Otonamende yokEpembe otayi tameke Omaandaha

0
70

Shipi Elago
EPEMBE

Uudhano wokomumvo momukunda Epembe oko wu li no nuumvo na owa tegelelwa wu ka tameke Omaandaha oshiwike tu uka.
Pethimbo a li ta gandja omulombo ku Kundana Paulus Haimbala omukwatelikomeho guudhano mbuka okwa holola kutya uudhano mboka hawu dhanwa aluhe otawu ka galukila mondambo sho oosipana ndhoka tadhi ka kutha ombinga tadhi ka kondjela okapandi kooN$15 000.
Ongenga Chiefs ndjoka oyo enyakwa lyuudhano mbuka oya tegelelwa yi ka tale ngele otayi ke shi pondola okugamenena po ekopi lyawo ndyoka ya li ya sindana po omvula ya ziko.

“Otonamende ndjika oya egulukila oosipana adhihe moNamibia onkene ndhoka dha hala okukutha ombinga nadhi shi ninge omanga ombali yomutenya mOsoondaha ndjika inaa yi dhenga, oshoka ombali shampa ya dhenge nena otatu ka tameka nodraw moka tatu ka tothamo kutya osipana yini ta yi kadhana na yini,” Paulus a ti.

Okwa ti oosipana ndhoka dha hala okukutha ombinga na dhi shi ninge nondjungu oshoka omahala ota ga ende nale taga shonopala sho oosipna 12 dhi ishangitha nale muudhano mbuka. Oosipana odha tegelelwa dhi ki ishangithe kooN$850.

Paulus okwa ti okwa thiminikwa konkalo yaagundjuka haya kala olwindji taya ningi iinima itaa yi ya tungu noku tunga oshilongo, onkene a tokola okweeta po uudhano mbuka opo eete aagundjuka pomaudhano. Okwa eshongo ndyoka taalela pethimbo ndika oondyoka lyuupale kaa wuli pomuthika omwaanawa.Ihe nando ongaaka shika itashi shuna omalongekidho monima.

Epembe oli li moshikandjohogololo shaNgenga moshitopolwa sha Hangwena nuudhano otawu ka dhanenwa mokapale kOmuthitu gwaKambembe.
Okwa ti okapale hoka oka putudha aadhani aakulu moshitopolwa na okena ondjokonona okuza moomvula dhonale onkene okwa ithana aakalimo yomoshikandjohogololo shaNgenga niitopolwa yopuushiinda opo ya ka holoke momiyalu ominene opo yeye ya yambidhidhe oosipana dhawo.

Okwa ti oosipana naayambidhidhi ya dho oya tegelelwa ya kale taya ihumbata nawa opo ombepo yomaudhano ndjoka ya pumbiwa yi kale po, wo uudhano mbuka wu ka ende nawa.

Uudhano womomikunda ohawu kala wa owindji pethimbo lyomasiku ga simana unene tuu sho aantu oyendji ya za kiitopolwa ya yooloka haya tsakanene onkene koyendji ohashi kala ompito ombwaanawa opo ya tyapule pamwe omaudhano.
Ndjika oyo wo ompito ombwaanawa kaadhani aashona opo ya ulike iitalenti yawo yo ya monike kooyene yoosipana oonene noku ilikolela omahala moosipana hadhi dhana mooliha oonene dha yooloka moshilongo.

LEAVE A REPLY

Please enter your comment!
Please enter your name here