Omathaneko omatitano geyokomeho NDP 5

0
17

Komutoolinkundana

Uundjolowele nepalutho

Namibia okwa ya komeho mokushonopeka eso lyoomeme osho wo lyoohanona. Omaso gaanona aashona naamboka yeli kohi yomimvo ntano nago oga shuna pevi. Aakiintu yeli momategelelo ye na HIV/AIDS na yo omwaalu gwawo ogwa shuna pevi okuza pooperesenda 22 momumvo 2002 okuya pooperesenda 16,9 momumvo 2014. Omayakulo gomathulo gaakiintu yi ihumba otaga adhika konyala pomahala agehe guundjololwele oshilongo ashihe. Shika osha eta mpoka kutya aakiintu oyendji ye li pooperesenda 87 ohaya monene aanona yawo miipangelo. Dho ooperesenda 88 dhaakiintu ohadhi valithwa kaavalithi ya pyokoka. Omuthika gwetuntilo nago ogwa ya pombanda noku adha omahala ogendji pethimbo lyomathaneko omatine geyokomeho gali miilonga. Opolohalama yokupalutha moshilongo oya kwathele okushunitha pevi ondjala mokati kaanona osho wo engundo palutu lyaanona aaNamibia. Omwaalu gwaanona mboka yali ya ngunda omolwondjala ogwa shonopekwa noku tulwa pevi sigo opooperesenda 24 momumvo 2014 okuza sho nguka gwa li gwa thikama pooperesenda 29 momumvo 2006. Omwaalu gwaavali mboka haya yamutha oyana kontulo nago ogwa yi pombanda sigo opooperesenda 48 momumvo 2013 okuza pooperesenda 23 momumvo 2006. Ihe nando ongeyi opena eshongo lyompumbwe yoshimongwa sho iron mokati kaakiintu, ndjoka ya thikama pooperesenda 22 maakiintu nooperesenda 48 maanona. Olopota ndjika oya ti nando opwa adhikwa omasindano ngaka eso hali etithwa komavu haga taambathanwa ngaashiTB naMalaria olya li oopereseda omilongo 43 dhomaso gaantu konyala 14 000 mboka ya manene oondjenda omumvo gwo 2012. Ihe okuza pomumvo 2015 omimvo dho nkalamwenyo kombanda yevi moNamibia odha li pomimvo 58.

Omathaneko omatitan geyokomeho NDP 5 oga hala okuhwepopeka okukalamwenyo komuNamibia kehe opo mbaka ya kale haya si ya pitilila omimvo 67,5 oku za pomimvo 58 mpoka opo okukalamwenyo kwomuNambia ogundji haku hulile pethimbo ndika.

Oonkambadhala dha Namibia okutidha mo omikithi dhomukwayu moshilongo oya nkundipikwa keinyengo lya manguluka lyaantu nolyiinamwenyo pokati kiishiindalongo. Mbaka oha ye ya okukonga uuhupilo osho wo uulithilo kombinga onkwawo. Aanawino yuundjolowele oya koneke wo kutya onkalo yoku ehama momadhiladhilo nayo otayi ende tayi koko.Oshikwawo oshilongo osha thiminikwa okukuta aanawino ya za pondje molwashoka moshilongo omuna ompumbwe onene yaanawino ya yoooloka miimpungulonga ya yooloka. Oshilongo oshina wo oluhepo lwomauyelele omape kombinga yuundjolowele omolwa omapekapeko muundjolowele inaaga gwana. Oshikwawo okukala po kwomiti dha pumbiwa esiku kehe mooapteka okwa gumwa olundji komukalo hagu ende kashona mokulanda iikwamiti.Elongitho nayi lyomiti, omahala inaaga gwana gokupungula omiti osho wo ompungulilo inaayi ihwapo nawa pendiki enene lyokupungula omiti moWindhoek. Okukaleka po iilongitho yuunamiti moshilongo nako okuli wo eshongo enene moshimpungu shokugandja eyakulo lyopaundjolowele moshilongo.

Eyokomeho pankalathano
Uuthike pamwe.
Pamushangwa hokololo gwekonakono hali ithanwa Namibia Demographic Health Survey 2013, ooperesenda 33 dhoomeme yeli pokati komimvo 15-49 oya longelwa oomiyonena dhopaihulo nenge ya gumwa komalutu. Oothigwa komikunda odho unene dhili moshiponga okulongelwa omiyonena ndhoka tashi pitile mokugandjwa po osho wo omikalo dhilwe dhokuthiminikilwa iilonga. Momumvo 2015 oshipotha shotango shina sha nepingakanitho lyaantu oshali sha pangulwa nomutamanekwa okwa pewa egeelo konima yoku monika ondjo.

Okwaa thike pamwe pankalathano okwa geyeke elongitho lyoonkondo momagumbo unene tali ningilwa aakiintu.Ooperesenda 32 dhaambaka otadhi mwenya moluhepo. Ishewe ooperesenda dhi vule 44 dhomagumbo taga wilikwa kaakiintu odhili wo moluhepo. Nduka otalu etwa kokwaathike pamwe, moku kala nevi, osho wo oonzo dhilwe ndhoka dha pumbiwa okulongithwa opo omuntu a vule okwi ikuthako.Aakiintu moompito odhindji oya lumbulwa okukala momawiliko papolitika nopamahupilo. NDP5 okwa hala sho taku ka thikwa komumvo 2022 aakiintu ayehe moNamibia oya nkondopekwa no ya manguluka mokulongelwa omiyonena nokuhepekwa momagumbo gawo.

NDP5 okwa koneke kutya okwaa kala po kwomulandu gu na sha netopolo lyoonzo dhoku eta po sha osho wo ngoka gu na sha nokundondopeka aakiintu okwo taku fala mpoka kutya oomeme ya kale taya hepa sigo oompaka.

LEAVE A REPLY

Please enter your comment!
Please enter your name here