Kumika ota pupaleke oonkalamwenyo dhaavali

0
55

Maria Namupala
OMUTHIYA

Ehangano lyaKumika Community Centre otali pupaleke oonkalo dhaavali oyendji miitopolwa ya yooloka monooli yoshilongo. Oshiwike sha ziko olya gandja omagano goondooha dhomahini gaanona kaakalimo yomoshitopolwa Oshikoto.
Egandjo lyoondooha ndhika olya ningilwa pombelewa yaKumika mOmuthiya, Omutotipo gwehangano ndika Ndahafa Nantanga, okwa ti ehangano ndika inali yama kepangelo, nohali kongo iiyemo kulyo lyene, mbyoka hali kwatha nalyo aavali mboka yeli mompumbwe yomahini okutekula omaluvalo gawo.

“Kumika okwa totwa po kaapangi aaNamibia mo-2008, mbono ya mono omwaalu gwaavali taya lumbu nombuto yoHIV/AIDS tagu londo pombanda. Mbaka oyali ya mono pe na ompumbwe onene okuyambidhidha nokukwatha aavali mboka okuyapa oondooha dhomahini ya vule okupa omaluvalo gawo mpoka tashi vulika,” Nantanga ati ngaaka.
Nantanga okwa gwedha po kutya olundji ohaya tala aavali mboka yeli miitopolwa yokolundume lwoshilongo, taya hupu nuudhigu, no ka ye na iiyemo okulanda omahini ya pe oyana. Olundji, aavali mboka oya monika ye na uunkundi noya pewa elombwelo kutya ina ya yamitha we kontulo.

Kakele kokugandja omahini, ehangano ohali gandja iipalutha yilwe ngaashi uusila wepungu, omagadhi gokulya niipumbiwa momagumbo, yo aavali ya vule okupalutha aanegumbo yawo.

Omukuluntuwiliki okwa ti ohaya gandja omayakulo, nootundi nkene aavali ye na okukaleka po uundjolowele momagumbo osho wo momidhingoloko dhawo. Oha ya gandja wo omapukululo kaalongwa mboka taya nyengwa kiilongwa yawo pethimbo lyomafudho gosikola.
Nantanga ta ti poompito odhindji oyi iyadha taya kwathele aanona ha ya ilongo nawa, ashike ka ye na omakwatho, nolundji oha ye ya landele omizalo dhosikola noku ya futila osikola.

“Ohatu pula omakwatho komahangano ga yooloka moshilongo, opo tu vule okuyambidhidha aavali mboka taya nyengwa, otwali twa pewa oshimaliwa shooN$ 50 000 okuza ku limwe lyomomahangano omakwati goohi , opo tu vule tu lande oondooha dhomahini, go ga pewe aanona mboka ga nuninwa, oyendji yomaavali mboka ya pewa oyena aanona yaakwana, naamboka taya nyengwa okutekula aanona yawo,” ati ngaaka. Gumwe gomwaamboka ya mona uuwanawa okuza mehangano ndyoka, okuku Loide Angula momukunda Eendombe mOmuthiya ngoka a holola enyanyu lye, a ti ehangano olya kwatha okatekulu ke hoka ngaashingeyi ka koka.
Okwa gandja ehokololo lye kutya okwa, kanitha omwana konima yoomvula ndatu ngaashingeyi, nokanona hoka oka thigwa po owala kena omwedhi gumwe. “Onda pewa omayele nuuyelele ndi shangithe okatekulu ketu kombelewa yaKumika, nonda kala handi taamba omahini sigo omunona a koko ngaashingeyi okuna oomvula 4, otwa pandula unene sho Kumika ta pupaleke oonkalamwenyo dhetu onga aavali,” a popi ngaaka nenyanyu.

Pethimbo ndika ota ti molwaashoka okatekulu ke oka koka, oha pewa uusila, omagadhi gokulya niipumbiwa yilwe yomegumbo. Tati mbyoka oye ya kwatha poompito odhindji okuhuma komeho nokupupaleka oonkalamwenyo dhawo.

Kertu Hamunyela gomomukunda Omalindi, okuna uunona wuukwana, nosha kala she mu dhigupalela okuwutekula okuza petameko, okwa tameke okupewa omahini kuKumika, nopethimbo ndika uunona we owuna oomwedhi ndatu no tawu koko nawa.

“Sho twa tameke okupewa omahini uunona owali wuna iiviha yili pevi, ashike muule womasiku omashona, oshiviha osheende tashi lunduluka ngaashingeyi owa paluka, nondu uvite ombili te pandula ehangano ndyoka tali tu kwatha moonkalamwenyo dhetu,” Hamunyela a popi ngaaka.

LEAVE A REPLY

Please enter your comment!
Please enter your name here