Omumwange kadona okwa dipawa moipafi yange

0
2540

Komotoolinghundana
ONGALI

“Heeno shili otwa pandula molwaashi epengelo letu letu dimbuluka noletu tala ko ovakondjelimanguluko, ashike kandi na nande efiku ndika dimbwe nghene omakakunya (ovakwaita vaSouth Africa) a nyeka nge ounona vange aveshe vavali, veli pitifila po ashike okafimbo ka xupi… Ouyehame ou omunene unene,” aa okwali omatumbulu aTatekulu Immanuel Katha Nangolo, mwene womukunda Ongali moshikandjohoololo Ongwediva oo a kanifila ounona vaye mekondjelo manguluko. Nangolo otati nonande ye novaneumbo laye va mona oixuna ilula komake ovakwaita vetanga leameno laSouth Africa, kena nande efikulimwe momadilaadilo aye mudje efano loshiningwanima shomomafiku 16 Febuluali 1987, eshi omona oo ali ena okaana kokahanana, a dipawa moipafi yaye. Mefiku omo tuu omo, ovanamukunda vaye ovo vali ovashiinda shavo navo ova dipawa va lyatelwa meumbo komakaspeli. Nonande pali pa pita eedula 25 eshi Katha a popilwe naye koshifo shimwaina naKundana shoNew Era, okwali ta hokolola oshiningwanima shafa ashike opo sha ningwa onghela.

Otati efiku olo ye novaneumbo laye ovali mepya tava limi, eshi vamona omaboofola, omakanona nomakaspeli mahapu taa piti peumbo lavo, a lambafana. Nokonima yokafimbo okwa ka dja odila, yoita natango ya tuka pomitwe davo ndele tai ka dilongela ya yuka oko kwa yuka omakaspeli.

Odila onhivali oyadja ko, nohaluka oya tameka okuumba
“Oshikuti shotete eshi va umba osha yasha omumwange Rebecca. Eshi nda mona kutya okwe li denga po, onda vakula po okaana kaye, ndele hai faduka po nda yuka meumbo. Ovaneumbo lange aveshe navo ova landula nge. Ovakwaita voPLAN mboli navo ova li va hondama poixwa yopopepi kouninginino weumbo navo ova tameka okuumba, omanga omakakunya a li taa umbu a ama koushilo weumbo fye otuli pokati.

Olwoodi olo ola tameka naanaa po09h00 ongula ndele fiyo opo imwe yomutenya,” osho Katha a ti nondaka tai ngengema.
Efiku la landula ko Nangolo okwa pita ta ende ta tale momukunda waye, nopo a dimbulula kutya eumbo lopoushiinda shaye omo mwali ovakulupe vavali ola li la hanaunwa po filufilu, la lyataulwa po komakaspeli.
Mboli ovakulupe ava Antonio naNaemi Shindodi navo ova fila mo.
Nangolo ta ti, ova tokola opo ngeno va pake ovakulupe ava, ashike omanga vali va kalela ombila, omakakunya okwe ya nomakaspeli ao, ndele tava pombola mo omidimba momakumbada omo dali da hondjelwa.
“Fye nomukulukadi wange ovetu kufa ndele tave tu umbile mekaspeli pamwe nomidimba odo twali hatu pake. Ovetu twala kodolongo kOshakati, oko twa kala hatu hepekwa neenghono. Ova ka efa nge ashike konima yoshivike po opo ndeya okupaka omumwange novashiinda shange,” Nangolo ta ti.
Konima ashike yomafiku manini eshi a paka omonakadona, omonamati munini wedina Shikongo naye okwa dipawa koboma oyo yali ya fiwa po kovakwaita mefiku lolwoodi.

“Omakakunya okwa dipaya ounona vange aveshe vavali. Ngeno okwali in ava fiya po oboma oyo, Shikongo wange ngeno nena okuna omwenyo,” ta ti ngaho ye ta kengele omahodi. Nangolo ta ti nonande oinima yatya ngaho ei ngilwa pamwe nomukunda waye, emanguluko olo tali tyapulwa nena moshilongo otali mu hekeleke, na ota pandula eshi ye navahapu ovo va mona oixuna ngaashi ye va nyolwa nohava mono omboloto kepangelo olo leva tala ko onga ovakondjeli manguluko. Eemeta ashike dinini okudja peumbo la tate Katha, eumbo la meekulu Emilia Ongeleni Kanyolo. Meekulu Kanyolo naye oo a popile noNew Era okwa hokololele kutya pomukunda wavo opa kala ashike pena ombili, pehena nande ombudi yasha, fiyo opeedula domilongo heyali eshi umwe womovanamukunda aka lopota komakakunya kutya pomukunda wavo “ohapa kala oikulo”.

Okudja opo omukunda wavo owa ninga oshihakanwa shomahepeko, ngaashi okudengwa, okupulwapulwa, nokuxwikwa nomalusheno nomadipao kovakwaita vaSouth Africa. Nonande aishe ei ya kala nokuningwa, ovaNgali ova twikila nokuyandja oikulya nokuholeka ovakwaita voPLAN.
Oikulo ngee oyeya fye ohatu i pe ashike okulya, hatu i nangeke shaashi ovana vetu voo ookaume ketu katwali hatu dulu nande nande okuva ninga nai shaashi ovali tava kondjele emanguluko,” osho meekulu yaKanyolo a ti.

Mokudimbuluka efiku a li a dengwa okufya komakakunya, waKanyolo ota ti efiku olo, okwa hangwa ashike opo a yandje oshikundu noikunwa imwe kovakwaita voPLAN eshi omakakunya a mbaduka peumbo laye ina shi teelelwa, tava pula vati apa a holeka ‘eetoli’.

“Ekakunya limwe loshilumbu ola tameka nokuli tali denge nge, loo tali hanyene nge vati nandi popye. Manga ashike veli pyakidila noku denga nge, poo opa umbwa ondjebo. Ondi wete kutya ovakwaita vaSwapo vaumba shaashi opo ashike twa hangwa twe va pe okunwa, sha hala kutya inava hangwa va ya kokule. Shilumbu okwa pange ombili ndele ta faduka po a finda kekaspeli lavo. Onde mu ingida handi ti ina pange vali ombili nande efiku limwe, shaashi okwa denga nge nale,” osho omukulupe ou a ti.
Konima ashike yokafimbo loo olwoodi pokati kovakwaita vaSouth Africa noPLAN ola tameka.

Meekulu Kanyolo novanamukunda vakwao ova tokola opo va faduke po, ashike omakakunya okwa nhuka mo ashike mekaspeli, mokati ashike keeholo omo ndele taa tameke ookumu denga, manga eeholo tadi umbwa okudiilila keembinga adishe.
Efimbo limwe lomakakunya olakufa waKanyolo tali mwiivikile naye oku li a mena opo li ha yashwe koikulo.
“Vakwao ova kala tave mu ingida kutya na efe nge ashike okwe va nyamukula ta ti ye ina endela oita okwe ya oku longa ‘omulodi’ ou oshilongwa,” ta ti ngaho.

Konima eshi olwoodi olo la ninga konyala eevili hetatu, ovanamukunda, wa Kanyolo okweli koka fiyo opeumbo laye opo ovanamukunda vakwao ve uya okumutumba nokumu twala koshipangelo. Edengo eli ola li la etela omukulupe ou ounghundi na ina dula oku tyapula onghalo youkolele okudja kefiku olo.

Erickson Iiyambo ye okwa li a hokolola nghee voo navamwe vovanamukunda mOngali vali nokuli veli xupula, nohava tula eemwenyo davo moshiponga eshi hava ende va lambalala omaluxwa momukunda wavo omo, tava kongo omalutu ovakwaita voPLAN ovo va fila momalwoodi opo veva pe omapako opaunhu.

“Efimbo nefimbo oshima ashi oshe tu tula moupyakadi ngeenge omakakunya e shi udu. Ashike ohatu teelele ngoo pa pite okafimbo ngee olwoodi la oka, fye tuka konge nawa omalutu shaashi efimbo limwe ohaa lika keembwa. Ohai dimbuluka omukwaita umwe ina tu dula okumu paka shaashi olutu laye ola li la lika po filufilu keembwa,” Iiyambo ta ti.

Iiyambo ta ti nonande va mona oixuna ngaho omukunda wavo onghene ngaho wa twikila okukala kau na omeva, kauna olusheno, kau na opate, vo veli kokule noipangelo ile nee oukilinika nonande pefimbo olo pali pa pita omido 23 okudja kefiku lemanguluko.

LEAVE A REPLY

Please enter your comment!
Please enter your name here