Uunona uyali wa pile megumbo

0
291

Maria Namupala
ONAKANKUNZI

Opolisi moshitopolwa shaShikoto oya lopota aanona yaali ya si owili dhomutenya Etiyali oshiwike shika, konima sho ondunda moka yali taya dhana ya hwama omulilo, momukunda Onakankunzi moshikandjohogololo Omuthiya.

Uuyelele mboka wa gandjwa komukonakoni nomukwatakanithi moshitopolwa Kommissiona Gopevi, Naomi Katjiua owa koleke oshiningwanima shika. Komufala gwopevi okwa ti otaku hokololwa aanona ya thigwa kuyinakulu megumbo manga ayi kuundunda wopomudhingoloko.
Katjiua ta ti aanona mbaka oyali ya thigwa mo na gumwe ena omimvo 18, nokwali uuvu uunona tawu kugu naashi a kaya kondunda okwaadha ya yaka nale omulilo na ina vula okuyi dhima, nonande ali ta kambadhala omulilo ogwa pupyala unene..

Kapuna uuyelele kutya omulilo ogwe etithwa koshike, naanona mboka aamwayinathana oya pyapo thilu itaaya vulu okudhimbululwa. Oonakusa oya tongololwa oyo Martha Itana goomvula mbali (2), na Gideon Itana gomumvo gumwe noomwedhi.

Okwa pula aavali ya thige uupalwa osho wo omililo dha dhima uuna taya zimo momagumbo, yo ya yande okuthiga mo aanona oyo ayeke momagumbo molwaashoka aanona oyendji aatsini noye hole okudhana omililo. Okwa pula wo kehe ngoka ta thigwa a tonatele aanona momagumbo, ya kale aluhe taya tala mpoka yeli, ko ku yandwe iiponga yomililo mbyoka tayi lopotwa ehimbo nethimbo moshitopolwa.
Aapambele yoonakusa oya tseyithilwa nomakonakono gopolisi otaga tsikile. Natango opolisi moshitopolwa shoka oya lopota olutu lwomulumentu gomimvo 23 i itsuwa iimangeleka momuti nondhalate oshiwike shika komukunda Okapuku. Nakusa okwa tongololwa oye Jackson Muzanima a yambukile momukunda ogo tuu ngoka.

Okwi itsuwa komuniilonga gomegumbo nokwa thigipo omukanda ngoka Katjiua ati itagu vulu okupopiwa manga. Olutu lwe otalu ka ningilwa omakonakono ku monike osheetithi sheso. Naapambele oya tseyithilwa nomakonakono gopolisi mu shika otaga tsikile.
Okwa ti okwa konekwa aagundjuka oyendji moshitopolwa taya ikutha oomwenyo, ashike okwa kumike aantu kutya ngele owa mono wu na uudhigu tseyithila kuume koye, nenge kehe ngoka wi inekela ngoye topewa ehungomwenyo. Tati eimangeleko nenge eikuthomwenyo halyo ekandule po lyomukundu.

Moshiningwanima sha yooloka moshitopolwa shErongo opolisi oya lopota omulumentu gomimvo 41 a yambukile ko Usakos a tsuwa nombele okusa ku kuume ke kopaihole oshiwike shika. Omukanda ngoka gwa pitithwa komukonakoni nomukwatatakanithi mopolisi moshitopolwa shoka Omupevi Kommissiona Erastus Iikuyu, ogwa ti nakusa okwa tongololwa oye Shalulu Nghiyalwa.
Nakusa okwa tsuwa lumwe montulo nombele, shika sha ningwa potundi onti19h00, konima sho pokati kayo yaali pwa holoka ehilathano mombashu pomalukalwa gOmugulugwombashe. Nakusa okwa sile pehala lyoshiningwanima.

Omufekelwa gomimvo 32 okwa hadhuka po ashikeokwa tulwa miipandeko konima yoshiningwanima aadhika ta holama, nokwa tegelelwa a holoke mompangu oshiwike shika ta tamanekelwa edhipago.

LEAVE A REPLY

Please enter your comment!
Please enter your name here