Iilyo yoKoevoet itayi ka simanekwa ongo oonakulwa aakulu

0
90

Omupresidente Hage Geingob

“Eitaalo lyandje mompumbwe yuukumwe woshigwana olya kola ngaashi ashike ohole okuhola oshigwana shika. Ohole ndjika ohayi shituka uuwehame uuna ndiwete, ndi uvite no kupupa omawi,iitya osho wo omainyengo taga eta olutandu. Otatu ti itashi ningwa we. Inatu hala omafuta guululume, inatu hala omilonga dhombinzi, no inatu hala we oondombe dhomahodhi.

Aawiliki yetu oyo ye na, okugandja oshiholelwa nkene, oshigwana shetu shi na oku ihumbata, okudhiladhila nokupopya. Ihe pethimbo ndika moNamibia omuna onkalo tayi etitha omaipulo, tashi etwa komipopyo itaadhi vulu okupopilwa dho dhaana oshili mudho. Onkalo ndjika itayi tsu kumwe notema ndjoka epangelo lyetu lya kala nokulonga oshigwana poompito odhindji okukala shi itaala muNamibia limwe, noshigwana shimwe. Otashi holoka shafa tse ongoshigwana twa tameka okutaambako kutya okushundulathana, okusithathana ohoni noku kala twaa na esimanekathano onkalo yili nawa nenge yaa na uupyakadhi wa sha. Otashi holoka wo twafa tatu taambako omaihumbato gaamboka ya kala nokukambadhala okutsitsimika onkalo yeipumomumwe, okuza tuu nkene oshilongo sha mangulukile. Mbaka oya kondjele eipumomumwe mokudhina omulandu gwesilohenda lyaana ondjoolola ndyoka lya gandjwa okusiikila omayono goongundu dhaakwiita yaSouth Africa osho wo mboka yoSWAPO.

Esilohenda ndika olya landula ehulithopo lyiita pokati kaakondjelimanguluko yoSWAPO naakwiita ya South Africa lyokatongotongo. Shika oshali sha ningwa okukaleka po ombili ndjoka tatu tyapula nena. Esilohenda ndika olyo omukanka hoka kwa tungilwa omulandu gwedhimanathane po lyopashigwana. Iilalo niishaho, ye, etwa kekondjelomanguluko kayina esiku na yi dhimipo, onkene otwi ilongo okumwenya monkalo ndjika. Monkalo ndjika tse otwi ilongo wo okumwenya pamwe, kashina mbudhi kutya tse otwa dhanene onkandangala yatya ngiini pethimbo lyekondjelomanguluko.

Katu na esiku tu ka itaalithwe kutya eindilo lyiilyo yoKoevoet nale oku simanekwa ongaa aakwiita aakulu otali tungu. Mbaka oyali haya futwa kwaamboka ya li ye ya pa iilonga na itaya ka pewa nando ofuto okuza kepangelo. Oshikwawo sha faathana naashika ooshika kutya tse itatu ka itaalithwa kutya omaindilo ga gama olumbinga kutya oshinima shaamboka haya ithanwa iihakanwa yomalambo goSWAPO otashi kwatha metungo p lyoshigwana.

Onkene natu dhimbulukwe kutya omulandu gwedhiminathanepo lyopashigwana ogwa tulwa po nelalakano nonkambadhala okulafulula oshitopolwa shoka oshidhigu otashi ka egulula efundja itaali vulika lyongeyo. Oonkambadhala tadhi ningwa koohandimwe inadhi pitikwa dhi nkundipike noku nayipika ombili ndjoka tayi tyapulwa komuNamibia kehe okuza tuu nkene oshilongo shamangulukile.
Onkene mesiku ndika lyOmapendafule natu tokoleni opo tu humithe Namibia komeho mombepo yokukwatelamo kehe gumwe. Natu kongeni ehalo nondjila ndjoka tayi tu wilike mokufala komeho eigidho lyetu lyaNamibia gumwe noshigwana shimwe nokukwatela mo okuhalakanithapo onkalo yoluhepo nokwaathike pamwe.

Aanamibia ooyakwetu, otatu simanekeni tuu nawa eigandjo lyomapenda getu agehe? Otwi ilongekidha tuu okuya kumwe onga aantu yeli kumwe mombepo yoHarambee okuya komeho oku adha ondjodhi yokomumvo 2030 ongaNamibia limwe nOshigwana shimwe? Natu konakoneni utale nawa omitima dhetu nomuule wetu nokudhimbulukwa kutya otu na okumanitha ekondjo noku li eta pehulilo moku thikamitha po onkalo yopolitika, yonkalathano noyopamahupilo ya kwatela mo omuntu kehe. Natu ihomatekeni tseyene iikondjitho yapumbiwa osho wo omatati okusoshimpwiyu kutya otwa sindana moshiluku oshitiyali shekondjo lyetu. Natu ihomatekeni nonkalo yokuholathana ongoshigwana, onkalo yoku uva etumba kutya tse aana yaNamibia, tse aana yaAfrika tse oshigwana shimwe naantu yamwe. Uukwatya mbuka owo auke nda hala tu tsikileni noku ulika monkalamwenyo yesiku kehe.

Ngele otwe wu dhiginine noku wu simaneka pamwe nomikanka dhuuthike pamwe nethiko pamwe, itapu ka kala we omilonga ominene itaadhi vulu okutaagulukwa nenge oondundu oonde okulonda, mondjila yetu okukondjela omakankameno guuwanawa woshilongo shetu.
Nonando otatu simaneke nokudhimbulukwa omapendafule ngoka gaya nale, natu ndhindhilikeni wo kutya otu na wo omapendafule geli momwenyo pamwe natse. Otwa yambekwa okukala natango nomapendafule getu ngaashi Omukokoli Presidente Hailwa Sam Nujoma nOmuperesidente nale Hailwa Hifikepunye Pohamba mokati ketu. Natu ilongeni oshindji kuyo mboka yeli oongudhi dhekondjelomanguluko lyetu osho wo kaakondjelimanguluko yalwe na tu longeni noku ulukila oyana yetu ombepo yawo yokulonga nuudhiginini, okwiigandja, okutunga oshigwana, uukumwe nuupenda.

Namibia oku na wo omapenda gesiku kehe ngoka taga igandjele oshilongo molwohole yasho no itaaga pula nando esimaneko nenge okuyalulwa.Mokudhimbulukwa aantu mbaka haya longo sha pitilila momikunda dhawo, onda hala okudhimbulukwa, okupendutha, nokutumbula noku ithana omadhina gamwe gaamboka ya tetekela, ndele nando ongaaka otaye tu tala nomeho guutalambambi esiku kehe mpoka yeli:
KuHanganee Katjipuka Kavezeri, otandi ti uupenda woye natango owuna omwenyo;
KuAndimba Toivo ya Toivo; oshilalo shezepo lyoye natango oshitalala, na otatu ku dhimbulukwa aluhe;
KuJason Ndadi, ombepo yekondjo yoye otayi tsikile;
KuNataniel Maxuilili, eitulomo lyoye olyo uuyelele mboka tawu tu wilike;
KuGreenwell Matongo, otatu papatele uupenda woye;
KuMoses Garoeb, otatu ku saluta.

KuHosea Kutako;
Dimo Hamaambo;
Maxton Joseph;
Mose Tjitendero;
Richard Kapelwa Kabajani;
John Pandeni;
Peter Tsheehama;
John ya Otto Nankudhu;
Frederick Matongo;
Andrew Intamba;
Gerson Veii;
Mzee Kaukungwa;
Hidipo Hamutenya;
Niko Bessinger;
David Meroro;
Peter Nanyemba;
Homateni Kalyuena;
To Isak “Pondo” Shikongo;
Natalia Mavulu;
Augustus MacNamara Nghaamwa;
Putuse Apollus;
Lineekela Kalenga;
Kakurukaze Mungunda na yalwe oyendji, otatu ti ku ne nena, eigandjo lyeni ina mu shi ninga osima yowala”.

● Oshinyolwa shika osho efupipiko lyoshipopiwa shOmuperesidente Hage Geingob pethimbo lyedhimbuluko lyOmapendafule pOkapale kEmanguluko mOshakati mesiku 26 August.

LEAVE A REPLY

Please enter your comment!
Please enter your name here