Amupolo okwali omukwiita ihaa tila sha

0
298

Omutoolinkundana

Ongwediva-Omupresidente Hage Geingob okwa hokolola ondjayi yiita, nakusa Erasmus Kayambu Amupolo onga ali omukiita omunanyati.
Moshipopiwa she shoka sha leshwa kuNgoloneya gwoshitopolwa shaMusati Erginus Endjala, Geingob okwa ti Amupolo okwa kwatele komeho oongundu metanga lyokakulumbwati pethimbo lyiita yekondjelomanguluko moSwapo, ano oPLAN, nokwa tsikila okushininga konima sho Namibia lya manguluka, sho natango a kala gumwe gomaaleli metanga lyegameno lyaNamibia lyoNamibian Defence Force (NDF).

Amupolo (63) okwa hulitha petameko lyomwedhi nguka sho oshihauto shoka ali ta hingi shi idhenge mumwe oshipala noshipala noshikwawo, mondjila yopokati kaDordabis na Leonardville. Ye okwali gumwe gwomaantu yatano mboka ya sile moshiponga shoka sha ehameke woo aantu 10. Lieutenant General Martin Shalli, ondjayi yomatanga yili moshipundi shevululuko ngoka a kala oye komanda gwa Amupolo pethimbo lyekondjelo manguluko nomeni lyoshilongo sho Namibia lya manguluka, okwa li a gandja etumwalaka kaalilasa pehala lyaangoka a li kakukutu komatanga gekondjelomanguluko nomuperesidente gwotango gwoshilongo Omukokoli Presidende Sam Nujoma. Nujoma naye okwa hokolola wo Amupolo onga ondjayi yiita, yali ihaayi tonyala.

“Okakele kuukwiita, Amupolo okwali omutungagumbo neso lye ndika lyombaadhilila olya yugu ofamili ye naaNamibia ayehe omukwashigwana goka a li ena oshigwana she komutima. Otashi uvitha nayi… Omuntu a kondjo omimvo odhindji nokusindana momalugodhi ogendji gendji ihe paife okwa kanitha owala omwenyo gwe moshiponga, ye nomoshipundi shevululuko ina kala mo,” Nujoma a ti ngaaka.

Amupolo okwa valelwe momumvo 1954, a valelwa momukunda Oshuungu popepi nOshikuku.
Momuvo 1974, okwa thigi po oshilongo sho a taaguluka oongamba pamwe naagundjuka ooyakwao opo ya ka kuthe ombinga mekondjelomanguluko.

Sho ya yi kombanda, Amupolo okwa ningi oshilyo shetanga lyokakulumbwati lyaSwapo, ano oPeople Liberation Army of Namibia (PLAN) moka a yelwa nokuli e ta pewa mo ongundu ye mwene ndjoka a li ta komanda.

Shalli okwa ti ota dhimbuluka uupenda waAmupolo ngoka wa holoka iikando oyindji, nomoshiningwanima shimwe shomwaambyoka itaa yi vulu okudhimbiwa moka a holola uupenda osha li sha ningwa momasiku 04 May 1978, ano mesiku lyaCassinga, sho etanga lye lyali lyiipumu mumwe nomutondi pehala limwe kaalishi moCassinga.

Esiku ndyoka Amupolo okwali a ehamekwa molugodhi, ashike nonande a li a mono oshiponga miita, ina tonyala, okwa tsikile owala nokukomanda etanga lye, nando ye a lemana.

Sho oshilongo sha manguluka, Amupolo opamwe naakondjelimanguluko ooyakwao oya galukile kegumbo koNamibia mo1990. Sho eya okwa thikile owala ta longo metanga lyegameno, moka a kala nokulonga pombandi dhiili nodhiili, sigo osho a yi moshipundi shevululuko mo 2014.

Amupolo ngoka a pewa efumbiko lyopapangelo okwa fumbikwa Olyomakaya lya zi ko pomukunda gwaandjawo puElim moshitopolwa shMusati. Okwa thigi ko omuselekadhi, noyana 12.

LEAVE A REPLY

Please enter your comment!
Please enter your name here