Oshakati City oya li yimwe yomoosipana hadhi tilika moNamibia

0
21

Shipi Elago

OSHAKATI-Kundana ote ku etele onakuziwa yosipana yOshakati City ndjoka yili yimwe yomoosipana oonkulu moshilongo na oya li onankondo nando pethimbo ndika oya kuka omayego.

Oshakati City oya li ya totwa momumvo 1966, ya totelwa mOshakati noya li ya lukilwa ondoolopa yaShakati oshoka omo ya yambukile.
Nando osipana ndjika oya li shili yi na edhina ngele otashi ya kokatanga kokoompadhi na oya li ya nana aadhani koombinga noombinga opo ya dhanene osipana ndjika methimbo lyongashiingeyi otayi nana nondatu noya tulamo ongela yokonima .

Onakuyiwa yosipana ndjika otayi ende okayenda nampadhi yathinda kuuwinayi, na kapuna omalimbililo ndjika oya pumbwa iinyenga ndunge opo yi galukile ishewe mokati koosipana oonkwawo oonankondo moshilongo.

Nando edhina ndika olya li ha li tilika nale momawudhano pethimbo lyongashiingeyi kapuna osipana hayi tila Oshakati City oshoka ohayi tsuwa nokuutana.

Oya li ya tseyika nawa noshilukadhina Ekondombolo lyaNangombe, na oyina omuzalo gwokambindja okatiligane okambulukweya okatokele niikasino iitiligane, ngele otayi dhanene megumbo, omanga ngele owa adha ta yi dhanene pondje ohayi longitha okambindja okatokele okambulukweya okatiligane niikasino iitiligane.

Ekondombolo lyaNangombe nkene tu lya li lya gu mo moliha yoNPL Namibia Premier League momumvo gwokatanga 2010/2011 sigo okeluwa ndika inayi lyata mo we ompadhi na ita yi ulike omundilo omwaanawa kutya otayi vulu okushuna moliha ndjika.

Osipana pethimbo ndiyaka yali moliha onene oya li ha yi ithanwa FNB Oshakati City molwaashoka oya li hayi mono omakwashilipaleko okuzilila kombaanga yotango yopashigwana.

Osipana ohayi dheulwa kuAbisai Imalwa ngoka ta longo nuudhiginini okutala ngele genongo otaga fe gongombe. Ano olye mwene gwOshakati City ? osipana ndjika oya Benjamin Hauwanga mwene gwoongesefa dho BH Group of Companies.

Pethimbo ndika Oshakati City oyashuna kuudhano womavi hayi dhana moSecond Division yaShana noyili natango tayi nana nondatu oshoka oosipana ta dhi zi konima yayo odha honga nuuniga wEkondombolo owa ninga uufupi.

Oshakati City sho ya kala manga omavi gali omayamba oya li hayi longitha okapale koIndependence Stadium okudhana omaudhano ga yo gomegumbo nenge okapale kEmbandu hoka keli konyala ookilometa 10 okuza mOshakti.

Osipana ndjika oya li yi shiwike nokokadhila onkene ngele ina pu ningwa omalunduluko gasha nena onakuyiwa yayo otayi limbilike.

LEAVE A REPLY

Please enter your comment!
Please enter your name here