Asino, Kamanya na yakwao ya fala ishewe elelo kompangu

0
285

Omutoolinkundana

Omalenga ga tidhwa miilonga kelelo lyaNdonga oga tula mo eindilo kompangu yopombanda, opo ku talululwe etokolo lyelelo sho lye ya tidha miilonga nokulangeka ooyakwao yalwe miikandjo mbyoka ya kala haya lele.

Oombapila dhompangu yopombanda dha monika kuKundana otadhi ulike hahende Tjakazenga Kamuhanga gwehangano lyoohahende lyedhina AngulaCo Inc, a tula mo eindilo pehala lyaJoseph Simaneka Asino, Sheetheni Vilho Elifas Kamanya, Peter Kauluma, Kashona Malulu, Fillemon Amutenya Nambili naJohn Walenga.

Oonakutula mo eindilo mbaka oya tidhilwe miilonga kuyele nuumvo, nelelo olya li lye ya pingene po nooyakwawo yalwe
Hahende gwawo ota pula opo omukwaniilwa Immanuel Kauluma Elifas, ngoka eli omuyamukuli gwotango moshipotha, opamwe nomalenga Erastus Mvula, Paavo Amwele, Reinhold Nepolo, Naeman Fillemon Kambala, Nepando Amupanda Uuministeli ulile po omalelo gopaitopolowa noondoolopa nosho wo Elelelo lyaNdonga opo yaaha kuthe we onkatu yimwe komeho okutsikila noshinima shetidho lyawo muuleli, nokulangeka omalenga ngoka tage ya pingene po.

Yimwe yomwaambyoka ya tulwa meindilo lyokompangu mbaka oya pula opo ku talululwe ekutho lyawo miilonga, yo ya kaliwe nayo omutumba komukwaniilwa nezulo kelelo.

Mokuyamukula konkatu ndjoka ya kuthwa kuAsino nayakwao Elenga Naeman Amalwa pehala lyelelo lyaNdonga olya nyolele iikundaneki omushangwa ngoka tagu ti kutya elelo opamwe nomukwaniilwa olyiilongekidhila okuikanyuna, opamwe noohahende dhawo, ngaashi naanaa yeshi ningi nale.

Ta ti Asino nooyakwao oya tula etumwalaka moRadio okuhiya oshigongi moka taya ka gongela aakwashigwana.
Amalwa okwa ti kakele ketumwalaka ndyoka tali dhana onkandangala moshigwana, opuna woo uuvidio mono muna ethano lyomukwaniilwa shono ta ti etukano enene, okutula omukwaniilwa muuvidio pwaahena epitikilo lye.

Elelo olya ti ka li na mo sha moshigongi shoka tashi ithanwa, sho oshigwana nashi kwashilipaleke kutya elelo lyOndonga inali unganeka oshigongi naakwashigwana, yo naya kale yeshi kutya omalenga ngoka taga ithana oshigongi shoka oga kuthwa miilonga no inaga uthwa okulongitha edhina lyelelo lyOndonga, yo kayena uuthemba woku ninga iigongi yatya ngaaka.
Gamwe ngoka gali omalenga ga kuthwa miilonga ngaashingeyi ogo Joseph Asino,Vilho Kamanya, Peter Kauluma, Kashona Malulu, Fillemon Nambili na John Walenga, omalenga ngaka oga kuthwa miilonga molwomaihumbato gago, nonande gali ga pewa ompito yokuya koongolo oga tindi.

Amalwa okwa ti iilonga niigongi mbyoka tayi hiywa kaantu ya tumbulwa metetekelo oyili ompinge niilonga yelelo lyOndonga, no taya ka katukilwa onkatu nziya ngele itaya iyutha komalombwelo, nongele otaya tsikile okulongitha edhina lyOmukwaniilwa osho wo lyelelo lyOndonga.

Ta ti omapopyo ngoka taga piti miikundaneki ogeli ompinge nOmukwaniilwa osho wo elelo lyopamuthigululwakalo, go inaga pumbwa okulandulwa unene sho aahiyi yoshigongi ya kuthwa miilonga ashike otaya kambadhala okunyateka edhina lyelelo lyoshilongo.
Omupopiliko okwa yelitha kutya ekutho miilonga lyawo olya landula woo sho ya palamena omukwaniilwa Elifas, noyali yemu fala kompangu omasiku gaziko, ta ti oonakukuthwa miilonga oya yono sho ya ningi iihokolola mompangu yopombanda, naashika oyeshi ningi medhina
lyelelo lyOndonga nonande ya kuthwa miilonga thilu.

Etidho lyawo olye ya woo sho ya kala nokwiithanwa kiihokolola ya gandje ombinga yawo yehokololo, ashike oya ndopa okushi ninga nOmukwaniilwa okwa gandja elombwelo opo ya tidhwe thilu, yo taya pingenwapo.

Ta ti oshigwana nashi ikaleke kokule niigongi mbyoka tayi popiwa yaa li pauyuuki, yo taya kwashilipaleke kutya aahiyi yoshigongi oya kuthwa miilonga, noya pingenwapo nale, yo naya hulithepo okulongitha edhina lyelelo lyOndonga.

Amalwa ta tsikileko kutya ye onga a ulikwa komukwaniilwa ye mwene a kale omupopiliko, ye pamwe nomukwaniilwa osho wo oshigwana shOndonga kaye uvitile ombili omapopyo ngoka taga andjakanekwa miikundaneki, nokwati nayi ikaleke kokule nago.

LEAVE A REPLY

Please enter your comment!
Please enter your name here