Eehuhwa dayandjwa pOkasheshete ovanhu vamunike

0
236

Tusnelde Nghilinganye
OKASHESHETE

Gavena woshitukulwa shOmusati okwa tokola kutya oshitukulwa shae ita shifi ondjala nande yee mwene taufanwa Endjala. “Onda koneke puna oluhepo leeproyeka moshitukulwa, nonda didilika kutya ounafalama wokumuna eexuhwa oupu lela. Onghee onde ya po nedilaadilo opo ku totwe eeproyeka dokumuna eexuhwa, nokutofamo eenhele ngaashi, Okahao, Okalongo, Etayi, Elim, Otamanzi nOnesi, omo nee mu totwe ounafalama weexuhwa. Omatala eeproyoyeka edi peenhele da tumbulwa pombada adishe kumwe odili pongushu yeeN$48,000.00. Noproyeka keshe otayi ka mona eexuhwa 350,” osho Gavena Erginus Endjala ati.

Okwali ta popi pefimbo ta yeulula nokuyandja ouxuxwena 120 poporoyeka yaKoonkondo kuliwa, oyo ili momukunda Okasheshete moshikandjohoololo Onesi oshivike sha ya.

Endjala okwa shivifila ovakwashiwana ovo va tokola okulikufa moluhepo ta ti: “Onye ovanelao shili osheshi oporoyeka yeni oyo yotete
okupewa eexuhwa dokumuna. Nge omwa kondjo nokulonga noudiinini ndee ta mu tekula eexuhwa deni, otamu ka pewa vali olweefo olutivali.
Opena omhito iwa osheshi meexuhwa odo, ota mu kakala yoo eexuhwa odo dili po ashike dokudala omayi nopena nale omashina okukulifa nokutendula.”

Oproyeka ei Koonkondo Kuliwa, oyali, tete oproyeka Tukwathela Support group oyo yali ya totwa po pakwafelo laDenmark peedula do2003 fiyo 2004. Oili onhele yakula ili lopohektala 30. Ashike ovakwashiwana kavali va manguluka okulongifa endiki eli, naavo vali vatulwa po tava longo ongo ovahungimwenyo otava ti ovali tava longo noudjuu onghee ina iya komesho oya hanauka po. Gavana mokumona onhele opo patulwa etala liwa nolo pashinanena, okwa yandja omayele opo oproyeka iyambulwe po. Okwa kumaida ovakwashiwana opo valonge noudiinini, nokwe vatwa omukumo ta ti; “onhele oyakula no ina okutulwa moitukulwa inhe.” Oshitukulwa shotete opo po patungwa etala lokumunina eexuhwa shaashi olakula, ouxuxwena nge ovakulu onhele otai tukulwa yoo moitukulwa inhe, opo eexuhwa dikale tadi fuda nokukala da manguluka nawa.

Onhele onhivali, Endjala okwa yandja omayele opo ikale onhele yoshikunino, okutulamo oihape niingumutulu. Monhele oyo tuu oyo omuna ediva lakula, olo a lombwela ovakwashiwana kutya okuna okuvakondjela opo ediva olo pefimbo lodula mukale tamu longwa nokukunwa olwishi.

Ovakwashiwana unene tuu ovo, veli manga kumwe nokulonga moproyeka, mediva ovaka shula mo omwiidi, omikuto difike pomulongo nahetatu, Gavana okwali a hafa nokwali a taulula onhele oyo nokwamona kutya omuna ondama, pahokololo olo la yandjwa kovakwashiwana otava ti ondama oya ningwamo kovaDenmark nomwali mwatulwa eeshi, ashike shaashi oya longwa ixupi eeshi oda va kwamo kounona vopomudingonoko.

Popepi nodama opena yo ediva nalo lalongwa nawa lafa ondama, otakutiwa ediva eli ihali pwiinine shaashi olina ofifiya medu.
Endjala okwati opa pumbwa okulandwa okashina kakale taka pombo omeva mediva, ominino, nondoloma yokutulwa omeva opo oshikunino osho sha diladilwa shimone omeva efimbo keshe, onghe opena okuningwa ekwatafano noshikondo shounamapya.
Enenedilaadilo oleli kutya onhele oya pumbwa ovalongi velitulamo shaashi omuna okulongwa lela. “Ovakwashiwana ova pumbwa yoo okulinyolifa koNavivi, opo vapewe eembuto nokuninga oshitopolwa shimwe epya lavo ndee nghe lilipo olokukunwa ashike oilya yokuninga eembuto,” osho a tonga.

Endjala okwa pandula mwene womukunda oo a yandja onhele iwa noinene opo ikale onhele yovakwashiwana. Victoria Shooya oo eli omunambelewa omukulunhu okwali yoo a lombwela ovakwashiwana opo va longele kumwe, nokuvakumaida kutya onhele oyo vakwashiwana aveshe kaina kutya otai tumbulwa nedina lalye. Nomukwashiwana oo ina hala elongelo kumwe na lopotwe kombelewa yoshikandjohoololo shaashi oyo ilile po ovanaproyeka.

LEAVE A REPLY

Please enter your comment!
Please enter your name here