Ya dheulilwa esiloshimpwiyu

0
38

Maria Namupala

UUPOPO-Endiki ndyoka hali tonatele nokusila oshimpwiyu aanona yoothigwa naamboka yeli monkalo tayi nyengathana tali ithanwa (SOS), olya dheula aasilishimpwiyu, ya vule okutonatela aanona nawa. Omadheulo ngaka oga ningilwa mOndangwa.

Aakuthimbinga yeli 25 oya dheulwa momadhewo ga lukwa olweendo lwonkalamwenyo. Ngaka oga kwatelwa komeho kuHileni Nashongo, no haga longekidhwa omumvo kehe pomahala ga yooloka. Omukwateli komeho nomukuluntuwiliki momandiki ngaka Helena Nangombe okwa ti elalakano lyawo, oku unganeka omadheulo gaasilishimpwiyu, okukwashilipaleka kutya aasilwashimpwiyu ayehe momagumbo oya tonatelwa nawa.

“Otwa koneke olundji aanona momagumbo yaana esiloshimpwiyu, nopomahala nomagumbo ngoka twa talele po otwa koneke kutya esiloshimpwiyu momagumbo olya pumba mo, naashino ohashi eta aanona ya kale mehalakano, sho inaa ya tonatelwa nawa kaavali yawo,” Nangombe ta ti.

Okwa ti nande aanona oyendji taya putuka naavali yawo momagumbo, aavali oyendji ihaya mono ompito yokutokelwa nokukundathana noyana, yo taye ya pukulula nawa. Oyendji yomaakuluntu mbaka ohaya kala owala anuwa poondingosho yo yaa na ethimbo nomaluvalo gawo.
“Aanona oya pumbwa okusilwa oshimpwiyu nokutonatelwa ethimbo alihe, opo ashike taya vulu okukala mondjila yu uka no tayi tungu, yo ya kale yeshi omaupyakadhi gonkalamwenyo, nongele ya koko uuna ya tsakanekwa komashongo oye shi kutya otaye ga yanda nokuga kondjitha momukalo guni,” ta ti.

Ta ti molwonkalo ndjika osheya thiminike ya dheule aaiyambi mboka taya kala yiitulamo mokutonatela omaluvalo gawo osho wo ga yakwawo, mboka taya puguma mo mondjila. Nangombe okwa holola kutya pendiki lyawo ope na uunona owundji uuthigwa naamboka wuli monkalo ondhigu, tawu tonatelwa kaakuluntu naatonateli haya tala aluhe kutya owa mona iipalutha nowuli metonatelo ewanawa.
Aakuthimbinga mboka otaya kala nokusila oshimpwiyu aanona osho wo okuya tekula pamukalo omwaanawa noku ya ulukila ondjila ndjoka ye na okulandula.

Oyendji mboka ya dheulwa oya holola enyanyu lyawo, taya popi kutya momadheulo gawo golweendo lwonkalamwenyo oya likola mo oshindji. Sara Matheus gumwe, gwomaadheulwa pendiki ndyoka, okwa ti okwi ilonga mo oshindji molwaashoka poompito odhindji aavali naatekuli yaanona kayeshi nkene aanona haya tekulwa nokusilwa oshimpwiyu nolundji ohaya koko yeli kuyo yene yaana etonatelo lyaavali, shono a holola kutya ohashi ka hulila momaihumbato omawinayi gaanona mboka.

“Otu uvite etumba lela momadheulo ngaka golweendo lwonkalamwenyo, no tatu uvaneke kutya uuyelele nuunongo mbuka twa pewa itatu wu hulithile mpaka noku wu ndalapatela ihe otatu wu longitha noku wu topolelathana nooyakwetu mboka inaaya mona ompito okukutha ombinga,” Matheus ta uvaneke.

Konima yomadheulo guule woshiwike aadheulwa ayehe 25 oya pewa oonzapo, noku kumikwa ya tsikile nesiloshimpwiyu osho wo etonatelo momagumbo nomomidhingoloko dhawo.

LEAVE A REPLY

Please enter your comment!
Please enter your name here