna ngaa nda manga sha kola. Onda li nduno handi ningi, oshiwike shandje shokulonga uusiku shampa she ya, omutenya ngame otandi ka longa nduno kuMartin Nambili. Omusamane Martin Nambili nguno tandi popi mpano oye ngaa ngu a li ha ningi oondhopi dha Bantu Belehegings Korporasie [BBK], shoBBK a li ta tungu Oshakati tango. Martin Nambili, okwa li ha pewa Oosamende ku BBK, Ta ningi oondhopi ye ta futwa. Omagumbo ogendji mOshakati oga tungwa noondhopi ndhoka a tholoma.

Pethimbo ndiyaka nda li tandi longo koMbaye, Martin Nambili, okwa li ishewe nduno e na euvathano lyokutholoma oondhopi kOmbaye. Uuna nduno ndi na olufo lwokulonga uusiku, opo nduno nda kala handi longo puye pethimbo lyomutenya. Ngaashi nde shi popi metetekelo, elalakano lyandje lyokulonga puNamibi, olya li okwiigwedhela ko okamaliwa pwaambyoka handi kwata kondjambi yandje ya Muni.

Omukulugwonale ndishi okwa tile: “Mutumba ethete” odhoshili. Okulonga kwandje puMartin Nambili, okwa li ku nine ndje omupondo. Pomusamane Nambili, otwa li hatu longo po tu li yatatu. Mesiku, otwa li hatu tholoma oondhopi omayovi gatano. Omusamane Martin, okwa li he tu futu othilinga moondhopi eyovi limwe. Moondhopi omayovi gatano, otwa li hatu futwa iithilinga itano mesiku.Kiilonga yandje yoHaiveleka onda longele othilinga notiki mesiku.

Komwedhi onda li handi kwata oponda nomulongo.Uuna tandi longo uusiku muHaiveleka, owa li nduno ho adha mesiku limwe ndina othilinga notiki kiilonga yetu yaHaiveleka, kwa gwedhwa iithilinga itano ya za mokutholoma oondhopi. Muule woowili omilongo mbali nane, mondjato yandje owa li to adha ndi na mo iithilinga ihamano notiki. Pethimbo ndiyaka onda li ndi na iimaliwa oyindji. Egwopevi lyoshimaliwa shandje komwedhi olya li owala hali holoka uuna nda yi moskofa yomutenya kiilonga yetu yaHaiveleka yokondhalate, oshoka iiwike iyali mbi nda li handi longo omutenya kuHaiveleka, kanda li handi vulu oku ka longa kuMartin Nambili, oshoka oondhopi dhe kadha li hadhi tholomwa uusiku.

Iilonga yokutholoma oondhopi nando onde yi longo pamwe niilonga yandje yesiku kehe, kaya li iidhigu unene, oya li owala shila iidhigu kaantu mba aanyenge. Ethimbo ndyoka omalutu getu oga li wo ga nyashuka nogu udha oonkondo. “Hapoo, otwa li hatu matuka.To tondoka to ka shukula. To dhenge notshipilangi. To mikisa osamende nevi notshuupulo komake, tweendelele.” Shampa oondhopi dha adha omayovi gatano, tse otatu zimbuka.

Shampa nda lala miilonga uusiku, otandi ka dhenga owala oondhopi ndhono, ndele lwopoyimwe nombali mpeya go omayovi gatano oga anda. Ngame otandi yi koshipondoka nokuli ndi ka lale po kashona, opo ndi ka tameke iilonga poheyali yokomatango.

LEAVE A REPLY

Please enter your comment!
Please enter your name here