Swartbooi haye gwotango a kuthwa miilonga – Omupevi Peresidende Iyambo

0
254

Komutoolinkundana

Windhoek-Omupevi-Peresidende Nickey Iyambo oshiwike shika okwa ti ongundu tayi pangele yoSwapo oya longa shafaathana uuna tayi kutha aanambelewa miilonga nekutho miilonnga lyomupevi minista nale gwOshikondo shElundululo lyevi Bernadus Swartbooi haye gwotango oku shi ningwa. Omupevi Peresidende okwa gandja oshiholelwa shOminista nale Yaagundjuka nomaudhano Kazenambo Kazenambo ngoka a li wo a kuthwa miilonga. Omupresidente nale Hifikepunye Pohamba okwa li a hogolola kutya ita kala na Kazenambo ongo ominista moKabinete ke. Etokolo ndika okwa li eli ningi konima sho nguka ali a ningi omipopyo inaadhi tokoka moshigwana. Kazenambo oku li natango oshilyo shopolitburo nongundumutima yoSwapo. Iyambo okwa popi ndhika sho aatoolinkundana ya koneke pwa fa pwaana uuyuki sho ewiliko lySwapo hali kutha yamwe miilonga omanga yamwe ndele yamwe ohaya ethiwa inaaya gumwa, oya li ya tothamo oshinima shaKazenambo ongo oye gumwe gwaamboka ihaa ya gumwa nando.

“Otandi dhiladhila kutya otatu dhimbulukwa Kazenambo okwa li a kuthwa iilonga ye yuuminista omolwomipopyo dhe. Ongominista okwa li a kuthwa miilonga no ina shunwa mo we,” osho Iyambo a ti. Mokuyamukula epulo ndyoka. Poshigongi osho tuu shoka Peresidende Hage Geingob okwa ti okwa li a kambadhala okupotokonona oshikumungu shika, sho a li a indile Swartbooi a gandje ombili ihe nguka okwa ndopa okushi ninga. Geingob okwa ti Swartbooi okwa tindi okugandja ombili konima sho a popi kutya ye iha longo kohi yoMinista yOmavi, Utoni Nujoma. Okwa ti Swartbooi okwa popya iinima oyindji na okwa li a pulwa a gandje ombili unene tuu molwehala moka a popile omipopyo ndhoka, ndele ina pulwa a gandje ombili molwoohapu dhe kombinga yevi. Peresidende okwa ti pehala ndyoka Swartbooi a popile ongominista noshilyo sho Swapo kalya li lyoopala okushi ninga, oshoka okwa li ena okupopya shoka meni lyomalutu gongundu ndjoka.

Pehala lyokugandja ombili Geingob okwa ti Swartbooi okwa ponokele minista.
“Konima yiiwike iyali okwa li ta popi moradio kutya ye ke na esiku ta ka gandja ombili. Kapena omutoolinkundana a pula omapulo. Onkene okulonga pauyuki, onda dhiladhila okumu ithana, oshoka ngiika okwa li ta dhiladhila kutya otatu ungaunga noshikalimo shoshinima.” Ihe nando ongaaka okwe mu shangele ombilive te mu ithana kEgumbo lyEpangelo.

“Sho no ndeya mombelewa onde ya mo nOmupevi Peresidende, Omupilima Minista [Saara Kuungolwa-Amadhila], Ominista yIipambele yOmuperesidente [Frans Kapofi]. Sho nde ya mo, omulumentu okwa li ta pi… onkene onda popi tandi shendjula kutya: ‘Omolwashike wa geya? Hello, walalapo nawa,’” omutse gwoshilongo osho gwa dhimbulukwa. Geingob okwa lombwele Swartbooi kutya ina ithanwa kEgumbo lyEpangelo okugandja ombili komadhiladhilo ge kombinga yevi, oshoka oshinima shoka osho omaipulo gomuntu kehe.. Okwa ti ye okwe mu ithana opo a fatulule kutya omolwashike a tile ye ita longo kohi ya Nujoma nonde mu ulukile ombapila yekuto lye miilonga ndjoka ya tumbula lela kutya iinakugwanithwa ye okukwatha omuulikwa minista.

“Sho nda lesha ombapila ndjoka, ye okwa tameke okuponokela minista miinima yomaludhi ga yooloka. Onkene onda ti mumwameme ngoye owa geya, omolwashike ihoo etha po ashike iilonga? Omolwashike tu na okukala nomuntu ngoka kee uvite ombili? Tse oshilongo sha manguluka. Ngame onda li nda shunithwa pevi noku ethapo iilonga etandi yi. Omolwashike ihoo ethapo ashike iilonga pehala lyokukala wa geya?” Okwa ti okuza mpoka Swartbooi okwa kutha ashike iinima ye ta dhenge po omweelo konima ye eta yi. Geingob okwa ti pethimbo Swartbooi ta popi nongeyo okwa li wo a dhimbwa po ongodhi ye yopeke mombelewa moka a li iithanwa.

LEAVE A REPLY

Please enter your comment!
Please enter your name here