Onakuziwa yosipana yoGolden Bigs

0
27

Shipi Elago

ONGWEDIVA-Oshiwike shika Kundana ote ku etele ondjokonona ya yimwe yomoosipana oonkulu moNooli osipana yoGolden Bigs yomOngwediva.
Shipi Elago okwa kundathana noongudhi dhosipana ndjika Eino Mbango na Dominicus Iipinge mboka ya li ya popi oshindji kombinga yonakuziwa yosipana ndjika.

Osipana yoGolden Bigs oya li ya totwa momumvo 1980 ya totwa po kaanasikola mboka ya li ya mana eilongo lyawo mOngwediva High School.

“Pethimbo ndiyaka ngele omuntu okwa zi mosikola ka pwali oompito dho kutsikila okuya kiiputudhilo yilwe moshilongo ngaashi tu shi na ngashiingeyi onkene ooyamwe yamwe lela yali haya mono oompito opo ya ye kiiputudhilo yopombanda na unene iiputudhilo mbika oya li kondje yoshilongo, onkene ngele owa mana osikola yopombanda nena owa li ashike wu na okuninga omuniilonga gwepangelo no sho tuu,” Dominicus Iipinge ta ti.

Omwaalu gwaadhani mboka yali haya dhanene Ongwediva High School ogwa li gwa mana eilongo lyawo mo 1979 na kaya li we taya vulu okudhanena osipana yosikola onkene oya kala taya talaa tala mpoka yena okutsikila noshitalenti shawo shokudhana okatanga kokoompadhi mNooli.

“Opwa li puna osipana hayi ithanwa Eleven Brothers ya li poonakusa Samuel Ambunda ndjoka ya kala yili mewiliko lyomusamane Pineas Elago ngoka a li wo omudhani pethimbo mpoka, shaashi ngame onda li handi dhana mosipana ndjika onda li nda heke yakwetu opo ya wayimine ndje tse tu dhanene osipana ndjika, nando nani aadhani yosipana ndjika oya kala ya geya oshoka mongundu yaadhani mba twa za nayo kosikola yaNgwediva kamwali ndando ogumwe ha vulu okukala kondje yokapale , oshoka ayehe oya li haya dhana nawa,” Ipinge ta tsikile.

Okwa ti okukalapo kwawo mosipana ndjika ina kukala ethimbo ele, oshoka osha ka eta uupyakadhi, sho aadhani aakulu yosipana yoEleven Brothers ya li yewete kutya aamentu mba yazi kOngwediva oya li yeya okuya thinaneka onkene kaya li we ye ya nyanyukilwa.
“Naasho nee twe shi mono kutya otwa fa twa thinaneka osipana otwa li twa tokola opo tu tote po osipana yetu yene, ashike uupyakadhi owa li nee kombinga yedhina,” Ipinge ta tsikile.

Otwa li twa tula omadhina ogendji pombapila moka twa li twa hokwa mo Golden Bigs.
Kepulo kutya Golden Bigs omwiityo gwalyo oguni, Ipinge okwa ti lyolyene olya li ngaa edhina lya gandjwa pamadhilaadhilo gaanona ashike otali ti owala kutya osipana aluhe otayi lalakanene oshingoli oshinene kehe methigathano tayi kutha ombinga.

Golden Bigs okwa li a dhana uudhano we wotango nosipana yoEleven Brother na oyali ya dhana shithike pamwe esiku ndyoka na oyali ya dhana nomalutu powala oshoka kaya li yena iikutu yetanga natango.

Golden Big sho yali ya dhana tango tango mekopi lyaDr Frans Aupa Indongo Cup ndyoka lya li ha li dhanwa koosikola neKalaba pethimbo ndiya ekopi lya li lya dhanwa momumvo 1980 moka osipana ndjika wo ya li ya totwa noku kumitha aantu oyendji sho ya li ye li sindanapo, yo nee aantu oyendji ka ya li ye yi tseya.

“Ekopi lya Aupa olya li lyetupe edhina nokuza kesiku ndyoka twa li twa sindana po ekopi ndika kehe gwumwe okwa li ta popi okasipana ka za kOngwediva ndele okanika oshiponga anuwa Golden Bigs,” Ipinge ta popi nokwiimemeha.

Okwa ti oku za tuu mpoka oya li ya ningi ondjokonona sho ya li ya sindana po omakopi ogendji na oya kala ha ya tilika.
Eino Mbango ngoka a li a tseyika nawa nedhina “Onie” okwa kala omudhani gwomokati kokapale, na ota tanga enyakwa lyoGolden Bigs Tommy Trou ngoka a li ha ningi iinyengandunge mokati kokapale na okwa li ha dripele uupyakadhi, ta gwedhwa kuKarel Ndoroma ngoka a li omudhani gwokonima a nika oshiponga no pu ye ka pwa li hapu pitilwa nando owa ti ogoye lye.

Okwa ti Iipinge okwa li oye Score Machine yawo ano ha tulamo ookoola uupyakadhi na okwa li ha tilika koosipana odhindji.
Kepulo kutya uudhano wuni itaa ya ka dhimbwa monkalamwenyo Mbango okwa li a holola nohamu nkene ya li ya dhenge okasipana kamwe ka li moTsumeb kedhina Highland Bucks hoka ka li ha ka tilika nayi ashike esiku ye ka kwata mo 1984 mekopi limwe lyali hali dhanenwa mOshomeya oya li ye ka pitithamo mekopi.

Okwa holola wo kutya oGolden Big sho ya li yi na aadhani yena elandulathano naashika osha li sha kwathele osipana oku mona omakwatho ogendji ongele okaakwashigwana nenge okaanangesefa.

Otaya kombo kombunda nakusa Samuel Ambunda a ti okwa li shili a kwathele osipana yoGolden Bigs, oshoka konima sho Eleven Brothers ya
li ya teka po konyala uule womvula yimwe sho Golden Bigs a totwa nena Samuel Ambunda okwa li a wayimine Golden Bigs na okwa li shili e ya pe omakwatho ogendji nolwindji osipana ndjika oya li ha yi yungu oontanda pegumbo lye.

“Mo 1991 Golden Bigs okwa li sindana po oliha ndjoka ya li ha yi dhanwa koosipana dhaza kiitopolwa ngaashi Kavango,Otjozondjupa,Omusati Kunene, Oshikoto nosho wo Ohangwena, na otwa li twa yelwa opo tu ka dhane mekopi lyoNFA moka twa li twa dhana noTigers FC.

Okwa li wo a holola kutya osipana yoGolden Bigs oyo ya li yi na kuya koPremier League omumvo Oshakati ya ya koPremier League ashike kaya li ye na ehalo naanaa okukutha ombinga moliha ndjoka Oshakati City oya li ya kutha po ehala lyoGolden Bigs nando ta ti osha li shaningwa pamukalo gwa fa inaa gu yela nawa.

Mbango na Ipinge oyali ya holola kutya osipana yoGolden Bigs ka yi na mwene ihe osipana yoshigwana na oyili ashike momake gaamboka ya li yeyitotopo.

Naamboka ya li ye yi totopo oyo nee ngaashi Dominic Iipinge, Isack Elish, Blasius Shivute”Nashumba” Karel Ndoroma, David “Maya”Shatiwa, Jesaya Iiyambo, Eino “Onie” Mbango,Veiko Shatumbu,Kornelius Kwela Kapenda, Andreas Shoopala Kalenga,Josef Kalenga,Pineas Elago,Markus Angula Kambata na nakusa Shipweya ngoka a li omukwati.

Golden Bigs ohayi zala okambindja kolwaala oluluudhe nokambulukweya okatokele ngele oye li megumbo ohaya zala omuzalo omuzizi nomushunga.

Okambindja kotango oya li ye ka landelwa kuAmushembe Namukwambi ngoka oye a li afa omuwiliki gwawo petameko lyosipana.
Golden Bigs ohayi dhana moSecond Division yaShana konima sho ya li ya gu mo moliha yoFirst Division omumvo gwetanga 2015/2016.
Ewiliko lyayo olya thikama po mu Opeyi Pawa Shiyagaya (Omunashipundi) Lamek Kafidi(Amushangandjayi) Heiki Emvula (Omudhiginini gwiiniwe)Matias Fire Iimbondi (Head Coach)

Tiro Ndengeinge (Omudhewuli) Shikwambi Titus (omudhewuli peha)na Filip Dala (team manager)

LEAVE A REPLY

Please enter your comment!
Please enter your name here