Ya hala iimuna yi futwe pangushu yoonime

0
55

Loide Jason
ONAMATANGA

Aakalimo yomOnamatanga moshikandjohogololo shaRuacana, moshitopolwa shaMusati oya pula epangelo li kale hali ya futu oshipambu shooperesenda dhongushu yiiyamakuti mbyoka ya gamenwa, uuna iiyamakuti ya dhipaga iimuna yawo.

Eindilo ndika olya ningwa pethimbo lyoshigongi shoka shali pOnamatanga omasiku ngaka. Moshigongi shika omwali aanambelewa yepangelo okuza tuu kuMinista yOmudhingoloko nUupashiyoni Pohamba Shifeta, Omupevikuluntu gwOpolisi yaNamibia, Majola Ndjai Desiderius Shilunga, Gavena gwaMusati nosho wo ookansela yiikandjohogololo ya yooloka mOmusati.

Aakwashigwana yamwe oya pula kutya omolwashike uuministeli tawu gandja omwaalu gwoshimaliwa shi li pevi noonkondo kwaamboka, iimuna yawo ya lika po koonime omanga ongushu yoonime yili pombanda.

“Otwa uva kutya ongushu yoshimaliwa shoka oyi thike pooN$500 000, oshike omuntu ngoka a yonenenwa konime itaa pewa oopersenda nande odhili 30 dhoshimaliwa shoka opo a kale a mbilipalelwa sho oshimuna she sha yonwa po,” ndyoka olyali limwe lyomomapulo ngoka ga pulwa Shifeta kaakwashigwana.

Ashike minista Shifeta okwa ti ngashingeyi uuministeli owi ipyakidhila noku ningulula omulandu ngoka tagu kwatha mboka taa ki iyadha ya yonenwa iimuna yawo kiiyamakuti ya gamenwa.

Okwa ti pethimbo ndika mbaka ohaya pewa ooN$1 500 mongombe ngele oya lika nenge ooN$700 mondoongi ngele oya yonwa po.
Pohamba okwe shiyeleke kutya opwa tulwa omautho ga yaga kegonga ngele tashiya pokugamena iiyamakuti onkee aantu ina ya kambadhala nande oku ikuthila ompango momake gawo yene. Moshigongi moka aakwashigwana oyali ya kumagidhwa ya ethe po, okudhipaga iikwakuti ya gamenwa uuna ndoka mbika ya dhipaga iimuna yawo. Okwa ti ngashingeyi ngele gumwe okwa adhika a dhipaga ompanda ota pewa egeelo lyoshimaliwa shi thike pooN$25 oomilliona , nenge oomvula omilongo 25 mondholongo nenge ayihe pethimbo limwe. Ihe okwa ti aakwiilongo mboka taya ka kwatwa yeli moshikumungu moka otaya ka geelwa nokonima yondholongo otaya shunithwa kiilongo yawo. “ Ngele omukwiilongo okwa kwatwa moshikumungu shika nena esiku ngaa ta mana okulongela egeelo lye olyo ngaa ta falwa kokapale a ye koshilongo shawo,” osho Shifeta a ti ngaaka. Okwa kumagidha aakwashigwana ya ikaleke kokule nokulongithwa kaantu mokudhipaga iithitukuti ya gamenwa oshoka ompango oya kindja.

Okwa kumagidha mboka tashi vulika ye ki iyakele mEtosha a ti otaya tula oomwenyo dhawo moshiponga oshoka ngashingeyi omwa tulwa ookommando dhetanga lyegameno odho tadhi tonatele iiyamakuti.
Okwa ti ngele oya yi mo ya homata nena otashi vulika shi ke ya etele eso oshoka etanga ndyoka itali dhana nando okashona.

LEAVE A REPLY

Please enter your comment!
Please enter your name here