Hulithiipo oshinima shokaIndongo – Indongo

0
1876

Otniel Hembapu

Enyakwa lyomapaya gatatu nale lyaNamibia Julius ‘Blue Machine’ Indongo okwa ti oku uvite nayi komaihumbato gaaNamibia , a ti okwa haluthwa koku mona omathano tage mu shundula komakwatathano gopankalathano. Omathano ngoka ta ge mu holole noku nyekela osho wo oku mu ninga oshiyolitha oga holoka kiikundaneki yopankalathano konima sho ye a kanitha olugodhi lwe nomuAmerika Terence Crawford ehuliloshiwike lya piti moNebraska, USA. Oongundu dhaaNamibia odha tameke okushanga komapandja giikundaneki yonkalathano taga tegula kombinga ya Indongo. Aantu omathele oya tula omathano taga holele Indongo sho a li ta galangata mo ringa konima sho a li a dhengwa ongonyo ondhigu kuCrawford medhingoloko etitatu lyolugodhi lwawo lwomadhingoloko 12.

“Omupya oonguka kutya inatu mona iizemo mbyoka twali twa hala, ihe otse mbaka natango na otuli natango muudhano. Otwa pumbwa ashike okutaalela kwaasho tatu lalakanene nokukumika aadhani aagundjuka aaNamibia.Otashi uvitha nayi shili okutala aaNamibia ooyakwetu taya ningi ndje oshiyolitha nyekela ndje nosho wo taya tumu omathano taga shundula ndje kiikundaneki yopankalathano. Otandi ti otatu humuko komitse ngiini ongoshigwana ngele otuna omaihumbato gatya ngaaka.. Oshinima “shokaIndongo’ shika osha pumbwa okumona ehulilo. Kashishi oshinima oshiwanawa nando.”Indongo a ulike.
Omudheuli gwe, Nestor Tobias, okwa endulula wo oohapu dhomudheulwa gwe a ti ye oku uvite etumba mwaashoka sha longwa kuIndongo sigo oompaka.

“Omanga inaa kondja mOlyomakaya, Indongo okwa li a sindana omalugodhi 22 gomomalugodhi 22. Okwa yile koRussia nokoScotland eta galuka ko omusindani. Shoka sha ningwa moAmerika osha li uusiku uuwanawa wokumbokisa waCrawford, ndele uusiku uuwinayi waIndongo.Onkene owa hala okutya otatu dhimbwa omalugodhi omilongo 22 molwaashike okudhengwa lumwe?” osho Tobias a pula.
Okwa ti Indongo ngele okwa li keeshi enyakwa li shi okutalwa ando, Crawford keshi enyakwa itaali kondjithwa nena. Tobias okwa dhenge omuthindo mpoka kutya okusindika kwa Indongo itaku vulu okudhima po ondjokonona yuundhengingonyo yaIndongo nando olumwe, A ti nguka oye omuAfrika gotango ta kondjele ehanganitho lyomapaya mondjokonona yuudhengingonyo.

“Mo America, aantu yamwe kaya li ya tseya Namibia, utya yamwe kaya li ye shi ngele otuna omanyakwa guuyuni.Ndele Indongo okwe shi pondola oku koleka onkalo yaNamibia mokaalita kuuyuni nomomitse dhAmerika mboka yali inaa ya tseya kutya okwa kala oshilongo Namibia muuyuni. Onkene natu tyapuleni oshinima shika, tse tatu mu kumike opo a galukile ishewe a pama mondambo nokusindana omapaya” Tobias a ti.

LEAVE A REPLY

Please enter your comment!
Please enter your name here