Egumbo lyaShaale shinene mOnayena lya pipo thilu

0
632
SONY DSC

Maria Namupala
ONAYENA

Kansela gwoshikandjohogololo Onayena okwa indile aakalimo yomoshikandjohogololo she, ya tsikile nokukwathelathana uuna ya adhika komaupyakadhi.

Iyambo Natangwe Indongo eindilo ndika okwe li ningi sha landula oshiponga shomulilo shoka sha hanagula po egumbo lyomuwilikwa gwe gumwe momukunda Oniimwandi omwedhi nguka.

Indongo ngoka a li a talele po, yaandja Ananias Mateus Shaale, konima sho egumbo lyawo lya pipo, okwa ti oshinima shiiponga yomililo tayi lopotwa moshikandjohogololo she oshe mu guma unene, onkene okwa kumike aakwashigwana opo ya tsikile noku tondokelathana uuna yu uvu onkugo ya, yakwawo. Aanegumbo lya Ananias Mateus Shaale oya thigwa pomutenya konima sho omulilo ngoka gwe etwa anuwa komunona gwa fike po egumbo lyawo, niinima yawo oyindji.

Shaale shinene okwa hokolola kutya egumbo lyawo olya pi owala shafa omashendjo, a ti omunona gomumati okwali ta tema mu yimwe yomoondunda, nomulilo ogwa tameke tagu yaka noku nukila koondunda dhilwe megumbo.

“Omulilo nguka ogwa fike pethimbo lyokomatango, notwa koneke kutya ogwa zi mondunda yokutelekela moka mwali omunona ta dhana, molwaashoka otwe gu mono gwa ya nale inatu vula oku gu dhima, ashike otwa kugu opo aashiinda ye, ye yetu popile,” Shaale shinene a ti. Pethimbo lyoshiningwanima shoka megumbo oya adhika mo aakulupe ayeke yaali nokanona hoka kafike, ta holola kutya aashiinda sho ya thiki oya adha egumbo lya pya po thilu na inaya vula we okuhupitha oshindji.
Omulilo ogwa fike po oondunda omugoyi, dhomegumbo, tagu ya thigi puuyelele. Shaale okwa ti oya kanithilamo oshindji shoka inaa ya vula okukuthamo.

“Otwa kanithila mo iikulya katuna shoka tatu ipalutha nasho, omizalo dhaanona dhoskola, omauthemba gaanegumbo lyetu, agehe oga lunguna po thilu naashika otashi tupe ondjila onde opo tu tamekululeko, iimaliwa yetu mbyoka twali tuna megumbo nayo oya pilamo,” ta ti ngaaka.

Megumbo ndyoka omwa kala aantu 12, ihe yo oya pandula Kalunga molwashoka ayehe oye li nawa kapena ngoka a pilamo. “ Otatu pandula unene sho inaamu monena omuntu oshiponga, iinima mbyoka ya pilamo ohayi kongwa nonande ihayi monika nuupu, shika otatu shi pandulile Omushiti gwa ayihe,” Shaale shinene a pandula ngaaka.

Omolwonkalo ndjika moka aanegumbo mbaka yi yadha , otaya indile oshigwana oshiholike shi ya kwathele mompumbwe yawo.

Mwene gwomukunda Oniimwandi, Elenga enene lyoshipundi shaNiimwandi , Naeman Amalwa okwa pe aalelwa ye iipeleki , opo ya vule ya kalemo manga taya opalekulula egumbo lyawo. Lyo elelo lyoshitopolwa shaShikoto olya gandja ootenda dhopakathimbo mbali (2), moka aanegumbo taya kala taya lala manga nokupungula iinima yawo.
Kansela Indongo okwa gandja uusila noondooha dhosheelelwa, opo aanegumbo ya kale tayi ikwatha nayo omasiku ngaka manga taya mono omakwatho galwe.

“Iiponga yomililo ohayi eta unene oluhepo nonkayi momagumbo, mo miikandjohogololo yetu kamuna nande omakwatho yambidhidho ngele tashiya kiiponga yoludhi nduka,otatu indile aasamalia aanamutimahenda ya kwathele aakwashigwana mbaka mompumbwe ndjoka yi iyadha yeli, no ya pumbwa kukwathelwa meendelelo ya vule ku thikamitha po egumbo lyawo,” Indongo ta ti ngaaka.
Kehe ngoka ta vulu okuyambidhidha aakulupe mbaka, pamwe naanegumbo lyawo, uuyelele otawu vulu ku monika kongodhi ya mwene gwegumbo 0813552858. Ta ti otaya pandula komakwatho gaanamutimahenda, mboka taya tondoka onkugo yawo.

LEAVE A REPLY

Please enter your comment!
Please enter your name here