Omukwaniilwa otaka koleka eshainokaha lye mOmpangu

0
501
WINDHOEK, 18 November 2009 - Seated is the Minister of Education, Nangolo Mbumba (l) at a media conference on Wednesday where the Development Bank of Namibia (BoN) Chairperson Elize Angula was speaking at the announcement of a massive N. dollars one million donation for the upgrading of the Onesi Secondary School in the Omusati region and the Ohangwena Primary School in the Ohangwena region. (Photo by: John Tuerijama) NAMPA

Maria Namupala
OLUNO

Omutseyiveta Elize Angula ngoka eli le po omalenga gaNdonga ga tidhwa miilonga okwa lombwele aakwashigwana taya yambidhidha oonakukuthwa miilonga mbaka kutya otaka pula opo Omukwaniilwa Immanuel Elifas a koleke eshainokaha lye mompangu yopombanda.
Pethimbo lyoshigongi shaayehe shoka shali sha unganekwa komalenga ga tidhwa, Angula okwa ti omukwaniilwa okwa pumbwa aka lombwele ompangu ngele oshihako shostambe shoka tashi popiwa sha ndulukwa po osho shili, nongele eshainokaha ndyoka tali holoka momishangwa odhindji mwa kwatelwa naandyoka lili koombapila dhomatidho gomalenga olye ngaa.

Eindilo opo Omukwaniilwa a koleke iinima mbyoka kOmpangu yopombanda mOshakati olya ningwa pehala lyomalenga ngoka ga tulwa pevi muApilili osho wo ga tidhwa muulenga omasiku ga zi ko.

Omalenga naawiliki yopahedhi mbaka oyo John Walenga, Kashona kaMalulu, Fillemon Nambili, Joseph Asino, Vilho Kamanya, naPeter Kauluma. Angula okwa lombwele aakwashigwana, kutya omalenga ngoka ga pingenepo ngoka gahetatu ga kuthwa miilonga ka ge li paveta, nopwa pumbwa okukatukwa oonkatu kukwashilipalekwe kutya omulandu nooveta dhopamuthigululwakalo odha landulwa ngaashi shina okukala.
“Onda hala owala okukwashilipaleka kutya omalenga ngoka taku tiwa oga tidhwa ogo omalenga natango, naangoka ta kuti oge ga pingenapo kapuna uushili, molwaashoka ngoka ga tulwapo pethimbo ndika inaku landulwa omilandu nooveta dhomithigululwakalo ngaashi shina okukala, oshowo inashi enda pamautho nopamisindalandu dhopamuthigululwakalo moshilongo,” Angula ta ti.

Okwa ti omalenga ngoka ga tulwa po ngaashingeyi ka ge shi omalenga oshoka inaga ulikwa paveta, notaya longo ngaashi taya vulu ya kwashilipaleke kutya omalenga ga kuthwa miilonga oga shuninwa miilonga yago, nenge iinima ayihe oya longwa pauyuuki nopaveta yomuthigululwakalo ngaashi shu uthwa.

Angula okwa ti opwa tulwa esiku ndyoka tali ka tseyithwa mbala, opo aakwashigwana ayehe ye ki ipulakeneneko yoyene kompangu yOpombanda mOshakati, hoka woo kwa tegelelwa Omukwaniilwa ye mwene a ka gandje ombinga ye yehokololo.

Okwa dhimbulutha oshigwana kutya Omukwaniilwa ina falwa kompangu, ashike otaka hokolola ashike okuyelitha etidho lyomalenga ngoka.
Aakwashigwana mboka yali ya kutha ombinga moonkundathana moshigongi moka, yamwe oya holola pwa ndulukwa oshihako shestambo neshaino lyomukwaniilwa, shoka ya ti kasha li paveta nosha pumbwa okuhulithwapo, molwaashoka otashi longithwa pamukalo guulingilingi.
Yamwe oya holola kutya hamikanda adhihe tadhi gandjwa moshigwana dhina uushili, thimbo limwe edhina owala lyomukwaniilwa tali longithwa papuko.

“Tse otuna uudhigu molwaashoka pomukwaniilwa ihatu thiki po we nonande tu na ehalo okumu mona, nenge tu longithe omikalo noondjila ndhoka tuna okweenda inatu vula okumu mona,” aakwashigwana ta yati ngaaka.

Gumwe gwomwaamboka yali inaaya vula okumona Omukwaniilwa omwa kwatelwa ngoka ali elenga enene moshikandjo shAmuteya Vilho Kamanya ngoka a hokolola kutya okwa kambadhala okutalela po omukwaniilwa konima yetidho, iikando itatu, ashike ine shi pondola okumu mona molwaashoka kehe siku a yi ko opuna omatompelo gaafele.

Moshigongi shika shali sha ningilwa poshinyanga shiigongi pOluno, omalenga ngoka ga kuthwa miilonga oga tokola pamwe naayambidhidhi yawo okuka yunga ontanda pUuwa pOnamungundo nelalakano okumona Omukwaniilwa.
Patokolo lyoshigongi shika eyungo lyontanda ndika, otali kala mpoka sigo esiku ndyoka taya tsakanene nOmukwaniilwa, ya popye nokukundathana shoka tashi inyenge melelo lyomuthigululwakalo gwaNdonga.
Pahapu dhe mwene omupopiliko gombala pamwe nomukwaniilwa Naeman Amalwa, okwa ti ita vulu okutya ko sha omanga inaa pewa epitikilo kOmukwaniilwa, nokwa uvaneke taka tseyithila iikundaneki shoka Nkeyama a ti kwaashoka.

LEAVE A REPLY

Please enter your comment!
Please enter your name here