Hustling power eya mondambo noongalo

0
16

Maria Namupala

EENHANA-Ongundu yaahikingalo tayi ithanwa ‘Hustling Power’ oya holokele moshimpungu shomusiki noku yambapaleka osho wo okunenepeka ehogololo ndyoka aaNamibia ye na kombinga yomusiki yoshiNamibia. Aamati mbaka oyo Robby Shipanga, Chicko Nekongo na LaMedu.
Aayimbi mbaka yatatu ohaya imbi oondjimbo dhomitono noonote dha yooloka nenge omifango dha yooloka.

Aamati yatatu mbaka oyomomukunda Omatha moshitopolwa shaHangwena, no yena omadhiladhilo gokwiimba oongalo dhoshiNamibia, itaaya sholola. Oshoka oyi itaala moku yambula po oshitalenti shawo shokuhika oongalo.

“Otwa tameka okuhika oongalo momumvo 2013 pethimbo atuhe twa koneke kutya otuna omadhiladhilo ga faathana. Otwa nwethwamo nawa komuhikingalo a tseyika nawa mokuhika nokwiimba oongalo moshilongo Exit, sho twa kala hatu pulakene oongalo dhe,ndhoka dhe tu kumike opo twi imbe twa manguluka,” omakanda taga holola ngaaka.

Shipanga okwa ti odhindji dhomoongalo dhawo odhokwaito, nodhindji odha kwatelwa mondoolopa yOndagwa poYoung Kasi music production.
“Otwa tameka okukwatitha oongalo momumvo 2016, nonande twa kala tatu imbi mpaka naampeyaka molwa uunkundi nompumbwe yoshimaliwa, inatu vulu okupititha oalbuma yetu yotango, otwa kambadhala sigo twa mono oshimaliwa tu vule okuyi pititha nuumvo,” Shipanga ta ti.
Oya ti omashongo ngoka gopashimaliwa ina ge ya shunitha pevi ando ya hulithepo okwiimba, ashike osheyatsu omukumo molwaashoka anuwa ohaku ti waakambadhala kusindi.. Ongalo yawo oya pitako, netulo miilonga lyawo otali ka ningwa nziya, yo taya nyanyudha aaholi yoongalo dhawo unene mboka yeli monooli yoshilongo.

Oya holola kutya kashishi oshipu okukala omuhikingalo, molwaashoka owa pumbwa iiyemo opo oongalo dhoye dhi pitithwe. Oya uvaneke taya longo neitulemo opo natango okuya pehulilo lyomumvo taguya, ya kale ya pititha oalbuma yawo ontiyali.

Ohaya imbi nokukumika aagundjuka yiiyageke okulonga iilonga yapuka osho wo okukala momapandaanda nokuyaka iinima yaantu, ashike yiilongele kuyo yene, yo taya kambadhala yu ulike iitalenti niipewa mbyoka yena.

Shipanga ota pula aahikingalo aaNamibia ya longele kumwe, yo taya pukululathana nokugunathana nelalakano lyokuyambulapo nokuyela ehangano lyaahikingalo moshilongo. Ta ti ohashi kala oshipu uuna aahikingalo moshilongo taya longele kumwe, nohashi pupaleke oonkalamwenyo dhawo.

‘’Oongalo dhina ongushu no tadhi tungu odho dha pumbiwa, inatu kaleni tatu negathaneni ihe tu itungeni tse tu yambulepo oongalo dhetweni,” ya ti ngaaka.

LEAVE A REPLY

Please enter your comment!
Please enter your name here