Moshitila Mwa Z’Ondjupa: Oonzo dhokwiimonena iiyemo niilandithomwa

0
60

Onzo 1:Egongelo lyiilandithomwa

Sho twa ka kala kOmbaye, aayunguli otwa li hatu hawala iinima mokomboni, ngaashi omakaya nando omuntu iho ga nu. Otwa li wo hatu hawala oondjema, oothewa dhomakandanga dhi li po oonde dhoondjila hadhi ithanwa omakosha.
Iinima ayihe mbyoka kanda li handi yi longitha po, onda kala ashike handi yi tula momayemele ngeya ga za oopainda, e tandi ga siikile, e tandi ga tula mooshako, e tandi ga hondjele mo, e tandi shanga ko edhina lyandje, otandi li umbu, e tali yi nongushe kOshomeya.

Iinima yandje mbyoka, onda li handi yi undulile nduno komukulukadhi gwomumwameme Paulina, yimwe e yi landithe po. Sho nda shuna kOwambo, onda adha iipakete oyindji mbyoka nda li nda tuma ya thika nale kegumbo. Ongushe ethimbo ndyono koshitopolwa shetu oya li yi li kUukwangula mUukwambi, namumwameme Paulina oko nduno he ke yi tala hoka.

Ongushe oya li yi na iihauto itatu hayi enditha iinima okuziilila mongushe yaNdangwa, oku yi fala komaha gi ili nogi ili. Oshihauto shimwe osha li hashi fala kUukwangula mUukwambi, oshikwawo shimwe ishewe, osha li hashi fala kOhangwena mUukwanyama.
Nando nda adha iipakete yiinima yandje mbyoka ndu undula okuziilila kiilonga kOmbaye ya thika kegumbo okweendela mongushe, eenditho lyiinima mongushe otandi li dhimbulukwa neuvonayi komutima, omolwa shimwe shomiinima yandje sha kanena mo.

Otandi dhimbulukwa kutya, oshipululo shandje shoka nda landa tangotango, ngaashi nde shi tumbula metetekelo, osha zile owala miimaliwa yokuhondja. Oshipululo shoka moku shi tuma mongushe opo andola shi ye kegumbo, mbela inandi shi mangela mo nawa mompunda moka nde shi tula. Mbela nani ando onde shi manga nuungodhi inaawu kola. Oshipululo shandje osha yakwa po mbela, nenge ongiini walye.

Oshipululo sha kanena owala mongushe, sigo okeluwa ndi. Oshipululo shoka osha kanitha iimaliwa yandje oyindji. Nando wu pule kapwa li pu na ngoka te ku uthile.Iinima ya kana oya li owala hayi landulwa, sigo oompoka pwa hulila omashina.
Shampa wala sha zi mOshomeya shu uka kombinga yokOwambo, opuwo, kape na we ngu te ku uthile kutya sha kanena peni. Sigo okeluwa ndika, oshipululo shandje shoka ohandi shi dhimbulukwa neyeme enene.

Onzo 2:Egongelo lyiimaliwa yokulanda iilandithomwa
Ngame kOmbaye onda li handi zi ko wo nduno niimaliwa oyindji. Iimaliwa onda li handi yi mono okuziilila mokuhondja. Iihondjomwa onda li handi yi shingitha mookomboni, ngaashi naanaa nda hokolola metetekelo. Kakele kelanditho lyiihondjomwa, ofabulika yaKeeninga oya li hayi futu nawa dhoshili, sho ishewe omwa li oompito dhokulonga omalutayima.
Kakele kokuza niimaliwa oyindji kOmbaye, iimaliwa yandje yimwe onda li handi yi adha kegumbo, oshoka oohulukweya dhimwe onda li handi dhi tumine kOlange dhi ka landithwe kuYamwaale yaSimeon yaShilongo.
Yamwaale sho ta landithile ndje oohulukweya dhandje, iimaliwa ka li we he yi tumine ndje kOmbaye ihe okwa li he yi faalele kegumbo uuna oomwedhi dhiilonga ye dha anda, opo yi ka pungulwe.
Nale kanda li ndi inekela iimaliwa yi ende mopoosa onda li owala nda tila kutya otayi kana.Lumwe aluke ti, nda pungulile iimaliwa yandje mOpoosa monkalamwneyo yandje yuunangeshefa.

Onzo: 3: Oholosaila yomOtjiwarongo
Uuna ishewe tandi zi kiilonga kOmbaye, onda li handi

zi ko ashike nokuya mOtjiwarongo, moka mwa li mu na Oholosaila ya simana. Yakwetu oya li haa thigi ndje mOtjiwarongo tandi landa iinima yandje. Oombulu odha li hadhi pula ndje olisinsa yokulanda mOholosaila, ihe kanda li ndi yi na, oshoka iilumbu oya li owala hayi pitika mboka ye na olisinsa oyo ya

lande mo, onkene oya li hayi tindile ndje ndi lande mo. Lwanima iilumbu oya ka pula ndje ngele ondi shi omuntu e na ombapila yokulanda mOholosaila. Lago lyandje, ko otaku zi omumentu gwomukunda gwetu, Lukas lwaKuushomwa. Omumati omukwetu ngoka onde mu ikunditha, opo a kwathele ndje nokwa zimine, e ta pula ndje ndi mu fute, ihe okohulo yoonyala.

LEAVE A REPLY

Please enter your comment!
Please enter your name here