Moshitila Mwa Z’Ondjupa : Okwiilandela eshina lyandje lyotango lyokuhondja

0
46

Mombaye omwa li mu na ookomboni dhi li hetatu ngaashi: yaRailway, yaKeninga, yaHus Kouser, yaNew Wes, yaTuna, yaMuni, yaCoastal noyaHarmon George. Ookomboni adhihe ndhoka nda tumbula pombanda, onda li handi dhi lyangele nokushingitha iihondjomwa yandje.

Natango tuu ishewe omwedhi shampa gwa si, ngame onda li handi kutha oohulukweya dhandje noohema ndhiya dhoosheshele dha li hadhi landwa nodhi holike kAakwanyama, e tandi ende nda lamba ookomboni kooyimwe nayimwe tandi shingitha iinima yandje. Oohema dhoosheshele ndhoka tandi popi mpaka, omahema ngeya ge li po guundjila uutokele nuutiligane, ngeya ga li haga zalwa komalenga.

Pethimbo ndika, natango oho adha ngaa ogo ga zalwa kaasamane, unene tuu poohango. Oohema ndhoka onda li handi dhi landitha okati ka lala. Aaniilonga yamwe oya li haya landa ya ka tulile oohe omitenge, nenge ya faalele omalenga gokomikunda dhawo omagano.

Nandi ishune ishewe manga konima. Sho nda landa eshina lyokuhondja shi valelwe ndi ulukilwe mpoka hali gumwa. Onda kala ngaa handi thikamene aamentu mba ya kala haya hondjo naamboka taya andeke uumbulukweya wetu. Onda kala ngaa handi tala shoka taya ningi. Nandi shi tumbule ngaa kutya pokulanda eshina lyandje, onda ulukilwa po kashona mositola moka nde li landa kutya, ongwiya oto yi tula ko ngiini na oto ningi ngiini.

Omulandithi sho ta ulukile ndje ota ti “Ondja ko nee. Oto ningi ngaa ngweye to ondjo, ngwee to ndalaya.Ngele owa hala li tshune konima, oto ningi owala ngeyi. Ngele oto li ukitha komeshso ongeyi:” osho a popi ngaaka sho tu ulukile ndje. Aalandithi nale oya li ye na omathimbo,oshoka kaya li unene ye na aalandi oyendji. Kakele ashike kutya, peulikilo ndyoka, inandi za po nda pyokolwa nawa, onda ningwa owala ya lyata mo ya nwa mo.

Omathimbo gamwe shampa nda nyengwa kusha, nando ongodhi ngaa ya yululuka, okwa li handi li tumbu kothingo tandi li fala kositola hoka nde li landa.Shampa nda mono tali hondjo ongodhi ya fa ya taandela ngame tandi li shuna ko, yo ya ka ulukile ndje, nkene hali sitelwa.bOya li haa kutha okanima taya tala ngele ongodhi oya yululuka, yo taya ti; ‘Oh nani ongodhi oya yululuka” yo taa sitele olumboha lumwe, nokonima ongodhi otayi pama, e tayi kwatathana nawa naandjoka yokombanda.Tate Kalunga okwa pa ndje oshitalendi oshiwanawa.Onda koneke mbala nkene hashi ningwa, nokuza mpoka onda kala ngaa nduno handi shi ningi ngame mwene. Hugunina, osho nda ka ninga omupangeli gwomashina gayakwetu uuna ga teka. Eshina lyokuhondja
lyo lyene kali na iinima oyindji, uukwatya owala wonale sho omuntu wa tala iinima yiilumbu.

LEAVE A REPLY

Please enter your comment!
Please enter your name here