Maria oye oshipala shOlufuko nonuumvo

0
318

Pinheas Nakaziko

Windhoek-Maria Nepembe ngoka oye enzuna dhingi mokweenda moshilongo oye ishewe a hogololwa opo a ninge omukalelipo gwOlufuko, olweetho olutiyali.

Iilonga yokukala omukalelipo nenge oshipala shOlufuko okutseyitha oshituthi shika, nokuhiya aantu ayehe opo ya kale ya mona uuwanawa wokuholoka koshituthi shika hashi dhanwa omumvo kehe pethimbo ndika.

Maria okwa ti ye oku uvite uuntsa netumba okukala a hogololwa moshituthi shika ye ota kakala natango a holoka pepatululo lyoshituthi mesiku lyotango lyomwedhi tagu ya

.“Shika oshinima oshiwaanawa no tashi hokitha okumona iilonga yandje noshipala shandje tashi ulikwa komapulakata gOlufuko konyala oshilongo ashihe.”

Nonando Maria ali a ulwa omalaka omawiinayi omvula yazako molwehogololo lye olyo tuu ndyoka molwakwashigwana inaaye mu hala molwomatompelo gayoolokathana, okwa ti ye ina uva nayi oshoka okukala komeho gaantu oyendji kashishi oshipu.

Okwa gwedha po ta ti okukala onga oye oshipala nenge omukwateli komeho goshiindingili osho tuu shika oshe mu longa oshindji, mwakwatelwa omuthigululwakalwo gwAawambo osho tuu omikalo.

Nuumvo Maria okwa ti otapu katya pwakwa oshoka aantu otaya ka mona oshindji, mwakwatelwa iinyangadhalwa yomithigululwakalo.
Nuumvo pOlufuko ota pu ka kala euliko lyokakadhona dhingi komuthigululwakalo, neuliko liizalomwa yopamuthigululwakalo.

“Olufuko oluna iiningwanima oyindji mbyoka tayi kaulikwa, noshikwawo, ota pu ka kala ishewe aahikingalo yaNamibia ngaashi Exit, Bullet Ya Kaoko, naYoung T taya ka ulika uunongo wawo. Ota pu ka kala ishewe uusiku wOhungi moka aanona aashona taya kalongwa omuthigululwakalo, mwakwatelwa omikalo niinima oyindji,” Maria ta ti ngaaka.

Maria okwa kumagidha aakuluntu ya longe aanona yawo omithigululwakalo yo ya wape okukutha ombinga miinima mbika yopahedhi..

LEAVE A REPLY

Please enter your comment!
Please enter your name here