Aahiki yiiketala taya kaleke po omithigululwakalo

0
24

Maria Namupala
OMASHAKA

Ongundu yaamati yedhina Onkambadhala Cultural troupe hayi adhika mOndangwa otayi kaleke po oohedhi dhAawambo, sho ndjika hayi imbi nokudhana iidhano yomuthigululwakalo.

Ndjika oya thikama po maamati yatatu ya yambukile momukunda Onankali moshitopolwa shaShikoto. Mbaka oyo Gideon Nangula naErastus Mesah, taya wilikwa kuBenjamin Tobias.

Tobias ngoka oye omukwatelikomeho gwa yakwawo okwa ti ongundu ndjika oya totwa po konima yomimvo 27, sho oshilongo sha manguluka, yali mekwatelokomeho lya hekulu Andreas Abed, naasho nguka a yi moshipundi shevululuko yo oya kuthako oshinakugwanithwa shokuyi humitha komeho nokutsikila mpoka hekulu a hulile. Aamati mbaka inaya sholola oya tsikile nokwiimba iiyimbo yawo yopamuthigululwakalo, nolundji ohaya imbi niiketela, yo taya nyanyudha nokushambula oshigwana,. “Nonande twa tameka nale okwiimba iiyimbo niidhano yomuthigululwakalo oshetu pula oomvula 21 opo tu kale twa pititha okaCD ketu kotango, shoka shetu imbi nokutukateka unene, ompumbwe yoshimaliwa opo tu pitithe okaCD keli pamuthika,” Tobias ta ti.
Oya ti elalakano lyongundu yawo okunyanyudha, nokukaleka po iiyimbo niidhano yopamuthigululwakalo mbyoka ye wete ya dhinika moshilongo.

Oongalo dhawo ohaye dhi imbi niiketela nohaya talele po omahala gi ili nogi ili momudhingoloko gwOndangwa.
Oshiwike sha ziko oyali ya nyanyukwa unene sho ya mono omayimbidhidho ngoka ge ya kwathele opo ya vule okupititha oalbuma yawo yotango.

Oalbuma yawo ndjoka otayi ithanwa Hailwa Peresidente, notamu adhika oongalo 11. Tobias okwa ti elalakano lyawo okupititha oalbuma tayi ithanwa Hailwa Peresidente, oye na etumwalaka lyu uka kOmundohotola Hage Geingob, ndyoka ya hala li thike kuye pamukalo gwiiyimbo, mbyoka yati ohayi pulakenwa unene.

“Konyala uungalo mbu tawu adhika moalbuma yetu, otwe wu ukitha komundohotola, a pulakene shoka tashi inyenge moshilongo, ye a tseye woo kutya aantu ye koombinga noombinga dhoshilongo otaya hupu ngiini,” Tobias ta ti.
Omuna uungalo ngaashi Hailwa Peresidente hoka ta ti oko ka dhenga mbanda, uuyuni wonena moka ta holola onkalo yuuyuni tayi limbilike mokati komapipi agehe, Ombili, mono ta ti otaya kumike oshigwana shi kale hashi paathana ombili mpoka sha ningathana nayi, osho wo Nanewo.

“Omuthigululwakalo ogo oshinima sha simana moshigwana kehe, noshu uka opo dhi kalekwe po, mono unene mwa kwatelwa oondjimbo nenge iiyimbo yopahedhi.

Iiyimbo, noondjimbo dhomithigululwakalo ohadhi nyanyudha nolundji ohadhi dhimbulukitha kehe ngoka edhi pulakena onakuziwa,” Tobias ta ti ngaaka.

Oya holola kutya ongundu yawo oye yi luku Onkambadhala molwaashoka otaya kambadhala noyi itaala kutya ngele omuntu iho kambadhala monkalamwenyo yoye, nena ito pondola sha.

olwaashoka okwa tiwa waa kambadhala kusindi ngoye ngele iho umba umba ito li omutse gwokadhila. Kakele kokudhenga iiketala iilyo yongundu ndjika oyi na wo uungongo wopaungomba ngaashi okutunga,okufikila nokupainda niilonga oyindji ya pamba omatungo, shono ya ti otaye shi pandulile Omushiti.

“Petameko otwa mono tu na uunongo tawu tsu kumwe, notwa tokola tu wu humitheko komeho.

Olundji ongundu ndjika ohayi kala nokudhenga iiketala momalukanda mOndangwa, osho wo haya nyanyudha piituthi ngaashi yomavalo, oohango na yilwe woo yomanyanyu. Oya ti nonande yena eshongo enene lyompumbwe yoshimaliwa itaya sholola otaya longo nuudhiginini ya kwashilipaleke kutya omithigululwakalo nongundu yawo otayi kala nomwenyo.

LEAVE A REPLY

Please enter your comment!
Please enter your name here