Oonkundathana naLoide Hango

0
1057

Kundana okwa kundathana naLoide Hango, omukadhona ngoka nando ke na omaako, ina pitika opo onkalo ndjoka yi uthe kutya ye ota kala omushike. Konima yoku mona onkatulongo moPolytechnic yaNamibia nale, Hango ngashingeyi ota longo mOmbaanga yaWindhoek.

Kundana: Tu hokololela kashona kombinga yoye, kutya ongoye lye, nomuntu nguka twa tala nenge nguka eli komeho getu, tatu popi naye olye?
Loide Hango (LH): Ngoye oto popi nomukiintu omunyanyukwi, ngoka, ha popi shoka uuvite, osho wo omuntu gwaantu.

Kundana: Openi wa kokela, owa koko ngiini na oshike sha kala eshongo monkalamwenyo yoye, na owa longo ngiini opo wu taaguluke omashongo ngoka?
LH: Egumbo lyaandjetu olili mOlupumbu moshikandjohogololo, Oshikuku moshitopolwa Omusati. Onda tyapula uunona wandje; neityo lyonkalamwenyo pethimbo ndiyaka, okudhana nookuume kandje, okulitha iikombo, nokuhenuka okuya kosikola. Petameko lyonkalamwenyo yandje, osikola yoprima inandi yi tyapula nenge okuyi pandula naanaa. Onda kala handi kuutumba komeho goklassa yetu pevi, uuna tandi shanga, dhiladhila uutalala, ontsi nosho wo olupanda lwa luudha… Onda li ndi tonde onkalo ndjoka, no ya kala ngaaka sigo omongundu onti-6, ihe mewiliko lyaKalunga onda longitha omukalo omupe gwokushanga manga nda kuutumba koshipundi. Oshikwawo, onda hwepopeke okunyola kwandje oku shi ninga nawa, unene tuu sho nda li handi ende kashona. Kalunga omwaanawa shili.
Kundana: Tu hokololela nkene shali sho ngoye wa koko , nonkene ethimbo ndyoka lya nwetha mo etokolo, okulandula eithano lyoye?
LH: Onkalamwenyo yoyene nayo ontseyo muyo yene. Omuntu ito hogolola oku ihumbata nayi nenge nawa, okukala wa ngunya nenge wu uvite wa gwana, wa mbatha nenge wa ndjanga. Ngele onda pewa ehogololo pokati kaantu mboka taya yonagula po oonkalamwenyo dha wo naamboka taya kambadhala okwi ihumitha komeho, ngame otandi hogololola mboka yu uka komeho.
Omathimbo gamwe onda dhiladhila nonda mono ihuna ongame awike, nonda li nda hala ando ondi na omaako, ndele pa u shili ka pwa li shoka tandi vulu okuninga opo ndi kale ando ndi ga na.Ihe , otandi vulu wo oku adha oshindji monkalammwneyo no ndaa ga na.

Kundana: Oshali ngiini okukoka monkalo ndjoka wa kokele naandjika oye ku ningi wu kale omuntu wa tya ngiini?
LH: Eeno oshoshili… kapena omuntu keena omashongo monkalamwenyo. Onkalo yandje oya hwepopeke ke ndje. Ngashingeyi ngame omuntu ndina omadhiladhilo ge uviteko, omuntu handi pandula, ndi ifupipika, nda gundjila nondi itegelela. Ondi na esimaneko enene lyaantu, ondi ya uviteko, nohandi ya pandula. Otandi pandula Kalunga molwashoka ondi li aluhe mongundu yookuumwe naakwanezimo uuna ndoka nde ya pumbwa.

Kundana: Omashongo geni wa pita mugo pethimbo wa li omugundjuka, na owe ga ende ngiini?
LH: Okukala omukadhona gomomukunda, oshinakugwanithwa shomukadhona kehe osho okulonga mepya, okutsa nokuteleka. Omathimbo gamwe onda li ndu uvite nda fa nde ekelwahi unene pethimbo lyomaipyakidhilo ogendji. Iinakugwanithwa yandje mbyoka nda pewa kumeme oya li okupa oondjuhwa iikulya, okuninga otee, kungame mbika oyali itaayi hokitha, unene tuu sho nda li itaandi vulu okulonga iinakugwanithwa yilwe.
Onda li inaandi panda iinakugwanithwa yandje mbyoka, onda li handi iyakele mombete eta ndi ka kotha po shampa aantu ayehe ya yi mepya. Meme okwa li ehole elandulathano nomaihumbato ngaashi ngoka gokushuna mondunda ihe ga idhidhimikile nando.
Oooh, omaihumbato omawinayi oga tula ndje aluhe muupyakadhi. Nani inandi tseya kutya meme sho ta ningi ngaaka okwa li ta longo ndje, kutya ngele itandi vulu okulonga ngaashi yalwe, otashi ningi shike? Opena iilonga yimwe tandi vulu okulonga nokukondjitha uunalyalo, naashika okwe shi ningi molwuuwanawa wandje.

Kundana: Opena esiku limwe wa dhiladhilile kutya oto ethapo ashihe, na oshike sha kala aluhe hashi ku kukumike okuya komeho nokesindano mu kehe shoka to longo?
LH: Aawe inandi tokola oku etha shoka tandi ningi noku ninga oshiyolitha, ka sha li tashi vulika nando. Yaandjetu oye na omukalo gwawo gwokupandula yalwe, ngele mboka oya pondola sha, ngaashi ando tutye owa piti niitsa yili nawa, eteyo ewanawa nenge omuntu a ningi sha oshiwanawa.
Oto pandulwa nokutumbalekwa momukalo itaa gu vulu oku itaalwa: omathimbo gamwe tate oha vulu okutu dhipagela noshikombo nookuli.
Nonkalo ndjoka, momadhiladhilo, kapwali nando ompito yasha okushuna monima.
Onda kambadhala aluhe okulonga nawa opo ndi mbilipaleke omitima dhawo neimemeho lyawo, opo ndi uve gumwe gwawo tati owu weteko “Omukadhona gwandje ngoka” Oya kala nokukumika ndje opo ndi longe shoka nda hala oku adha kutya nee ondi li monkalo ndjoka, na oya dhimbulutha ndje kutya hangame awike ndili monkalo ngaashi ndjika ihe opena wo yakwetu yamwe ya fa ndje ndele mboka inaya iyekelela.
Kundana: Eithano lyoye olini po ngashingeyi, naandika owe li hogolola ngiini, nenge owe li adha ngiini nenge owe shi ende ngiini okuthika pwaa shoka ho longo nena?
LH: Ngashingeyi ohandi longo moshitopolwa shoku gandja omikuli omishona.

Kundana: Otwa ningi omapekapeko moInterneta notwa mono, iishangwa kombinga yoye, yokutya ngoye owuna onkatulongo yoNUST. Oshike wi ilongela meithano lyoye?
LH: Onda adha onkatulongo yoB-Tech muunongo wewiliko lyaantu okuza koNUST (Polytechnic nale)

Kundana: Owa kala aluhe wu shi kutya owa hala oku ilonga oshilongwa shoka, nenge oshike she ku fala moku shi, ilonga noku ya meithano ndika wu li ngashingeyi?
LH: Onda li nda fuulwa koshilongwa shoClinical Psychology moUNAM, ndele omupya omunene oongoka inandi vula okutaambwa moUnam.
Onda ningi eindilo koNUST no nda taambwa mbala. Kandi na esiku nda dhiladhilile oku ilonga ontseyo mewiliko lyaantu[HRM], ihe otandi popi nda nyanyukwa kutya onda ningi ehogololo ewanawa. HRM oshilongwa sha mbwalangandja na oshimwe shomiilongwa ya simana moshitopolwa shiilonga kehe.

Kundana: Ngele otashi vulika tu hokololela nkene wa ende okuya muuyuni womahangano. Sho, wa tameke eithano lyoye nomiilonga yoye owa li wa tegelela shike?
LH: Hasho ndali nda tegelela. Uuyuni womahangano owa yooloka na owu udha omashongo. Kaailongi, ndika olyo ehala oku ulika nokugandja shoka wi ilongo okushi tula miilonga monkalo yolela. Ngaashi omuntu ho kala wuna uumbanda wokundopa mosikola osho wo shi li miilonga, muka omuntu oto ipula kombinga yokuyelwa, okulonga nawa kwaaniilonga,osho wo okwiihumitha komeho mwene montseyo, okukala wu shi kutya oshike oshipe tashi ningwa meithano lyoye.
Bank Windhoek, oha kumike omuniilonga kehe a kale aluhe ta tsikile okukoka palongo nopaithano, sho osho omathimbo ga ziko nda li ndi igwedhele ko oshilongwa sho nkene aaniilonga yena okulonga nokwiihumbata miilonga nonkene omahangano gena oku longa naaniilonga yawo (Industrial and Organisational Psychology), okukaleka omadhiladhilo gandje geli nawa nomape, nokwi mpwiyika nontseyo ompe noyo pombanda.

Kundana: Ngele owa tala konakuziwa yoye oshike shoka to tothamo kutya osho oshinima oshinene she eta elunduluko?
LH: Esiku nda pewa onkatulongo yandje yoB-Tech koPolytechnic olyo lyali ethimbo itaandi li dhimbwa nando. Onda kala handi ilongo konima yiilonga. Handi zi miilonga nokuya kootundi sigo opotundi onti-22h00. Oshinima shika kanda li nde shi panda, oshoka oshali tashi vulitha. Ihe pehulilo oshali eiyuvo ewanawa molwashoka onda adha esindano.

Kundana: Oto vulu wu tu lombwele kutya ngashingeyi oto lalakana wu adhe shike pethimbo ndika?
LH: Kapena naanaa oshinima shontumba shoka nda hala oku adha, onda hala ashike oku ku yamukula ngeyi kutya omuntu iho yalula uuyuhwena manga inaa wu tendulwa.

Kundana: Ngele andola owa pewa ompito okugandja etumwalaka okukumika aagundjuka mboka ya teka omukumo nena, ndika otali kala lini?
LH: Kaagundjuka nookaandjangandjele ayehe:
Oto vulu okulandula kehe shoka wa hala ngele owuna ondunge okushi adha, muuyuni womahangano eilongo olyo oshinima sha pumbiwa, onkene kala wi ilongekidha okulonga noonkondo opo wu pite nawa. Ngele ngoye kushi omwiilongi, nena oto vulu okuninga omunangeshefa, oshoka okungeshefa ihaku pula onkatulongo shampa ashike wu na edhiladhilo lyongeshefa yontumba momutse, ngoye eto kala wa tokola okuyi fululako.
Owa pumbwa okukala nontseyo yomwaalu opo wu vule okuyalula iiyemo yoye. Oshikwawo kala wa tseya kutya ino kala itoo ilongo omolwa ongeshefa yoye, oshoka ha oongeshefa adhihe hadhi adha esindano.
Oshikwawo Simaneka Kalunga koye, aakuluntu yoye, naantu ayehe. Simaneka olutu lwoye, iyageka okunwa omakaya, omalovu nokulongitha iingangamithi, mbika oyo iitondi yolutu lwomuntu. Kapena omuntu a yogoka, onkene popya, naantu na konga ekwatho. Ino idhidhimikila okuningwa nayi, tseya uuthemba woye, na wu kondjela. Ino etha etegameno, ilonga okugalikana,na tsikila okugalikana.
Okuya pehulilo, pandula omagano gomwenyo na ino ga talako ashike gafa ga nathangwa, hwepopeka onkalo yoye na kala aluhe to imemeha.

LEAVE A REPLY

Please enter your comment!
Please enter your name here