Omukwaniilwa ina yamukula kombili

0
2205

Maria Namupala

ONDANGWA-Omupopiliko gOmukwaniilwa gwOndonga pamwe nOmbala Naeman Amalwa okwa ti, Omukwaniilwa Immanuel Kauluma Elifas ina yamukula natango kombili ndjoka ya gandjwa kuPetrus Shambo Martin oshiwike sha ziko.

Omasiku ga ziko komalungula okwa kala taku inyenge ewi lya kwatwa moka anuwa Martin mwene gwomukunda nale gOkadhimeti ta popi na kuume ke mongodhi, nomoshipopiwa she shoka okwa konekwa ta nyana nokupopila muuwinayi omukwaniilwa, aakombanda osho wo Aandonga yoyene kondandalunde.

Nonande Martin eli oshitenya shomukwaniilwa konima yaambika okwali a kuthwa miilonga, noshilonga shuuleli okwa lombwelwa eshi egeke manga. Oshiwike sha ziko Martin okwali a longekidha oshigongi showina moka ali a mono shoopala opo a gwaye evi ye a ye koongolo a gandje ombili, molwa omanyano ngoka a popya ga nyateka oshilongo nombala.

Moonkundathana ndhoka twa ningi nomupopiliko Amalwa okwa ti nonande Omukwaniilwa uuva kutya Shambo okwa gwaya evi ngaashingeyi, ina vula okutya ko sha manga, ashike otaya kala ya tseyitha eyamukulo lyOmukwaniilwa uuna a popya ko sha.

“Onda hala okushi yelitha mpaka kutya omukwaniilwa okwa lombwelwa kutya Shambo ngoka a nyana oshilongo shaNdonga, okwa gandja ombili ashike sigo oompaka sho tandi popi nangoye ina yamukula ko sha, notwa tega owala eyamukulo lye tse tuli gandje moshigwana,” Amalwa tati.

Shambo ngoka pauyemwene a yelitha kutya okwa kengelelwa molwaashoka sho yali taya popi na kuume ke, oshipopiwa she oshaka andjakana nuuyuni, sho tashi nyana Aandonga nokupopya nayi Omukwaniilwa pamwe noyana.

“Ngame mwene ondeya mpaka okugandja ombili kOmukwaniilwa gwaNdonga, elelo lye alihe, komunyekadhi nezimo lye, aakombanda, naayehe ya gumwa koshipopiwa shandje shoka sha kaka,osho wo ngoka a ngwenyunwa kusho,” Shambo ta ti. Okwa pula edhiminepo lye ta ti ngaashingeyi okwa mona kutya omapopyo ngoka a popya omadhigu, noga nyana unene Ondonga, ta ti ali a vula okuga popya molwaashoka okwali iinekelewla a kale omuleli omwaanawa ngaashi a li a gana, ashike okwa puguma mondjila nokwa taambako epuko lye.

“Nonande kandina oshipala okugandja omayele molwepogolo lyandje, pitikiindje ndi mupe omayele ongOmundonga nomuNamibia. Okwaa uvathana oko kwa kala, nohaku holoka omathimbo nomathimbo, ashike onda hala okumu guna kutya oonkundathana odho kamana, omatukathano, okutuka aakuluntu, okuulathana nayi, okwaa simanekathana, okunwaathana po okutalathana kombanda yoonyala na ayihe iiwinayi inandi yi tumbula mpano itayi tu tungeni onga oshilongo shaNdonga no Namibia ayihe, onkene natu hanganeni muukumwe,” Shambo ta gwedhapo ngaaka.

Shambo ta tsikileko ta ti ye ongomumati gomukwaniilwa oti indile aamati naakadhona yOmukwaniilwa ya simaneke omalombwele ge, yo ya tseye kutya elaka lyomukwaniilwa ihali kondwa, lyo ihali dhinika.
Ti indile aantu ayehe yiitedhulule yo ya kale aluhe nokudhiminathana po mwaayihe mbyoka taya longo ya puka, noyaali pahalo lyaPamba.

Ta ti aantu na ya ye kumwe yo, ngele opwa holoka sha sha puka, naya kuutumbe yo taya kundathana nokukandulapo omukundu ngoka gulipo, nena pamukalo ngoka ota ti otaya pula komeho.

“Onda mono kutya onda teyapo ombili nondeeta omaipumo mumwe , ashike ongame omuntu ndili monyama nomombinzi ihandi yele, ihe onda gwaya evi nonda mona kutya omapuko nda ninga omanene no itandi ke ga endulula we, ondayona, ondapogola, nongashingeyi ote gwaya evi, nakuye oshigongoti,” ta ti.

Shambo omunangeshefa moshimpungu shokutunga omatungo , nopethimbo ndika ehangano lye lyokutunga omagumbo kondando yi li hwepo olya tunga omwaalu omunene gwomagumbo molukanda lwa Nau-aib mOkahandja.

LEAVE A REPLY

Please enter your comment!
Please enter your name here