Sheyavali a thindikilwa kengathithi

0
710

Maria Namupala
ONKUMBULA

Engathithi lyaalilasa olya gongala Etiyali oshiwike shika poshigumbo sha nakusa Valde Chief Sheyavali kansela goshikandjohogololo Eengodi moshitopolwa shaShikoto, okugandja esimaneko lyahugunina.

Nakusa Sheyavali okwali kansela goshikandjohogololo shoka sigo eso lye, nokwa wilika okuza sho oshilongo sha manguluka. Okwa manene oondjenda dhe omwedhi gwayi, mepipi lyomimvo 60 a hulithile moshipangelo shopaumwene Ongwediva Medipark, konima sho a taambelwa moombete Olyomakaya yomasiku 19 Aguste.

Okwa lela uule womimvo 25, nokuli omukondjelimanguluko molwaashoka oye gumwe gomomapenda ngoka ga kondja noku kwashilipaleka kutya oshilongo osha manguluka nokukaleka po ombili nuukumwe. Okwali omulongisikola omanga inaa ninga kansela.
Aakwanepangelo yoondondo dha yooloka, ookansela ya za miitopolwa niikandjohogololo moshilongo ashihe mwa kwatelwa naakwashigwana oyali ya gongala, nokumuthindikila kegumbo lye lyaaluhe.

Oshituthifumviko osha ningwa oshiwike okuziilila moshigumbo she nopomayendo gopomudhingoloko, oyendji oyemu hokolola a li ependa, omuholi gwiilonga, nomukwiita ihaa sholola ye ihaa shuna monima.

Minista yEgameno Penda ya Ndakolo ngoka a gandja ondjokonona ya nakusa okwa ti, Chief okwa tseyika koyendji molwiilonga mbyoka a longa moshigwana, shoka sheeta moshikandjohgololo mu kale tamu monika omahumokomeho ogendji.

“Otweya mpaka okulila kansela Sheyavali, ngame onde mu tseya pethimbo lyekondjelo manguluko nonda longa naye sho oshilongo sha manguluka, okuume kandje, nopethimbo ndika inatu pumbwa okulila twa fa kaa tu na etegameno, ihe otatu lili tatu tedha nokudhiladhila iilonga pondoli mbyoka a longa nuuthiga mboka etu thigila, okwali omuntu gwaantu kena mushona ye kena munene ayehe oheya tala shi thike pamwe,” Ya Ndakolo ta ti ngaaka.

Aapopi ya yooloka oye mu hokolola ali e hole aantu yomapipi agehe, nokuna esiloshimpwiyu nakehe, oyendji oya popi nkene ya tseyathana na nakusa. Omuperesidente goshilongo omundohotola Hage Geingob, omuperesidente omukulu Hifikepunye Pohamba, ngoloneya goshitopolwa sha Ohangwena Usko Nghaamwa, omukwatakanithi goSwapo moshitopolwa Armas Amukwiyu noongoloneya yalwe oya tuma omatumwalaka gomahekeleko gopambelewa gu uka komuselekadhi, oyana naakwanezimo ayehe.
Ngoloneya goshitopolwa Oshikoto, Henock Kankoshi okwa ti oshitopolwa she osha kanitha ependa, a ti onani oya sile kondjoko, omwiifupipiki, omwiidhidhimiki nokuna ekwatathano ewaanawa naantu ayehe, ye ota ti iha tula omutse kepepe, nu una ena mpoka a yona aluhe oha gandja ombili.

“Otatu lili kuume ketu, omugandjimayele gwetu ngoka hetu kumagidha aluhe miilonga yetu, ashike nando tatu lili otatu pandula Kalunga sho etu pele kuume ketu nomuniilonga pamwe natse ngoka etu longa oshindji mu ye otwa tekamo iinima oyindji, nonkene woo tuna okwi ihumbatela omuntu kehe,” Kankoshi a ti.

Oyendji otaye mu tanga omolwa oshilonga yakulo a longo moshigwana osho wo moshikandjohogololo moka a kala ta yakula. Mwene gomukunda Fabian Petrus okwa ti ka yali yena omayakulo gasha moshikandjohogololo shawo, ihe Sheyavali okwa tula ayihe kolutenda nokukwashilipaleka kutya aakalimo yomoshikandjohogololo she oya mona omayakulo ga pumbiwa.
Okwa ti oya thigilwa omeya geli popepi nenge ha moshikandjohogololo ashihe, na otaya pandula, omalusheno, oosikola nomayakulo wo galwe ga pumbiwa moshilongo.

Okwa thigiko omukulukadhi gwe, aamwayina yahetatu , aanona omugoyi aakadhona yahetatu nomumati gumwe, osho wo aatekulu. Otatu gandja omahekeleko kwaayehe ya thigwa po ku kansela Sheyavali.

LEAVE A REPLY

Please enter your comment!
Please enter your name here