Otatu ekelehi eshunithopevi lyomahupilo gaNamibia kuMoody, Schlettwein

0
45

Calle Schletttwein
Minista Gwiimaliwa

Ehangano enongononi meinyengo lyiikwamahupilo muuyuni lyedhina Moody olya tseyithile Etitano lya yi kutya omuthika gwaNamibia kombinga yoku longa nomikuli okwa shunwa pevi. Pamukalo ngoka Moody a yeleke nago omuthika gwaNamibia shinasha nokukala omuinekelwa mokushunitha oongunga dhe ogu li pondondo Baa3-.

Ondondo ndjika opo Namibia a tulwa kehangano ndika Moody oku za sho lya tamekele okuviha ondjundo yaNamibia pamahupilo momumvo 2011.

Moody okwa tula omuthika gwaNamibia gwopaigwana kombinga yokulonga noongunga poshikolo sho Ba1 momutalelo kaaguli nawa.
Shika osha tula oshilongo mongundu hayi ithanwa yiiyagaya kokutya ngele oshilongo osha pewa oongunga komahangano giimaliwa muuyuni otashi vulika shika nyengwe okushunitha iimaliwa yaantu mbyoka.

Oongunga odhindji ndhoka Namibia ena odhili momiyalu dhoRand, ihe nando ongeyi , eshunithwo pevi ndika otali ka ehameka aapunguli noshowo omahangano giimaliwa gomeni lyoshilongo.

Oongunga ndhoka dha indilwa meni lyoshilongo nadho odha shunwa pevi nonando ndhika odhina omuthika guli nawa.Oshitopolwa shomapungulo meni lyoshilongo osho onzo yomikuli , hadhi indilwa opo oshilongo shi humithwe komeho.
Nomolwashoka shika otashi longo nawa, ka kwali sha tegelelwa opo shi shunithwe pevi pethimbo ndika ngaashi Moody eshi ningi.
Moody okwa ti okwa katuka onkatu ndjoka eshi talela menkundipalo lyewiliko pashimaliwa unene tuu okushi talela monkalo yopashimaliwa
itaayi tsu kumwe, noshikwawo enenepalo lyoongunga.

Pakutala kwetu Moody okwa hala okutya iiyemo niizemo yepangelo itayi tsu kumwe onkene yo oye wete tapa kakala uupyakadhi sho epangelo tashi vulika li ka kale itaali vulu okufuta oongunga dhalyo pwaana uupyakadhi.

Moody etokolo lye okwe li kankamekela ashike koshinima shomwaalu gwooN$2,1 oobilliona ndhoka epangelo lya uvaneke tali futu omahangano, geli longela iimaliwa mbyoka ayihe pehulilo lyomwedhi nguka.
Okuyelekwa kehangano lyopaigwana oko ashike okuyelekwa.

Oko onkatu ya katukwa nomushika, ndjika inayi tala ashihe shoka sha longwa po momahupilo agehe goshilongo.
Epangelo lyaNamibia olya talako onkatu ya kuthwa kuMoody ya ningwa kehangano lyi ithikamena noya kankamekelwa komalalakano gehangano ndyoka ndele ha ke uveko lyonkalo nomainyengo moshilongo shika.

Epangelo olya kuthako etokolo lyaMoody nomaipulo, hamolwasho ando kutya ndyoka kali na okugandja omadhiladhilo galyo nenge li ninge etokolo lyalyo, ihe tse otu wete etokolo ndyoka lya kuthwa olya konenena ashike oshitopolwa shimwe, na olya nika okuwalyaeka, lyo inaali tala omainyengo omape ngoka ga monika taga ningwa momahupilo, oshikwawo etokolo netseyitho ndika inali kwatelwa komeho koonkundathana ndhoka hadhi ningwa omanga etokolo ngaashi ndika inaali ningwa.

Nandi shi popye shu ukilila kutya epangelo lyaNamibia inali hala okumana po ethimbo moku popya kombinga yeyeleko ndika.
Molwashoka tse otwa adhika nale twa ninga omalongekidho opo tu shonopeke uupyakadhi wopashimaliwa.

Omilandu ndhika odha ningwa okutameka metalululo lyomutengenekwa mwaalu gwembo lyoshimaliwa 2016, Shika otashi tsikilwa wo membo lyiimaliwa yomumvo 2017-2018.

Otatu humu komeho mokutula miilonga omilandu ndhika niizemo yadho oya tameka okumonika.
Itatu vulu okupitika tu kuthwe mondjila yetu ketokolo ndika ndyoka lya kankamekelwa kuuyelele mboka itawu tsu kumwe.
Opena einekelo kombinga yeinyengo lili nawa momahupilo nuumvo , okuyeleka naashoka sha li omumvo gwayi. Iiyuliki ya simana momahupilo otayi ulike kutya iinyangadhalwa momahupilo otayi inyenge hwepo nuumvo, iizemo iiwanawa oya tegelelwa opo yi taambwe moshikondo shuunamapya, uutalelipo osho wo ehwepopalo olya tegelelwa okumonika miimpungu yimwe yiikwamina.

Otwi itaala wo kutya okufuta uumbapila wiilonga mbala komhangano ngoka ga li ga tegelela okufutwa otashi ke ga kwathela moku mona iimaliwa yokulongitha onkene shika otashi kumike eyokomeho miinyangadhalwa yomahupilo.
Omilandu dhepangelo odha tala kokule na otali longo lya tala wo kombinga yeyokomeho lyoshilongo ndyoka lya hala okuhwepopeka omuthika gwonkalamwenyo yaantu yaNamibia.

Okushi talela monkatu yaMoody ndjika epangelo otali pula eyambidhidho lyaaNamibia ayehe osho wo otali indile oshikondo shopaumwene naapunguli opo ya kale neineklo ewanawa pethimbo lyomalundululo ngaka.

Onkene tse otuna einekelo natango kombinga yekoko sho omumvo gu uka komeho, okushi talela momaipyakidhilo moomina, muunamapya, nomuutalelipo.

● Shika osha kuthwa moshishangwa shaMinista Gwiimaliwa Calle Schletttwein sho a popi, sha landula onkatu ya kuthwa kuMoody.

LEAVE A REPLY

Please enter your comment!
Please enter your name here