Omategelelo mokati kaanasikola eshongo

0
25

Osha pumbiwa opo oshikumungu shomategelelo mokati kaanasikola unene ndhoka dhokomikunda shi longwe nasho.Nuumvo oshifo oshimwayina naKundana, New Era osha kundaneke kutya ope na esimbapalo lili pombanda posikola Onampira, Nkurenkuru osho wo moshitopolwa Omusati.
Oshiwike shika Kundana okwa lopota iiningwanima yomapunda gaanasikola oyindji moshitopolwa Oshikoto. Mbika otayi ulike kutya ope na uupyakadhi mpaka. Naambuka owa pumbwa eitulemo lyaantu ayehe. Haalongi oyo ayeke poosikola ndele naakuluntu wo osho wo aawiliki yopashigwana.Ngaashi sha konekwa, okusimbapala mokati kaanasikola oku na ekwatathano niinima nenge oku na iiyeti oyindji.

Yamwe otaya ti aanasikola komikunda ohaya ningi aasimba nuupu nopomimvo dhopevi molwashoka inaya tseyithilwa nawa kombinga yiilanduli iiwinayi mbyoka hayi etwa koku ninga etegelelo uuna ndoka mbaka ya yi momilalo inaadhi longekidhwa kuyele. Shika osha guma aamati naakadhona.

Ou wete, kaye shi ashike aakadhona oyo ya gumwa koshinima shika, aamati nayo oya gumwa uuna mbaka ya ningi aavali. Moompito dhimwe mbaka oya thiminikwa wo okuthigapo omanongelo noku ka konga iilonga opo ya kwathele oyana.

Onkalo oya dhigupalekwa wo koshinima shaakuluntu mboka inaa itula mo moonkalamwenyo dhaanona yawo, osho wo onkalo yoluhepo olulu.
Oshikwawo ope na aalumentu aawinayi mboka haya heke aanona aashona yomosikola.

Ohaya heke mbaka nomahauto gawo taga adhima taye ya heke wo niinima yuuyuni mbuka ngaashi oongodhi dhopeke, no hugunina ota ye ya pe omategelelo.

Aawiliki moshigwana , aakuluntu, nosho wo oongudhi moshigwana odha pumbwa okugeela aalumentu mbaka ha ya ihumbata momukalo nguka.Itashi vulika momikunda mu pitikwe aalumentu mboka ha ye ya nomahauto taga adhima nosho wo iimaliwa okuya ashike ya heke aanona yaakadhona aashona.

Aalumentu yatya ngaaka otaya yono po oonkalamwenyo dhaanona mboka.
Iikolitha nayo otayi pewa ombedhi miitopolwa yimwe yomoshilongo mono ooyene yuundingosho ihaa ya tidha mo aanasikola moondingosho dhawo moka mwakwatelwa naanona yosikola.

Nonando mwene gokandingosho aanona okuya shi oha pitika mbaka ya nwene omalovu. Uuna aantu ya nwa aanona aashona ohaya ka lola omilalo. Naashika ohashi fala mesimbapalo mokati kaanona opo ya zi mepipi lyomimvo dhomulongo.

LEAVE A REPLY

Please enter your comment!
Please enter your name here