Aaniimuna shonopekeni omiyalu dhiimuna yeni

0
30

Komutoolinkundana

Windhoek-Ehangano lyaanafaalama yokomahala gaayehe nenge[ Namibia National Farmers Union] oli na omaipulo unene kombinga yaaniimuna momahala gaayehe mboka taya munu inaaya dhiladhila kombinga yomudhingoloko. Shika osha popiwa kOmuperesidente gwaNNFU, Jason Emvula oshiwike shika moWindhoek.

“Ope na omikalo omiwinayi dhokumuna dho ishewe otadhi nayipike omudhingoloko unene tuu ngaashi omukalo gokukala niimuna yapitilila miitopolwa ya ayehe” Emvula a ti.

Okwa indile aanafaalama opo ya shonopeke iimuna yawo, opo uulithilo wu vule okuhumbata iimuna yomwaalu gwa yeleka.
Okwa galikana wo aanambelewa yuunamapya opo wo ya kwathe aaniimuna mokushonopeka iimuna yawo, mokuya longa nkene hashi ningwa.

“Ope na omikalo omiwinayi dhokukala niimuna ya pitilila unene tuu miitopolwa yokuumbangalantu woshilongo.
Otwa pumbwa okushonopeka omiyalu ndhika opo tu kale naandhoka tadhi vulu okuhumbwatwa kuulithilo mboka tuna” Emvula a ti noku indila kaanambelewa yuunamapya opo ya kwathele mokulonga aanafaalama mbaka.

Okwa indile wo oshigwana opo shi yande okufika, omapeya ngoka haga hanagulapo uulithilo osho wo omalugumbo.
Kepulo kutya otaye ke shi enda ngiini, molwashoka uuna omuniimuna ena oongombe odhindji okwa talika ko omuyamba, Emvula okwa ti oya tula po omalongekidho okulonga aanafaalama mbaka opo ya lundulule nokupungula uuyamba wawo miinima yilwe kakele kiimuna.
“Shika otashi ulike kutya tse otwi ilongekidha uuna tatu palamene eshongo ndika, oshoka shono wa ulike itashi longo we, oshali ashike hashi ningwa monakuziwa, ndele otwa pumbwa okuendela pamwe nethimbo. No inatu pumbwa okutsikila okumwenya monakuziwa,” Emvula a ti.

Okwa tumbula wo kutya ngele omunangombe okwa hala okukala niimuna oyindji pehala eshona , uuna uushitwe wa piluka nena ye oye taka kanitha oshindji, onkene oshasimana okushonopeka omwaalu ye ta vulu okuhupa nomwaalu ngoka.

“Ihe konima yomadheulo omunafaalama ota hogolola omwaalu omushona na ota hupu” osho a ti.
Oshilyo shoNNFU Kristian Hango okwa gwedha po a ti monakuziwa ootate oya kala niimuna oyindji omowesimano nuuyamba ndele sho pwe ya elunduluko, aantu itaya kala owala nuuyamba miimuna ndele otaya vulu okutula uuyamba mbuka momatungo nenge moombaanga.

“Ndyoka olyo elunduluko tatu popi oshoka inatu hala aaniimuna yetu ya kale ashike yi ikankamekela kiimuna oyo ayike ndele ya kale wo ya pungula palwe opo uupyakadhi muuniimuna ngele owa holoka nena oye na ishewe iiyemo okuza palwe.,” Hango a ti.
Omupeviperesidende gwaNNFU, Oiva Mahina okwa indile aanafaalama opo ya lundululile iimuna yawo molupe lulwe luuyamba, mokuyi landitha po etaya mono iimaliwa mbyoka yo taya vulu okufala koombaanga.

Oya ti wo omaipumomumwe gaantu niinamwenyo nago ogendji miitopolwa yokuumbangalantu.
Omaipulo ngoka geli po oongoka kutya ngaka ohaga eta eyonuko lyiilikolomwa osho wo ndyoka lyiiinamwenyo tayi lika po kiikwakuti nenge iimeno tayi lika po koondjamba .

Osho wo omukithi gwekondo nelaka ngoka hagu taandelekwa koonyati.
Emvula okwa indile epangelo opo li se oshimpwiyu kutya egameno lyiikwakuti olya longekidhwa nawa opo kaali ete omayonagulo mokati kaaniimuna naanamapya.

LEAVE A REPLY

Please enter your comment!
Please enter your name here