Karate – Zen mOhangwena ya ulukile Ngoloneya omapapa

0
37

Shipi Elago
ENHANA

Omunashipundi gwoKarate –Zen mEenhana opamwe nongundu yaadhani yoKarate oya talele po Ngoloneya Usko Nghaamwa opo ye mu ulukile omapapa ngoka ya sindana. Oye mu tseyithile wo omalakano goKalaba ndjika.

Pethimbo a li ta gandja omulombo kungoloneya, omunashipundi gwoKalaba ndjika George Hafilwa okwa ti “tatekulu tse otweya po ashike tu ku etele omulongelo gwetu ngoka twa zi nago koMaputo shaMozambique hoka osipana yokarate yaNamibia ya li ya kutha ombinga muudhano wiilongo yoSADC moka uunona wa za moshitopolwa shoye wa li wa hogololwa opo wu ka kalele po oshilongo”. Okwa ti, uunona mbuka owa li wa ningi nawa na owa eteleleko omapapa miiviha ya yooloka onkene naya talikeko ongo oAmbassada dhoHangwena.
Okwa hokolola wo nkene osipana ndjika ya li ya tameke a ti “Okarate mEenhana oya li ya totwa konyala oomvula mbali dha piti momumvo 2015, kuSensei Mordekai Mutilifa.

Okwa ti muule womimvo ndhoka mbali oKalaba oya dheula aadhani oyendji na oyi na omwaalu gwaadhani ya mona ondondo onti 6 muudhano mbuka.

“Ondondo ontihamano ohayi thindikilwa kepaya embulawu nezizi muudhano woshiviha shoJunior naashoka shoSenior,” George ta ti.
Okwa lombwele, Gavena kutya, oKarate oyo oshinima oshiwaanawa unene tuu sho shina uunongo hawu vulu okulongithwa komuntu moku igamena uuna iiyadha monkalo ya nika oshiponga.

Onkene kayi shi ashike uudhano wokwiinyanyudha ngaashi uudhano wumwe. Mbuka owuna wo oshitopolwa shokulonga omuntu nkene ena okwiigamena nosho wo nkene omuntu ena oku ihumbata nawa moshigwana, a ti olwindji uudhano ohawu eta omaihumbato omawanawa nogeli pombanda maadhani.

“Onkene otwa eta oludhi luudhano olwaanawa na oluna oshinge moshitopolwa, iiyimati yuudhano mbuka oyo mbika twe ku etela nena mpaka ashike oKalaba yetu oya taalelwa komashongo ngaashi iilongitho yomaudhano, otwa taalelwa wo komukundu gwoshimaliwa moka omathimbo gamwe hatu iya dha itaa tu vulu okukutha ombinga momaudhano oshoka itatu vulu okufuta omalweendo niipumbiwa yilwe.” Omunashipundi a ti.

Ngoloneya Nghaamwa okwa li uulike ohamu kwaashoka oKalaba ndjika ya longa muule wokathimbo okafupi na okwa li eyi kumike yi longe nuudhiginini opo yi vule okutsikila niilonga iiwanawa mbyoka taya ningi ngashiingeyi. Okwa uvaneke ta ka kambadhala kehe mpoka ta vulu opo a tale nkene te ya kongele omakwatho opo ya vule okwiitumbapo yo ya kale yi ithikamena.
Omunashipundi ota indile aakalimo yomEenhana opo ya wayimine oKalaba ndjika yo ye ki imoneneko yoyene.
Okarate uudhano hawu dhanwa noonyala dhowala na ohawu longo omuntu nkene ena okwiigamena , na ohawu dhanwa muuyuni awuhe muAfrica owa li wa totwa lwotango mo 1982 watotelwa moCape Town shaSouth Africa, no moNamibia owa li weya mo konima yemanguluko mo 1992.

LEAVE A REPLY

Please enter your comment!
Please enter your name here